၄. နန္ဒနသုတ္တံ

၉၅. ဧကမန္တံ ဌိတော ခေါ နန္ဒနော ဒေဝပုတ္တော ဘဂဝန္တံ ဂါထာယ အဇ္ဈဘာသိ –

‘‘ပုစ္ဆာမိ တံ ဂေါတမ ဘူရိပည၊

အနာဝဋံ ဘဂဝတော ဉာဏဒဿနံ၊

ကထံဝိဓံ သီလဝန္တံ ဝဒန္တိ၊

ကထံဝိဓံ ပညဝန္တံ ဝဒန္တိ၊

ကထံဝိဓော ဒုက္ခမတိစ္စ ဣရိယတိ၊

ကထံဝိဓံ ဒေဝတာ ပူဇယန္တီ’’တိ.

‘‘ယော သီလဝါ ပညဝါ ဘာဝိတတ္တော၊

သမာဟိတော ဈာနရတော သတီမာ၊

သဗ္ဗဿ သောကာ ဝိဂတာ ပဟီနာ၊

ခီဏာသဝေါ အန္တိမဒေဟဓာရီ.

‘‘တထာဝိဓံ သီလဝန္တံ ဝဒန္တိ၊

တထာဝိဓံ ပညဝန္တံ ဝဒန္တိ၊

တထာဝိဓော ဒုက္ခမတိစ္စ ဣရိယတိ၊

တထာဝိဓံ ဒေဝတာ ပူဇယန္တီ’’တိ.