၁၀. နာနာတိတ္ထိယသာဝကသုတ္တံ

၁၁၁. ဧဝံ မေ သုတံ – ဧကံ သမယံ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. အထ ခေါ သမ္ဗဟုလာ နာနာတိတ္ထိယသာဝကာ ဒေဝပုတ္တာ အသမော စ သဟလိ [သဟလီ (သီ. သျာ. ကံ. ပီ.)] စ နီကော [နိင်္ကော (သီ. ပီ.)၊ နိကော (သျာ. ကံ.)] စ အာကောဋကော စ ဝေဂဗ္ဘရိ စ [ဝေဋမ္ဗရီ စ (သီ. သျာ. ကံ. ပီ.)] မာဏဝဂါမိယော စ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဝေဠုဝနံ ဩဘာသေတွာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌံသု. ဧကမန္တံ ဌိတော ခေါ အသမော ဒေဝပုတ္တော ပူရဏံ ကဿပံ အာရဗ္ဘ ဘဂဝတော သန္တိကေ ဣမံ ဂါထံ အဘာသိ –

‘‘ဣဓ ဆိန္ဒိတမာရိတေ၊ ဟတဇာနီသု ကဿပေါ၊

န ပါပံ သမနုပဿတိ၊ ပုညံ ဝါ ပန အတ္တနော၊

သ ဝေ ဝိဿာသမာစိက္ခိ၊ သတ္ထာ အရဟတိ မာနန’’န္တိ.

အထ ခေါ သဟလိ ဒေဝပုတ္တော မက္ခလိံ ဂေါသာလံ အာရဗ္ဘ ဘဂဝတော သန္တိကေ ဣမံ ဂါထံ အဘာသိ –

‘‘တပေါဇိဂုစ္ဆာယ သုသံဝုတတ္တော၊

ဝါစံ ပဟာယ ကလဟံ ဇနေန၊

သမောသဝဇ္ဇာ ဝိရတော သစ္စဝါဒီ၊

န ဟိ နူန တာဒိသံ ကရောတိ [န ဟ နုန တာဒီ ပကရောတိ (သီ. သျာ. ကံ.)] ပါပ’’န္တိ.

အထ ခေါ နီကော ဒေဝပုတ္တော နိဂဏ္ဌံ နာဋပုတ္တံ [နာထပုတ္တံ (သီ.)] အာရဗ္ဘ ဘဂဝတော သန္တိကေ ဣမံ ဂါထံ အဘာသိ –

‘‘ဇေဂုစ္ဆီ နိပကော ဘိက္ခု၊ စာတုယာမသုသံဝုတော၊

ဒိဋ္ဌံ သုတဉ္စ အာစိက္ခံ၊ န ဟိ နူန ကိဗ္ဗိသီ သိယာ’’တိ.

အထ ခေါ အာကောဋကော ဒေဝပုတ္တော နာနာတိတ္ထိယေ အာရဗ္ဘ ဘဂဝတော သန္တိကေ ဣမံ ဂါထံ အဘာသိ –

‘‘ပကုဓကော ကာတိယာနော နိဂဏ္ဌော၊

ယေ စာပိမေ မက္ခလိပူရဏာသေ၊

ဂဏဿ သတ္ထာရော သာမညပ္ပတ္တာ၊

န ဟိ နူန တေ သပ္ပုရိသေဟိ ဒူရေ’’တိ.

အထ ခေါ ဝေဂဗ္ဘရိ ဒေဝပုတ္တော အာကောဋကံ ဒေဝပုတ္တံ ဂါထာယ ပစ္စဘာသိ –

‘‘သဟာစရိတေန [သဟာရဝေနာပိ (က. သီ.)၊ သဂါရဝေနာပိ (ပီ.)] ဆဝေါ သိဂါလော [သိင်္ဂါလော (က.)]၊

န ကောတ္ထုကော သီဟသမော ကဒါစိ၊

နဂ္ဂေါ မုသာဝါဒီ ဂဏဿ သတ္ထာ၊

သင်္ကဿရာစာရော န သတံ သရိက္ခော’’တိ.

အထ ခေါ မာရော ပါပိမာ ဗေဂဗ္ဘရိံ ဒေဝပုတ္တံ အနွာဝိသိတွာ ဘဂဝတော သန္တိကေ ဣမံ ဂါထံ အဘာသိ –

‘‘တပေါဇိဂုစ္ဆာယ အာယုတ္တာ၊ ပါလယံ ပဝိဝေကိယံ၊

ရူပေ စ ယေ နိဝိဋ္ဌာသေ၊ ဒေဝလောကာဘိနန္ဒိနော၊

တေ ဝေ သမ္မာနုသာသန္တိ၊ ပရလောကာယ မာတိယာ’’တိ.

အထ ခေါ ဘဂဝါ၊ ‘မာရော အယံ ပါပိမာ’ ဣတိ ဝိဒိတွာ၊ မာရံ ပါပိမန္တံ ဂါထာယ ပစ္စဘာသိ –

‘‘ယေ ကေစိ ရူပါ ဣဓ ဝါ ဟုရံ ဝါ၊

ယေ စန္တလိက္ခသ္မိံ ပဘာသဝဏ္ဏာ၊

သဗ္ဗေဝ တေ တေ နမုစိပ္ပသတ္ထာ၊

အာမိသံဝ မစ္ဆာနံ ဝဓာယ ခိတ္တာ’’တိ.

အထ ခေါ မာဏဝဂါမိယော ဒေဝပုတ္တော ဘဂဝန္တံ အာရဗ္ဘ ဘဂဝတော သန္တိကေ ဣမာ ဂါထာယော အဘာသိ –

‘‘ဝိပုလော ရာဇဂဟီယာနံ၊ ဂိရိသေဋ္ဌော ပဝုစ္စတိ၊

သေတော ဟိမဝတံ သေဋ္ဌော၊ အာဒိစ္စော အဃဂါမိနံ.

‘‘သမုဒ္ဒေါ ဥဒဓိနံ သေဋ္ဌော၊ နက္ခတ္တာနဉ္စ စန္ဒိမာ [နက္ခတ္တာနံဝ စန္ဒိမာ (က.)]၊

သဒေဝကဿ လောကဿ၊ ဗုဒ္ဓေါ အဂ္ဂေါ ပဝုစ္စတီ’’တိ.

နာနာတိတ္ထိယဝဂ္ဂေါ တတိယော.

တဿုဒ္ဒါနံ –

သိဝေါ ခေမော စ သေရီ စ၊ ဃဋီ ဇန္တု စ ရောဟိတော၊

နန္ဒော နန္ဒိဝိသာလော စ၊ သုသိမော နာနာတိတ္ထိယေန တေ ဒသာတိ.

ဒေဝပုတ္တသံယုတ္တံ သမတ္တံ.