၉. ပဌမပဇ္ဇုန္နဓီတုသုတ္တံ

၃၉. ဧဝံ မေ သုတံ – ဧကံ သမယံ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ. အထ ခေါ ကောကနဒါ ပဇ္ဇုန္နဿ ဓီတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ မဟာဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတာ ခေါ သာ ဒေဝတာ ကောကနဒါ ပဇ္ဇုန္နဿ ဓီတာ ဘဂဝတော သန္တိကေ ဣမာ ဂါထာယော အဘာသိ –

‘‘ဝေသာလိယံ ဝနေ ဝိဟရန္တံ၊ အဂ္ဂံ သတ္တဿ သမ္ဗုဒ္ဓံ၊

ကောကနဒါဟမသ္မိ အဘိဝန္ဒေ၊ ကောကနဒါ ပဇ္ဇုန္နဿ ဓီတာ.

‘‘သုတမေဝ ပုရေ အာသိ၊ ဓမ္မော စက္ခုမတာနုဗုဒ္ဓေါ၊

သာဟံ ဒါနိ သက္ခိ ဇာနာမိ၊ မုနိနော ဒေသယတော သုဂတဿ.

‘‘ယေ ကေစိ အရိယံ ဓမ္မံ၊ ဝိဂရဟန္တာ စရန္တိ ဒုမ္မေဓာ၊

ဥပေန္တိ ရောရုဝံ ဃောရံ၊ စိရရတ္တံ ဒုက္ခံ အနုဘဝန္တိ.

‘‘ယေ စ ခေါ အရိယေ ဓမ္မေ၊ ခန္တိယာ ဥပသမေန ဥပေတာ၊

ပဟာယ မာနုသံ ဒေဟံ၊ ဒေဝကာယ ပရိပူရေဿန္တီ’’တိ.