၅. ဥဇ္ဈာနသညိသုတ္တံ

၃၅. ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ သမ္ဗဟုလာ ဥဇ္ဈာနသညိကာ ဒေဝတာယော အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဝေဟာသံ အဋ္ဌံသု. ဝေဟာသံ ဌိတာ ခေါ ဧကာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘အညထာ သန္တမတ္တာနံ၊ အညထာ ယော ပဝေဒယေ၊

နိကစ္စ ကိတဝဿေဝ၊ ဘုတ္တံ ထေယျေန တဿ တံ.

‘‘ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ၊

အကရောန္တံ ဘာသမာနာနံ၊ ပရိဇာနန္တိ ပဏ္ဍိတာ’’တိ.

‘‘န ယိဒံ ဘာသိတမတ္တေန၊ ဧကန္တသဝနေန ဝါ၊

အနုက္ကမိတဝေ သက္ကာ၊ ယာယံ ပဋိပဒါ ဒဠှာ၊

ယာယ ဓီရာ ပမုစ္စန္တိ၊ ဈာယိနော မာရဗန္ဓနာ.

‘‘န ဝေ ဓီရာ ပကုဗ္ဗန္တိ၊ ဝိဒိတွာ လောကပရိယာယံ၊

အညာယ နိဗ္ဗုတာ ဓီရာ၊ တိဏ္ဏာ လောကေ ဝိသတ္တိက’’န္တိ.

အထ ခေါ တာ ဒေဝတာယော ပထဝိယံ ပတိဋ္ဌဟိတွာ ဘဂဝတော ပါဒေသု သိရသာ နိပတိတွာ ဘဂဝန္တံ ဧတဒဝေါစုံ – ‘‘အစ္စယော နော၊ ဘန္တေ၊ အစ္စဂမာ ယထာဗာလံ ယထာမူဠှံ ယထာအကုသလံ [ယထာဗာလာ ယထာမူဠှာ ယထာအကုသလာ (သဗ္ဗတ္ထ)]၊ ယာ မယံ ဘဂဝန္တံ အာသာဒေတဗ္ဗံ အမညိမှာ. တာသံ နော၊ ဘန္တေ၊ ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယာ’’တိ. အထ ခေါ ဘဂဝါ သိတံ ပါတွာကာသိ. အထ ခေါ တာ ဒေဝတာယော ဘိယျောသောမတ္တာယ ဥဇ္ဈာယန္တိယော ဝေဟာသံ အဗ္ဘုဂ္ဂဉ္ဆုံ. ဧကာ ဒေဝတာ ဘဂဝတော သန္တိကေ ဣမံ ဂါထံ အဘာသိ –

‘‘အစ္စယံ ဒေသယန္တီနံ၊ ယော စေ န ပဋိဂဏှတိ၊

ကောပန္တရော ဒေါသဂရု၊ သ ဝေရံ ပဋိမုဉ္စတီ’’တိ.

‘‘အစ္စယော စေ န ဝိဇ္ဇေထ၊ နောစိဓာပဂတံ [နောစီဓ အပဟတံ (သျာ. ကံ.)၊ နောစိဓာပကတံ (?)] သိယာ၊

ဝေရာနိ န စ သမ္မေယျုံ၊ ကေနီဓ [ဝေရာနိ စ သမ္မေယျုံ၊ တေနိဓ (သီ.)] ကုသလော သိယာ’’တိ.

‘‘ကဿစ္စယာ န ဝိဇ္ဇန္တိ၊ ကဿ နတ္ထိ အပါဂတံ၊

ကော န သမ္မောဟမာပါဒိ၊ ကော စ ဓီရော [ကောဓ ဓီရော (သျာ. ကံ.)] သဒါ သတော’’တိ.

‘‘တထာဂတဿ ဗုဒ္ဓဿ၊ သဗ္ဗဘူတာနုကမ္ပိနော၊

တဿစ္စယာ န ဝိဇ္ဇန္တိ၊ တဿ နတ္ထိ အပါဂတံ၊

သော န သမ္မောဟမာပါဒိ၊ သောဝ [သောဓ (သျာ. ကံ.)] ဓီရော သဒါ သတော’’တိ.

‘‘အစ္စယံ ဒေသယန္တီနံ၊ ယော စေ န ပဋိဂဏှတိ၊

ကောပန္တရော ဒေါသဂရု၊ သ ဝေရံ ပဋိမုဉ္စတိ၊

တံ ဝေရံ နာဘိနန္ဒာမိ၊ ပဋိဂ္ဂဏှာမိ ဝေါစ္စယ’’န္တိ.