၆. ဇရာဝဂ္ဂေါ

၁. ဇရာသုတ္တံ

၅၁. ‘‘ကိံသု ယာဝ ဇရာ သာဓု၊ ကိံသု သာဓု ပတိဋ္ဌိတံ၊

ကိံသု နရာနံ ရတနံ၊ ကိံသု စောရေဟိ ဒူဟရ’’န္တိ.

‘‘သီလံ ယာဝ ဇရာ သာဓု၊ သဒ္ဓါ သာဓု ပတိဋ္ဌိတာ၊

ပညာ နရာနံ ရတနံ၊ ပုညံ စောရေဟိ ဒူဟရ’’န္တိ.

၂. အဇရသာသုတ္တံ

၅၂. ‘‘ကိံသု အဇရသာ သာဓု၊ ကိံသု သာဓု အဓိဋ္ဌိတံ၊

ကိံသု နရာနံ ရတနံ၊ ကိံသု စောရေဟျဟာရိယ’’န္တိ.

‘‘သီလံ အဇရသာ သာဓု၊ သဒ္ဓါ သာဓု အဓိဋ္ဌိတာ၊

ပညာ နရာနံ ရတနံ၊ ပုညံ စောရေဟျဟာရိယ’’န္တိ.

၃. မိတ္တသုတ္တံ

၅၃. ‘‘ကိံသု ပဝသတော [ပထဝတော (ပီ. က.)] မိတ္တံ၊ ကိံသု မိတ္တံ သကေ ဃရေ၊

ကိံ မိတ္တံ အတ္ထဇာတဿ၊ ကိံ မိတ္တံ သမ္ပရာယိက’’န္တိ.

‘‘သတ္ထော ပဝသတော မိတ္တံ၊ မာတာ မိတ္တံ သကေ ဃရေ၊

သဟာယော အတ္ထဇာတဿ၊ ဟောတိ မိတ္တံ ပုနပ္ပုနံ၊

သယံကတာနိ ပုညာနိ၊ တံ မိတ္တံ သမ္ပရာယိက’’န္တိ.

၄. ဝတ္ထုသုတ္တံ

၅၄. ‘‘ကိံသု ဝတ္ထု မနုဿာနံ၊ ကိံသူဓ ပရမော သခါ၊

ကိံသု ဘူတာ ဥပဇီဝန္တိ၊ ယေ ပါဏာ ပထဝိဿိတာ’’တိ [ပထဝိံ သိတာတိ (သီ. သျာ. ကံ. ပီ.)].

‘‘ပုတ္တာ ဝတ္ထု မနုဿာနံ၊ ဘရိယာ စ [ဘရိယာဝ (သီ.)၊ ဘရိယာ (သျာ. ကံ.)] ပရမော သခါ၊

ဝုဋ္ဌိံ ဘူတာ ဥပဇီဝန္တိ၊ ယေ ပါဏာ ပထဝိဿိတာ’’တိ.

၅. ပဌမဇနသုတ္တံ

၅၅. ‘‘ကိံသု ဇနေတိ ပုရိသံ၊ ကိံသု တဿ ဝိဓာဝတိ၊

ကိံသု သံသာရမာပါဒိ၊ ကိံသု တဿ မဟဗ္ဘယ’’န္တိ.

‘‘တဏှာ ဇနေတိ ပုရိသံ၊ စိတ္တမဿ ဝိဓာဝတိ၊

သတ္တော သံသာရမာပါဒိ၊ ဒုက္ခမဿ မဟဗ္ဘယ’’န္တိ.

၆. ဒုတိယဇနသုတ္တံ

၅၆. ‘‘ကိံသု ဇနေတိ ပုရိသံ၊ ကိံသု တဿ ဝိဓာဝတိ၊

ကိံသု သံသာရမာပါဒိ၊ ကိသ္မာ န ပရိမုစ္စတီ’’တိ.

‘‘တဏှာ ဇနေတိ ပုရိသံ၊ စိတ္တမဿ ဝိဓာဝတိ၊

သတ္တော သံသာရမာပါဒိ၊ ဒုက္ခာ န ပရိမုစ္စတီ’’တိ.

၇. တတိယဇနသုတ္တံ

၅၇. ‘‘ကိံသု ဇနေတိ ပုရိသံ၊ ကိံသု တဿ ဝိဓာဝတိ၊

ကိံသု သံသာရမာပါဒိ၊ ကိံသု တဿ ပရာယန’’န္တိ.

‘‘တဏှာ ဇနေတိ ပုရိသံ၊ စိတ္တမဿ ဝိဓာဝတိ၊

သတ္တော သံသာရမာပါဒိ၊ ကမ္မံ တဿ ပရာယန’’န္တိ.

၈. ဥပ္ပထသုတ္တံ

၅၈. ‘‘ကိံသု ဥပ္ပထော အက္ခာတော၊ ကိံသု ရတ္တိန္ဒိဝက္ခယော၊

ကိံ မလံ ဗြဟ္မစရိယဿ၊ ကိံ သိနာနမနောဒက’’န္တိ.

‘‘ရာဂေါ ဥပ္ပထော အက္ခာတော၊ ဝယော ရတ္တိန္ဒိဝက္ခယော၊

ဣတ္ထီ မလံ ဗြဟ္မစရိယဿ၊ ဧတ္ထာယံ သဇ္ဇတေ ပဇာ၊

တပေါ စ ဗြဟ္မစရိယဉ္စ၊ တံ သိနာနမနောဒက’’န္တိ.

၉. ဒုတိယသုတ္တံ

၅၉. ‘‘ကိံသု ဒုတိယာ [ဒုတိယံ (သျာ. ကံ. ပီ.)] ပုရိသဿ ဟောတိ၊ ကိံသု စေနံ ပသာသတိ၊

ကိဿ စာဘိရတော မစ္စော၊ သဗ္ဗဒုက္ခာ ပမုစ္စတီ’’တိ.

‘‘သဒ္ဓါ ဒုတိယာ ပုရိသဿ ဟောတိ၊ ပညာ စေနံ ပသာသတိ၊

နိဗ္ဗာနာဘိရတော မစ္စော၊ သဗ္ဗဒုက္ခာ ပမုစ္စတီ’’တိ.

၁၀. ကဝိသုတ္တံ

၆၀. ‘‘ကိံသု နိဒါနံ ဂါထာနံ၊ ကိံသု တာသံ ဝိယဉ္ဇနံ၊

ကိံသု သန္နိဿိတာ ဂါထာ၊ ကိံသု ဂါထာနမာသယော’’တိ.

‘‘ဆန္ဒော နိဒါနံ ဂါထာနံ၊ အက္ခရာ တာသံ ဝိယဉ္ဇနံ၊

နာမသန္နိဿိတာ ဂါထာ၊ ကဝိ ဂါထာနမာသယော’’တိ.

ဇရာဝဂ္ဂေါ ဆဋ္ဌော.

တဿုဒ္ဒါနံ –

ဇရာ အဇရသာ မိတ္တံ၊ ဝတ္ထု တီဏိ ဇနာနိ စ၊

ဥပ္ပထော စ ဒုတိယော စ၊ ကဝိနာ ပူရိတော ဝဂ္ဂေါတိ.