၅. ဒါမလိသုတ္တံ

၈၆. သာဝတ္ထိနိဒါနံ. အထ ခေါ ဒါမလိ ဒေဝပုတ္တော အဘိက္ကန္တာယ ရတ္တိယာ အဘိက္ကန္တဝဏ္ဏော ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတော ခေါ ဒါမလိ ဒေဝပုတ္တော ဘဂဝတော သန္တိကေ ဣမံ ဂါထံ အဘာသိ –

‘‘ကရဏီယမေတံ ဗြာဟ္မဏေန၊ ပဓာနံ အကိလာသုနာ၊

ကာမာနံ ဝိပ္ပဟာနေန၊ န တေနာသီသတေ ဘဝ’’န္တိ.

‘‘နတ္ထိ ကိစ္စံ ဗြာဟ္မဏဿ (ဒါမလီတိ ဘဂဝါ)၊

ကတကိစ္စော ဟိ ဗြာဟ္မဏော.

‘‘ယာဝ န ဂါဓံ လဘတိ နဒီသု၊

အာယူဟတိ သဗ္ဗဂတ္တေဘိ ဇန္တု၊

ဂါဓဉ္စ လဒ္ဓါန ထလေ ဌိတော ယော၊

နာယူဟတီ ပါရဂတော ဟိ သောဝ [သောတိ (သီ. ပီ. က.)၊ ဟောတိ (သျာ. ကံ.)၊ သော (?)].

‘‘ဧသူပမာ ဒါမလိ ဗြာဟ္မဏဿ၊

ခီဏာသဝဿ နိပကဿ ဈာယိနော၊

ပပ္ပုယျ ဇာတိမရဏဿ အန္တံ၊

နာယူဟတီ ပါရဂတော ဟိ သော’’တိ [ဟောတီတိ (သျာ. ကံ.)].