၉. ကုဋိကာသုတ္တံ

၁၉. ‘‘ကစ္စိ တေ ကုဋိကာ နတ္ထိ၊ ကစ္စိ နတ္ထိ ကုလာဝကာ၊

ကစ္စိ သန္တာနကာ နတ္ထိ၊ ကစ္စိ မုတ္တောသိ ဗန္ဓနာ’’တိ.

‘‘တဂ္ဃ မေ ကုဋိကာ နတ္ထိ၊ တဂ္ဃ နတ္ထိ ကုလာဝကာ၊

တဂ္ဃ သန္တာနကာ နတ္ထိ၊ တဂ္ဃ မုတ္တောမှိ ဗန္ဓနာ’’တိ.

‘‘ကိန္တာဟံ ကုဋိကံ ဗြူမိ၊ ကိံ တေ ဗြူမိ ကုလာဝကံ၊

ကိံ တေ သန္တာနကံ ဗြူမိ၊ ကိန္တာဟံ ဗြူမိ ဗန္ဓန’’န္တိ.

‘‘မာတရံ ကုဋိကံ ဗြူသိ၊ ဘရိယံ ဗြူသိ ကုလာဝကံ၊

ပုတ္တေ သန္တာနကေ ဗြူသိ၊ တဏှံ မေ ဗြူသိ ဗန္ဓန’’န္တိ.

‘‘သာဟု တေ ကုဋိကာ နတ္ထိ၊ သာဟု နတ္ထိ ကုလာဝကာ၊

သာဟု သန္တာနကာ နတ္ထိ၊ သာဟု မုတ္တောသိ ဗန္ဓနာ’’တိ.