၇. အဒ္ဓဝဂ္ဂေါ

၁. နာမသုတ္တံ

၆၁. ‘‘ကိံသု သဗ္ဗံ အဒ္ဓဘဝိ [အနွဘဝိ (သီ.)]၊ ကိသ္မာ ဘိယျော န ဝိဇ္ဇတိ၊

ကိဿဿု ဧကဓမ္မဿ၊ သဗ္ဗေဝ ဝသမနွဂူ’’တိ [ဝသမဒ္ဓဂူ (က.)].

‘‘နာမံ သဗ္ဗံ အဒ္ဓဘဝိ၊ နာမာ ဘိယျော န ဝိဇ္ဇတိ၊

နာမဿ ဧကဓမ္မဿ၊ သဗ္ဗေဝ ဝသမနွဂူ’’တိ.

၂. စိတ္တသုတ္တံ

၆၂. ‘‘ကေနဿု နီယတိ လောကော၊ ကေနဿု ပရိကဿတိ၊

ကိဿဿု ဧကဓမ္မဿ၊ သဗ္ဗေဝ ဝသမနွဂူ’’တိ.

‘‘စိတ္တေန နီယတိ လောကော၊ စိတ္တေန ပရိကဿတိ၊

စိတ္တဿ ဧကဓမ္မဿ၊ သဗ္ဗေဝ ဝသမနွဂူ’’တိ.

၃. တဏှာသုတ္တံ

၆၃. ‘‘ကေနဿု နီယတိ လောကော၊ ကေနဿု ပရိကဿတိ၊

ကိဿဿု ဧကဓမ္မဿ၊ သဗ္ဗေဝ ဝသမနွဂူ’’တိ.

‘‘တဏှာယ နီယတိ လောကော၊ တဏှာယ ပရိကဿတိ၊

တဏှာယ ဧကဓမ္မဿ၊ သဗ္ဗေဝ ဝသမနွဂူ’’တိ.

၄. သံယောဇနသုတ္တံ

၆၄. ‘‘ကိံသု သံယောဇနော လောကော၊ ကိံသု တဿ ဝိစာရဏံ၊

ကိဿဿု ဝိပ္ပဟာနေန၊ နိဗ္ဗာနံ ဣတိ ဝုစ္စတီ’’တိ.

‘‘နန္ဒီသံယောဇနော [နန္ဒိသံယောဇနော (သီ. သျာ. ကံ.)] လောကော၊ ဝိတက္ကဿ ဝိစာရဏံ၊

တဏှာယ ဝိပ္ပဟာနေန၊ နိဗ္ဗာနံ ဣတိ ဝုစ္စတီ’’တိ.

၅. ဗန္ဓနသုတ္တံ

၆၅. ‘‘ကိံသု သမ္ဗန္ဓနော လောကော၊ ကိံသု တဿ ဝိစာရဏံ၊

ကိဿဿု ဝိပ္ပဟာနေန၊ သဗ္ဗံ ဆိန္ဒတိ ဗန္ဓန’’န္တိ.

‘‘နန္ဒီသမ္ဗန္ဓနော လောကော၊ ဝိတက္ကဿ ဝိစာရဏံ၊

တဏှာယ ဝိပ္ပဟာနေန၊ သဗ္ဗံ ဆိန္ဒတိ ဗန္ဓန’’န္တိ.

၆. အတ္တဟတသုတ္တံ

၆၆. ‘‘ကေနဿုဗ္ဘာဟတော လောကော၊ ကေနဿု ပရိဝါရိတော၊

ကေန သလ္လေန ဩတိဏ္ဏော၊ ကိဿ ဓူပါယိတော သဒါ’’တိ.

‘‘မစ္စုနာဗ္ဘာဟတော လောကော၊ ဇရာယ ပရိဝါရိတော၊

တဏှာသလ္လေန ဩတိဏ္ဏော၊ ဣစ္ဆာဓူပါယိတော သဒါ’’တိ.

၇. ဥဍ္ဍိတသုတ္တံ

၆၇. ‘‘ကေနဿု ဥဍ္ဍိတော လောကော၊ ကေနဿု ပရိဝါရိတော၊

ကေနဿု ပိဟိတော လောကော၊ ကိသ္မိံ လောကော ပတိဋ္ဌိတော’’တိ.

‘‘တဏှာယ ဥဍ္ဍိတော လောကော၊ ဇရာယ ပရိဝါရိတော၊

မစ္စုနာ ပိဟိတော လောကော၊ ဒုက္ခေ လောကော ပတိဋ္ဌိတော’’တိ.

၈. ပိဟိတသုတ္တံ

၆၈. ‘‘ကေနဿု ပိဟိတော လောကော၊ ကိသ္မိံ လောကော ပတိဋ္ဌိတော၊

ကေနဿု ဥဍ္ဍိတော လောကော၊ ကေနဿု ပရိဝါရိတော’’တိ.

‘‘မစ္စုနာ ပိဟိတော လောကော၊ ဒုက္ခေ လောကော ပတိဋ္ဌိတော၊

တဏှာယ ဥဍ္ဍိတော လောကော၊ ဇရာယ ပရိဝါရိတော’’တိ.

၉. ဣစ္ဆာသုတ္တံ

၆၉. ‘‘ကေနဿု ဗဇ္ဈတီ လောကော၊ ကိဿ ဝိနယာယ မုစ္စတိ၊

ကိဿဿု ဝိပ္ပဟာနေန၊ သဗ္ဗံ ဆိန္ဒတိ ဗန္ဓန’’န္တိ.

‘‘ဣစ္ဆာယ ဗဇ္ဈတီ လောကော၊ ဣစ္ဆာဝိနယာယ မုစ္စတိ၊

ဣစ္ဆာယ ဝိပ္ပဟာနေန၊ သဗ္ဗံ ဆိန္ဒတိ ဗန္ဓန’’န္တိ.

၁၀. လောကသုတ္တံ

၇၀. ‘‘ကိသ္မိံ လောကော သမုပ္ပန္နော၊ ကိသ္မိံ ကုဗ္ဗတိ သန္ထဝံ၊

ကိဿ လောကော ဥပါဒါယ၊ ကိသ္မိံ လောကော ဝိဟညတီ’’တိ.

‘‘ဆသု လောကော သမုပ္ပန္နော၊ ဆသု ကုဗ္ဗတိ သန္ထဝံ၊

ဆန္နမေဝ ဥပါဒါယ၊ ဆသု လောကော ဝိဟညတီ’’တိ.

အဒ္ဓဝဂ္ဂေါ [အနွဝဂ္ဂေါ (သီ.)] သတ္တမော.

တဿုဒ္ဒါနံ –

နာမံ စိတ္တဉ္စ တဏှာ စ၊ သံယောဇနဉ္စ ဗန္ဓနာ၊

အဗ္ဘာဟတုဍ္ဍိတော ပိဟိတော၊ ဣစ္ဆာ လောကေန တေ ဒသာတိ.