၈. အမ္ဗဝိမာနဝတ္ထု

၇၈၃. ‘‘ဒိဗ္ဗံ တေ အမ္ဗဝနံ ရမ္မံ၊ ပါသာဒေတ္ထ မဟလ္လကော၊

နာနာတုရိယသင်္ဃုဋ္ဌော၊ အစ္ဆရာဂဏဃောသိတော.

၇၈၄. ‘‘ပဒီပေါ စေတ္ထ ဇလတိ၊ နိစ္စံ သောဝဏ္ဏယော မဟာ၊

ဒုဿဖလေဟိ ရုက္ခေဟိ၊ သမန္တာ ပရိဝါရိတော.

၇၈၅. ‘‘ကေန တေတာဒိသော ဝဏ္ဏော။ပေ။ဝဏ္ဏော စ တေ သဗ္ဗဒိသာ ပဘာသတီ’’တိ၊

၇၈၇. သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ.

၇၈၈. ‘‘အဟံ မနုဿေသု မနုဿဘူတာ၊ ပုရိမာယ ဇာတိယာ မနုဿလောကေ၊

ဝိဟာရံ သံဃဿ ကာရေသိံ၊ အမ္ဗေဟိ ပရိဝါရိတံ.

၇၈၉. ‘‘ပရိယောသိတေ ဝိဟာရေ၊ ကာရေန္တေ နိဋ္ဌိတေ မဟေ၊

အမ္ဗေဟိ ဆာဒယိတွာန [အမ္ဗေ အစ္ဆာဒယိတွာန (သီ. သျာ.)၊ အမ္ဗေဟစ္ဆာဒယိတွာန (ပီ. က.)]၊ ကတွာ ဒုဿမယေ ဖလေ.

၇၉၀. ‘‘ပဒီပံ တတ္ထ ဇာလေတွာ၊ ဘောဇယိတွာ ဂဏုတ္တမံ၊

နိယျာဒေသိံ တံ သံဃဿ၊ ပသန္နာ သေဟိ ပါဏိဘိ.

၇၉၁. ‘‘တေန မေ အမ္ဗဝနံ ရမ္မံ၊ ပါသာဒေတ္ထ မဟလ္လကော၊

နာနာတုရိယသင်္ဃုဋ္ဌော၊ အစ္ဆရာဂဏဃောသိတော.

၇၉၂. ‘‘ပဒီပေါ စေတ္ထ ဇလတိ၊ နိစ္စံ သောဝဏ္ဏယော မဟာ၊

ဒုဿဖလေဟိ ရုက္ခေဟိ၊ သမန္တာ ပရိဝါရိတော.

၇၉၃. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

အမ္ဗဝိမာနံ အဋ္ဌမံ.