၄. မဉ္ဇိဋ္ဌကဝဂ္ဂေါ

၁. မဉ္ဇိဋ္ဌကဝိမာနဝတ္ထု

၆၈၉. ‘‘မဉ္ဇိဋ္ဌကေ [မဉ္ဇေဋ္ဌကေ (သီ.)] ဝိမာနသ္မိံ၊ သောဏ္ဏဝါလုကသန္ထတေ [သောဝဏ္ဏဝါလုကသန္ထတေ (သျာ. ပီ.)၊ သောဝဏ္ဏဝါလိကသန္ထတေ (က.)]၊

ပဉ္စင်္ဂိကေ တုရိယေန [တုရိယေန (သီ. သျာ. ပီ.)]၊ ရမသိ သုပ္ပဝါဒိတေ.

၆၉၀. ‘‘တမှာ ဝိမာနာ ဩရုယှ၊ နိမ္မိတာ ရတနာမယာ၊

ဩဂါဟသိ သာလဝနံ၊ ပုပ္ဖိတံ သဗ္ဗကာလိကံ.

၆၉၁. ‘‘ယဿ ယဿေဝ သာလဿ၊ မူလေ တိဋ္ဌသိ ဒေဝတေ၊

သော သော မုဉ္စတိ ပုပ္ဖါနိ၊ ဩနမိတွာ ဒုမုတ္တမော.

၆၉၂. ‘‘ဝါတေရိတံ သာလဝနံ၊ အာဓုတံ [အာဓူတံ (သီ.)] ဒိဇသေဝိတံ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၆၉၃. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၆၉၄. ‘‘အဟံ မနုဿေသု မနုဿဘူတာ၊ ဒါသီ အယိရကုလေ [အယျိရကုလေ (သျာ. က.)] အဟုံ၊

ဗုဒ္ဓံ နိသိန္နံ ဒိသွာန၊ သာလပုပ္ဖေဟိ ဩကိရိံ.

၆၉၅. ‘‘ဝဋံသကဉ္စ သုကတံ၊ သာလပုပ္ဖမယံ အဟံ၊

ဗုဒ္ဓဿ ဥပနာမေသိံ၊ ပသန္နာ သေဟိ ပါဏိဘိ.

၆၉၆. ‘‘တာဟံ ကမ္မံ ကရိတွာန၊ ကုသလံ ဗုဒ္ဓဝဏ္ဏိတံ၊

အပေတသောကာ သုခိတာ၊ သမ္ပမောဒါမနာမယာ’’တိ.

မဉ္ဇိဋ္ဌကဝိမာနံ ပဌမံ.

၂. ပဘဿရဝိမာနဝတ္ထု

၆၉၇. ‘‘ပဘဿရဝရဝဏ္ဏနိဘေ၊ သုရတ္တဝတ္ထဝသနေ [ဝတ္ထနိဝါသနေ (သီ. သျာ.)]၊

မဟိဒ္ဓိကေ စန္ဒနရုစိရဂတ္တေ၊ ကာ တွံ သုဘေ ဒေဝတေ ဝန္ဒသေ မမံ.

၆၉၈. ‘‘ပလ္လင်္ကော စ တေ မဟဂ္ဃေါ၊ နာနာရတနစိတ္တိတော ရုစိရော၊

ယတ္ထ တွံ နိသိန္နာ ဝိရောစသိ၊ ဒေဝရာဇာရိဝ နန္ဒနေ ဝနေ.

၆၉၉. ‘‘ကိံ တွံ ပုရေ သုစရိတမာစရီ ဘဒ္ဒေ၊ ကိဿ ကမ္မဿ ဝိပါကံ၊

အနုဘောသိ ဒေဝလောကသ္မိံ၊ ဒေဝတေ ပုစ္ဆိတာစိက္ခ၊

ကိဿ ကမ္မဿိဒံ ဖလ’’န္တိ.

၇၀၀. ‘‘ပိဏ္ဍာယ တေ စရန္တဿ၊ မာလံ ဖာဏိတဉ္စ အဒဒံ ဘန္တေ၊

တဿ ကမ္မဿိဒံ ဝိပါကံ၊ အနုဘောမိ ဒေဝလောကသ္မိံ.

၇၀၁. ‘‘ဟောတိ စ မေ အနုတာပေါ၊ အပရဒ္ဓံ [အပရာဓံ (သျာ.)] ဒုက္ခိတဉ္စ [ဒုက္ကဋဉ္စ (သီ.)] မေ ဘန္တေ၊

သာဟံ ဓမ္မံ နာဿောသိံ၊ သုဒေသိတံ ဓမ္မရာဇေန.

၇၀၂. ‘‘တံ တံ ဝဒါမိ ဘဒ္ဒန္တေ၊ ‘ယဿ မေ အနုကမ္ပိယော ကောစိ၊

ဓမ္မေသု တံ သမာဒပေထ’၊ သုဒေသိတံ ဓမ္မရာဇေန.

၇၀၃. ‘‘ယေသံ အတ္ထိ သဒ္ဓါ ဗုဒ္ဓေ၊ ဓမ္မေ စ သင်္ဃရတနေ၊

တေ မံ အတိဝိရောစန္တိ၊ အာယုနာ ယသသာ သိရိယာ.

၇၀၄. ‘‘ပတာပေန ဝဏ္ဏေန ဥတ္တရိတရာ၊

အညေ မဟိဒ္ဓိကတရာ မယာ ဒေဝါ’’တိ၊

ပဘဿရဝိမာနံ ဒုတိယံ.

၃. နာဂဝိမာနဝတ္ထု

၇၀၅. ‘‘အလင်္ကတာ မဏိကဉ္စနာစိတံ၊ သောဝဏ္ဏဇာလစိတံ မဟန္တံ၊

အဘိရုယှ ဂဇဝရံ သုကပ္ပိတံ၊ ဣဓာဂမာ ဝေဟာယသံ [ဝေဟာသယံ (သီ.)] အန္တလိက္ခေ.

၇၀၆. ‘‘နာဂဿ ဒန္တေသု ဒုဝေသု နိမ္မိတာ၊ အစ္ဆောဒကာ [အစ္ဆောဒိကာ (သီ. က.)] ပဒုမိနိယော သုဖုလ္လာ၊

ပဒုမေသု စ တုရိယဂဏာ ပဘိဇ္ဇရေ၊ ဣမာ စ နစ္စန္တိ မနောဟရာယော.

၇၀၇. ‘‘ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၇၀၈. ‘‘ဗာရာဏသိယံ ဥပသင်္ကမိတွာ၊ ဗုဒ္ဓဿဟံ ဝတ္ထယုဂံ အဒါသိံ၊

ပါဒါနိ ဝန္ဒိတွာ [ဝန္ဒိတွ (သီ.)] ဆမာ နိသီဒိံ၊ ဝိတ္တာ စဟံ အဉ္ဇလိကံ အကာသိံ.

၇၀၉. ‘‘ဗုဒ္ဓေါ စ မေ ကဉ္စနသန္နိဘတ္တစော၊ အဒေသယိ သမုဒယဒုက္ခနိစ္စတံ၊

အသင်္ခတံ ဒုက္ခနိရောဓသဿတံ၊ မဂ္ဂံ အဒေသယိ [အဒေသေသိ (သီ.)] ယတော ဝိဇာနိသံ၊

၇၁၀. ‘‘အပ္ပါယုကီ ကာလကတာ တတော စုတာ၊ ဥပပန္နာ တိဒသဂဏံ ယသဿိနီ၊

သက္ကဿဟံ အညတရာ ပဇာပတိ၊ ယသုတ္တရာ နာမ ဒိသာသု ဝိဿုတာ’’တိ.

နာဂဝိမာနံ တတိယံ.

၄. အလောမဝိမာနဝတ္ထု

၇၁၁. ‘‘အဘိက္ကန္တေန ဝဏ္ဏေန၊ ယာ တွံ တိဋ္ဌသိ ဒေဝတေ၊

ဩဘာသေန္တီ ဒိသာ သဗ္ဗာ၊ ဩသဓီ ဝိယ တာရကာ.

၇၁၂. ‘‘ကေန တေတာဒိသော ဝဏ္ဏော။ပေ။

ဝဏ္ဏော စ တေ သဗ္ဗဒိသာ ပဘာသတီ’’တိ.

၇၁၄. သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ.

၇၁၅. ‘‘အဟဉ္စ ဗာရာဏသိယံ၊ ဗုဒ္ဓဿာဒိစ္စဗန္ဓုနော၊

အဒါသိံ သုက္ခကုမ္မာသံ၊ ပသန္နာ သေဟိ ပါဏိဘိ.

၇၁၆. ‘‘သုက္ခာယ အလောဏိကာယ စ၊ ပဿ ဖလံ ကုမ္မာသပိဏ္ဍိယာ၊

အလောမံ သုခိတံ ဒိသွာ၊ ကော ပုညံ န ကရိဿတိ.

၇၁၇. ‘‘တေန မေတာဒိသော ဝဏ္ဏော။ပေ။ ဝဏ္ဏော စ မေ သဗ္ဗဒိသာ ပဘာသတီ’’တိ.

အလောမဝိမာနံ စတုတ္ထံ.

၅. ကဉ္ဇိကဒါယိကာဝိမာနဝတ္ထု

၇၁၉. ‘‘အဘိက္ကန္တေန ဝဏ္ဏေန။ပေ။ ဩသဓီ ဝိယ တာရကာ.

၇၂၀. ‘‘ကေန တေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

၇၂၂. သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ.

၇၂၃. ‘‘အဟံ အန္ဓကဝိန္ဒမှိ၊ ဗုဒ္ဓဿာဒိစ္စဗန္ဓုနော၊

အဒါသိံ ကောလသမ္ပာကံ၊ ကဉ္ဇိကံ တေလဓူပိတံ.

၇၂၄. ‘‘ပိပ္ဖလျာ လသုဏေန စ၊ မိဿံ လာမဉ္ဇကေန စ၊

အဒါသိံ ဥဇုဘူတသ္မိံ [ဥဇုဘူတေသု (က.)]၊ ဝိပ္ပသန္နေန စေတသာ.

၇၂၅. ‘‘ယာ မဟေသိတ္တံ ကာရေယျ၊ စက္ကဝတ္တိဿ ရာဇိနော၊

နာရီ သဗ္ဗင်္ဂကလျာဏီ၊ ဘတ္တု စာနောမဒဿိကာ၊

ဧကဿ ကဉ္ဇိကဒါနဿ၊ ကလံ နာဂ္ဃတိ သောဠသိံ.

၇၂၆. ‘‘သတံ နိက္ခာ သတံ အဿာ၊ သတံ အဿတရီရထာ၊

သတံ ကညာသဟဿာနိ၊ အာမုတ္တမဏိကုဏ္ဍလာ၊

ဧကဿ ကဉ္ဇိကဒါနဿ၊ ကလံ နာဂ္ဃန္တိ သောဠသိံ.

၇၂၇. ‘‘သတံ ဟေမဝတာ နာဂါ၊ ဤသာဒန္တာ ဥရူဠှဝါ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ၊

ဧကဿ ကဉ္ဇိကဒါနဿ၊ ကလံ နာဂ္ဃန္တိ သောဠသိံ.

၇၂၈. ‘‘စတုန္နမပိ ဒီပါနံ၊ ဣဿရံ ယောဓ ကာရယေ၊

ဧကဿ ကဉ္ဇိကဒါနဿ၊ ကလံ နာဂ္ဃတိ သောဠသိ’’န္တိ.

ကဉ္ဇိကဒါယိကာဝိမာနံ ပဉ္စမံ.

၆. ဝိဟာရဝိမာနဝတ္ထု

၇၂၉. ‘‘အဘိက္ကန္တေန ဝဏ္ဏေန။ပေ။ ဩသဓီ ဝိယ တာရကာ.

၇၃၀. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ သဒ္ဒါ နိစ္ဆရန္တိ၊ သဝနီယာ မနောရမာ.

၇၃၁. ‘‘တဿာ တေ နစ္စမာနာယ၊ အင်္ဂမင်္ဂေဟိ သဗ္ဗသော၊

ဒိဗ္ဗာ ဂန္ဓာ ပဝါယန္တိ၊ သုစိဂန္ဓာ မနောရမာ.

၇၃၂. ‘‘ဝိဝတ္တမာနာ ကာယေန၊ ယာ ဝေဏီသု ပိဠန္ဓနာ၊

တေသံ သုယျတိ နိဂ္ဃေါသော၊ တုရိယေ ပဉ္စင်္ဂိကေ ယထာ.

၇၃၃. ‘‘ဝဋံသကာ ဝါတဓုတာ၊ ဝါတေန သမ္ပကမ္ပိတာ၊

တေသံ သုယျတိ နိဂ္ဃေါသော၊ တုရိယေ ပဉ္စင်္ဂိကေ ယထာ.

၇၃၄. ‘‘ယာပိ တေ သိရသ္မိံ မာလာ၊ သုစိဂန္ဓာ မနောရမာ၊

ဝါတိ ဂန္ဓော ဒိသာ သဗ္ဗာ၊ ရုက္ခော မဉ္ဇူသကော ယထာ.

၇၃၅. ‘‘ဃာယသေ တံ သုစိဂန္ဓံ၊ ရူပံ ပဿသိ အမာနုသံ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၇၃၆. ‘‘သာဝတ္ထိယံ မယှံ သခီ ဘဒန္တေ၊ သံဃဿ ကာရေသိ မဟာဝိဟာရံ၊

တတ္ထပ္ပသန္နာ အဟမာနုမောဒိံ၊ ဒိသွာ အဂါရဉ္စ ပိယဉ္စ မေတံ.

၇၃၇. ‘‘တာယေဝ မေ သုဒ္ဓနုမောဒနာယ၊ လဒ္ဓံ ဝိမာနဗ္ဘုတဒဿနေယျံ၊

သမန္တတော သောဠသယောဇနာနိ၊ ဝေဟာယသံ ဂစ္ဆတိ ဣဒ္ဓိယာ မမ.

၇၃၈. ‘‘ကူဋာဂါရာ နိဝေသာ မေ၊ ဝိဘတ္တာ ဘာဂသော မိတာ၊

ဒဒ္ဒလ္လမာနာ အာဘန္တိ၊ သမန္တာ သတယောဇနံ.

၇၃၉. ‘‘ပေါက္ခရညော စ မေ ဧတ္ထ၊ ပုထုလောမနိသေဝိတာ၊

အစ္ဆောဒကာ [အစ္ဆောဒိကာ (သီ.)] ဝိပ္ပသန္နာ၊ သောဏ္ဏဝါလုကသန္ထတာ.

၇၄၀. ‘‘နာနာပဒုမသဉ္ဆန္နာ၊ ပုဏ္ဍရီကသမောတတာ [ပဏ္ဍရီကသမောနတာ (သီ.)]၊

သုရဘီ သမ္ပဝါယန္တိ၊ မနုညာ မာလုတေရိတာ.

၇၄၁. ‘‘ဇမ္ဗုယော ပနသာ တာလာ၊ နာဠိကေရဝနာနိ စ၊

အန္တောနိဝေသနေ ဇာတာ၊ နာနာရုက္ခာ အရောပိမာ.

၇၄၂. ‘‘နာနာတူရိယသင်္ဃုဋ္ဌံ၊ အစ္ဆရာဂဏဃောသိတံ၊

ယောပိ မံ သုပိနေ ပဿေ၊ သောပိ ဝိတ္တော သိယာ နရော.

၇၄၃. ‘‘ဧတာဒိသံ အဗ္ဘုတဒဿနေယျံ၊ ဝိမာနံ သဗ္ဗသောပဘံ၊

မမ ကမ္မေဟိ နိဗ္ဗတ္တံ၊ အလံ ပုညာနိ ကာတဝေ’’တိ.

၇၄၄. ‘‘တာယေဝ တေ သုဒ္ဓနုမောဒနာယ၊ လဒ္ဓံ ဝိမာနဗ္ဘုတဒဿနေယျံ၊

ယာ စေဝ သာ ဒါနမဒါသိ နာရီ၊ တဿာ ဂတိံ ဗြူဟိ ကုဟိံ ဥပ္ပန္နာ [ဥပပန္နာ (က.)] သာ’’တိ.

၇၄၅. ‘‘ယာ သာ အဟု မယှံ သခီ ဘဒန္တေ၊ သံဃဿ ကာရေသိ မဟာဝိဟာရံ၊

ဝိညာတဓမ္မာ သာ အဒါသိ ဒါနံ၊ ဥပ္ပန္နာ နိမ္မာနရတီသု ဒေဝေသု.

၇၄၆. ‘‘ပဇာပတီ တဿ သုနိမ္မိတဿ၊ အစိန္တိယာ ကမ္မဝိပါကာ တဿ၊

ယမေတံ ပုစ္ဆသိ ကုဟိံ ဥပ္ပန္နာ [ဥပပန္နာ (က.)] သာတိ၊ တံ တေ ဝိယာကာသိံ အနညထာ အဟံ.

၇၄၇. ‘‘တေနဟညေပိ သမာဒပေထ၊ သံဃဿ ဒါနာနိ ဒဒါထ ဝိတ္တာ၊

ဓမ္မဉ္စ သုဏာထ ပသန္နမာနသာ၊ သုဒုလ္လဘော လဒ္ဓေါ မနုဿလာဘော.

၇၄၈. ‘‘ယံ မဂ္ဂံ မဂ္ဂါဓိပတီ အဒေသယိ [မဂ္ဂါဓိပတျဒေသယိ (သီ.)]၊ ဗြဟ္မဿရော ကဉ္စနသန္နိဘတ္တစော၊

သံဃဿ ဒါနာနိ ဒဒါထ ဝိတ္တာ၊ မဟပ္ဖလာ ယတ္ထ ဘဝန္တိ ဒက္ခိဏာ.

၇၄၉. [ခု. ပါ. ၆.၆၊ သု. နိ. ၂၂၉] ‘‘ယေ ပုဂ္ဂလာ အဋ္ဌ သတံ ပသတ္ထာ၊ စတ္တာရိ ဧတာနိ ယုဂါနိ ဟောန္တိ၊

တေ ဒက္ခိဏေယျာ သုဂတဿ သာဝကာ၊ ဧတေသု ဒိန္နာနိ မဟပ္ဖလာနိ.

၇၅၀. [ဝိ. ဝ. ၆၄၁] ‘‘စတ္တာရော စ ပဋိပန္နာ၊ စတ္တာရော စ ဖလေ ဌိတာ၊

ဧသ သံဃော ဥဇုဘူတော၊ ပညာသီလသမာဟိတော.

၇၅၁. [ဝိ. ဝ. ၆၄၂] ‘‘ယဇမာနာနံ မနုဿာနံ၊ ပုညပေက္ခာန ပါဏိနံ၊

ကရောတံ ဩပဓိကံ ပုညံ၊ သံဃေ ဒိန္နံ မဟပ္ဖလံ.

၇၅၂. [ဝိ. ဝ. ၆၄၃] ‘‘ဧသော ဟိ သံဃော ဝိပုလော မဟဂ္ဂတော၊ ဧသပ္ပမေယျော ဥဒဓီဝ သာဂရော၊

ဧတေဟိ သေဋ္ဌာ နရဝီရသာဝကာ၊ ပဘင်္ကရာ ဓမ္မမုဒီရယန္တိ [နတ္ထေတ္ထ ပါဌဘေဒေါ].

၇၅၃. [ဝိ. ဝ. ၆၄၄] ‘‘တေသံ သုဒိန္နံ သုဟုတံ သုယိဋ္ဌံ၊ ယေ သံဃမုဒ္ဒိဿ ဒဒန္တိ ဒါနံ၊

သာ ဒက္ခိဏာ သံဃဂတာ ပတိဋ္ဌိတာ၊ မဟပ္ဖလာ လောကဝိဒူန [လောကဝိဒူဟိ (က.)] ဝဏ္ဏိတာ.

၇၅၄. ‘‘ဧတာဒိသံ ယညမနုဿရန္တာ၊ ယေ ဝေဒဇာတာ ဝိစရန္တိ လောကေ၊

ဝိနေယျ မစ္ဆေရမလံ သမူလံ၊ အနိန္ဒိတာ သဂ္ဂမုပေန္တိ ဌာန’’န္တိ.

ဝိဟာရဝိမာနံ ဆဋ္ဌံ.

ဘာဏဝါရံ ဒုတိယံ နိဋ္ဌိတံ.

၇. စတုရိတ္ထိဝိမာနဝတ္ထု

၇၅၅. ‘‘အဘိက္ကန္တေန ဝဏ္ဏေန။ပေ။ဝဏ္ဏော စ တေ သဗ္ဗဒိသာ ပဘာသတီ’’တိ.

၇၅၈. သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ.

၇၅၉. ‘‘ဣန္ဒီဝရာနံ ဟတ္ထကံ အဟမဒါသိံ၊ ဘိက္ခုနော ပိဏ္ဍာယ စရန္တဿ၊

ဧသိကာနံ ဥဏ္ဏတသ္မိံ၊ နဂရဝရေ ပဏ္ဏကတေ ရမ္မေ.

၇၆၀. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိဿာ ပဘာသတီ’’တိ.

၇၆၂. ‘‘အဘိက္ကန္တေန ဝဏ္ဏေန။ပေ။ဝဏ္ဏော စ တေ သဗ္ဗဒိသာ ပဘာသတီ’’တိ.

၇၆၅. သာ ဒေဝတာ အတ္တမနာ။ပေ။ ယဿ ကမ္မဿိဒံ ဖလံ.

၇၆၆. ‘‘နီလုပ္ပလဟတ္ထကံ အဟမဒါသိံ၊ ဘိက္ခုနော ပိဏ္ဍာယ စရန္တဿ၊

ဧသိကာနံ ဥဏ္ဏတသ္မိံ၊ နဂရဝရေ ပဏ္ဏကတေ ရမ္မေ.

၇၆၇. ‘‘တေန မေတာဒိသော ဝဏ္ဏော။ပေ။ဝဏ္ဏော စ မေ သဗ္ဗဒိသာ ပဘာသတီ’’တိ.

၇၆၉. ‘‘အဘိက္ကန္တေန ဝဏ္ဏေန။ပေ။ဝဏ္ဏော စ တေ သဗ္ဗဒိသာ ပဘာသတီ’’တိ.