၃. နာဂဝိမာနဝတ္ထု

၇၀၅. ‘‘အလင်္ကတာ မဏိကဉ္စနာစိတံ၊ သောဝဏ္ဏဇာလစိတံ မဟန္တံ၊

အဘိရုယှ ဂဇဝရံ သုကပ္ပိတံ၊ ဣဓာဂမာ ဝေဟာယသံ [ဝေဟာသယံ (သီ.)] အန္တလိက္ခေ.

၇၀၆. ‘‘နာဂဿ ဒန္တေသု ဒုဝေသု နိမ္မိတာ၊ အစ္ဆောဒကာ [အစ္ဆောဒိကာ (သီ. က.)] ပဒုမိနိယော သုဖုလ္လာ၊

ပဒုမေသု စ တုရိယဂဏာ ပဘိဇ္ဇရေ၊ ဣမာ စ နစ္စန္တိ မနောဟရာယော.

၇၀၇. ‘‘ဒေဝိဒ္ဓိပတ္တာသိ မဟာနုဘာဝေ၊ မနုဿဘူတာ ကိမကာသိ ပုညံ၊

ကေနာသိ ဧဝံ ဇလိတာနုဘာဝါ၊ ဝဏ္ဏော စ တေ သဗ္ဗဒိသာ ပဘာသတီ’’တိ.

၇၀၈. ‘‘ဗာရာဏသိယံ ဥပသင်္ကမိတွာ၊ ဗုဒ္ဓဿဟံ ဝတ္ထယုဂံ အဒါသိံ၊

ပါဒါနိ ဝန္ဒိတွာ [ဝန္ဒိတွ (သီ.)] ဆမာ နိသီဒိံ၊ ဝိတ္တာ စဟံ အဉ္ဇလိကံ အကာသိံ.

၇၀၉. ‘‘ဗုဒ္ဓေါ စ မေ ကဉ္စနသန္နိဘတ္တစော၊ အဒေသယိ သမုဒယဒုက္ခနိစ္စတံ၊

အသင်္ခတံ ဒုက္ခနိရောဓသဿတံ၊ မဂ္ဂံ အဒေသယိ [အဒေသေသိ (သီ.)] ယတော ဝိဇာနိသံ၊

၇၁၀. ‘‘အပ္ပါယုကီ ကာလကတာ တတော စုတာ၊ ဥပပန္နာ တိဒသဂဏံ ယသဿိနီ၊

သက္ကဿဟံ အညတရာ ပဇာပတိ၊ ယသုတ္တရာ နာမ ဒိသာသု ဝိဿုတာ’’တိ.

နာဂဝိမာနံ တတိယံ.