၉. ပီတဝိမာနဝတ္ထု

၇၉၅. ‘‘ပီတဝတ္ထေ ပီတဓဇေ၊ ပီတာလင်္ကာရဘူသိတေ၊

ပီတစန္ဒနလိတ္တင်္ဂေ၊ ပီတဥပ္ပလမာလိနီ [ပီတုပ္ပလမဓာရိနီ (သျာ. က.)၊ ပီတုပ္ပလမာလိနီ (ပီ.)].

၇၉၆. ‘‘ပီတပါသာဒသယနေ၊ ပီတာသနေ ပီတဘာဇနေ၊

ပီတဆတ္တေ ပီတရထေ၊ ပီတဿေ ပီတဗီဇနေ.

၇၉၇. ‘‘ကိံ ကမ္မမကရီ ဘဒ္ဒေ၊ ပုဗ္ဗေ မာနုသကေ ဘဝေ၊

ဒေဝတေ ပုစ္ဆိတာစိက္ခ၊ ကိဿ ကမ္မဿိဒံ ဖလ’’န္တိ.

၇၉၈. ‘‘ကောသာတကီ နာမ လတတ္ထိ ဘန္တေ၊ တိတ္တိကာ အနဘိစ္ဆိတာ၊

တဿာ စတ္တာရိ ပုပ္ဖါနိ၊ ထူပံ အဘိဟရိံ အဟံ.

၇၉၉. ‘‘သတ္ထု သရီရမုဒ္ဒိဿ၊ ဝိပ္ပသန္နေန စေတသာ၊

နာဿ မဂ္ဂံ အဝေက္ခိဿံ၊ န တဂ္ဂမနသာ [တဒဂ္ဂမနသာ (သီ.)၊ တဒင်္ဂမနသာ (သျာ.)] သတီ.

၈၀၀. ‘‘တတော မံ အဝဓီ ဂါဝီ၊ ထူပံ အပတ္တမာနသံ၊

တဉ္စာဟံ အဘိသဉ္စေယျံ၊ ဘိယျော [ဘီယော (သီ. အဋ္ဌ.)] နူန ဣတော သိယာ.

၈၀၁. ‘‘တေန ကမ္မေန ဒေဝိန္ဒ၊ မဃဝါ ဒေဝကုဉ္ဇရော၊

ပဟာယ မာနုသံ ဒေဟံ၊ တဝ သဟဗျ [သဟဗျတ (သီ. သျာ.)] မာဂတာ’’တိ.

၈၀၂. ဣဒံ သုတွာ တိဒသာဓိပတိ၊ မဃဝါ ဒေဝကုဉ္ဇရော၊

တာဝတိံသေ ပသာဒေန္တော၊ မာတလိံ ဧတဒဗြဝိ [ဧတဒဗြူဝီတိ (သီ.)].

၈၀၃. ‘‘ပဿ မာတလိ အစ္ဆေရံ၊ စိတ္တံ ကမ္မဖလံ ဣဒံ၊

အပ္ပကမ္ပိ ကတံ ဒေယျံ၊ ပုညံ ဟောတိ မဟပ္ဖလံ.

၈၀၄. ‘‘နတ္ထိ စိတ္တေ ပသန္နမှိ၊ အပ္ပကာ နာမ ဒက္ခိဏာ၊

တထာဂတေ ဝါ သမ္ဗုဒ္ဓေ၊ အထ ဝါ တဿ သာဝကေ.

၈၀၅. ‘‘ဧဟိ မာတလိ အမှေပိ၊ ဘိယျော ဘိယျော မဟေမသေ၊

တထာဂတဿ ဓာတုယော၊ သုခေါ ပုညာန မုစ္စယော.

၈၀၆. ‘‘တိဋ္ဌန္တေ နိဗ္ဗုတေ စာပိ၊ သမေ စိတ္တေ သမံ ဖလံ၊

စေတောပဏိဓိဟေတု ဟိ၊ သတ္တာ ဂစ္ဆန္တိ သုဂ္ဂတိံ.

၈၀၇. ‘‘ဗဟူနံ [ဗဟုန္နံ (သီ. သျာ.)] ဝတ အတ္ထာယ၊ ဥပ္ပဇ္ဇန္တိ တထာဂတာ၊

ယတ္ထ ကာရံ ကရိတွာန၊ သဂ္ဂံ ဂစ္ဆန္တိ ဒါယကာ’’တိ.

ပီတဝိမာနံ နဝမံ.