၁. စန္ဒိမသသုတ္တံ

၉၂. သာဝတ္ထိနိဒါနံ. အထ ခေါ စန္ဒိမသော [စန္ဒိမာသော (က.)] ဒေဝပုတ္တော အဘိက္ကန္တာယ ရတ္တိယာ အဘိက္ကန္တဝဏ္ဏော ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတော ခေါ စန္ဒိမသော ဒေဝပုတ္တော ဘဂဝတော သန္တိကေ ဣမံ ဂါထံ အဘာသိ –

‘‘တေ ဟိ သောတ္ထိံ ဂမိဿန္တိ၊ ကစ္ဆေ ဝါမကသေ မဂါ၊

ဈာနာနိ ဥပသမ္ပဇ္ဇ၊ ဧကောဒိ နိပကာ သတာ’’တိ.

‘‘တေ ဟိ ပါရံ ဂမိဿန္တိ၊ ဆေတွာ ဇာလံဝ အမ္ဗုဇော၊

ဈာနာနိ ဥပသမ္ပဇ္ဇ၊ အပ္ပမတ္တာ ရဏဉ္ဇဟာ’’တိ.