၄. သမ္ဗဟုလသုတ္တံ

၂၂၄. ဧကံ သမယံ သမ္ဗဟုလာ ဘိက္ခူ ကောသလေသု ဝိဟရန္တိ အညတရသ္မိံ ဝနသဏ္ဍေ. အထ ခေါ တေ ဘိက္ခူ ဝဿံဝုဋ္ဌာ [ဝဿံဝုတ္ထာ (သီ. သျာ. ကံ. ပီ.)] တေမာသစ္စယေန စာရိကံ ပက္ကမိံသု. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တေ ဘိက္ခူ အပဿန္တီ ပရိဒေဝမာနာ တာယံ ဝေလာယံ ဣမံ ဂါထံ အဘာသိ –

‘‘အရတိ ဝိယ မေဇ္ဇ ခါယတိ၊

ဗဟုကေ ဒိသွာန ဝိဝိတ္တေ အာသနေ၊

တေ စိတ္တကထာ ဗဟုဿုတာ၊

ကောမေ ဂေါတမသာဝကာ ဂတာ’’တိ.

ဧဝံ ဝုတ္တေ၊ အညတရာ ဒေဝတာ တံ ဒေဝတံ ဂါထာယ ပစ္စဘာသိ –

‘‘မာဂဓံ ဂတာ ကောသလံ ဂတာ၊ ဧကစ္စိယာ ပန ဝဇ္ဇိဘူမိယာ၊

မဂါ ဝိယ အသင်္ဂစာရိနော၊ အနိကေတာ ဝိဟရန္တိ ဘိက္ခဝေါ’’တိ.