၅. အနောပမာထေရီဂါထာ

၁၅၁. ‘‘ဥစ္စေ ကုလေ အဟံ ဇာတာ၊ ဗဟုဝိတ္တေ မဟဒ္ဓနေ၊

ဝဏ္ဏရူပေန သမ္ပန္နာ၊ ဓီတာ မဇ္ဈဿ [မေဃဿ (သီ.)၊ မေဃိဿ (သျာ.)] အတြဇာ.

၁၅၂. ‘‘ပတ္ထိတာ ရာဇပုတ္တေဟိ၊ သေဋ္ဌိပုတ္တေဟိ ဂိဇ္ဈိတာ [သေဋ္ဌိပုတ္တေဟိ ဘိဇ္ဈိတာ (သီ.)]၊

ပိတု မေ ပေသယီ ဒူတံ၊ ဒေထ မယှံ အနောပမံ.

၁၅၃. ‘‘ယတ္တကံ တုလိတာ ဧသာ၊ တုယှံ ဓီတာ အနောပမာ၊

တတော အဋ္ဌဂုဏံ ဒဿံ၊ ဟိရညံ ရတနာနိ စ.

၁၅၄. ‘‘သာဟံ ဒိသွာန သမ္ဗုဒ္ဓံ၊ လောကဇေဋ္ဌံ အနုတ္တရံ၊

တဿ ပါဒါနိ ဝန္ဒိတွာ၊ ဧကမန္တံ ဥပါဝိသိံ.

၁၅၅. ‘‘သော မေ ဓမ္မမဒေသေသိ၊ အနုကမ္ပာယ ဂေါတမော၊

နိသိန္နာ အာသနေ တသ္မိံ၊ ဖုသယိံ တတိယံ ဖလံ.

၁၅၆. ‘‘တတော ကေသာနိ ဆေတွာန၊ ပဗ္ဗဇိံ အနဂါရိယံ၊

အဇ္ဇ မေ သတ္တမီ ရတ္တိ၊ ယတော တဏှာ ဝိသောသိတာ’’တိ.

။ အနောပမာ ထေရီ။.