၁၁. အကုသလဝိတက္ကသုတ္တံ

၂၃၁. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန သော ဘိက္ခု ဒိဝါဝိဟာရဂတော ပါပကေ အကုသလေ ဝိတက္ကေ ဝိတက္ကေတိ၊ သေယျထိဒံ – ကာမဝိတက္ကံ၊ ဗျာပါဒဝိတက္ကံ၊ ဝိဟိံသာဝိတက္ကံ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ၊ ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ –

‘‘အယောနိသော မနသိကာရာ၊ သော ဝိတက္ကေဟိ ခဇ္ဇသိ၊

အယောနိသော [အယောနိံ (ပီ. က.)] ပဋိနိဿဇ္ဇ၊ ယောနိသော အနုစိန္တယ.

‘‘သတ္ထာရံ ဓမ္မမာရဗ္ဘ၊ သံဃံ သီလာနိ အတ္တနော၊

အဓိဂစ္ဆသိ ပါမောဇ္ဇံ၊ ပီတိသုခမသံသယံ၊

တတော ပါမောဇ္ဇဗဟုလော၊ ဒုက္ခဿန္တံ ကရိဿသီ’’တိ.

အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ.