၁၂. မဇ္ဈနှိကသုတ္တံ

၂၃၂. ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. အထ ခေါ တသ္မိံ ဝနသဏ္ဍေ အဓိဝတ္ထာ ဒေဝတာ ယေန သော ဘိက္ခု တေနုပသင်္ကမိ၊ ဥပသင်္ကမိတွာ တဿ ဘိက္ခုနော သန္တိကေ ဣမံ ဂါထံ အဘာသိ –

‘‘ဌိတေ မဇ္ဈနှိကေ ကာလေ၊ သန္နိသီဝေသု [သန္နိသိန္နေသု (သျာ. ကံ. ပီ.)] ပက္ခိသု၊

သဏတေဝ ဗြဟာရညံ၊ တံ ဘယံ ပဋိဘာတိ မံ.

‘‘ဌိတေ မဇ္ဈနှိကေ ကာလေ၊ သန္နိသီဝေသု ပက္ခိသု၊

သဏတေဝ ဗြဟာရညံ၊ သာ ရတိ ပဋိဘာတိ မ’’န္တိ.