၆. မဟာပဇာပတိဂေါတမီထေရီဂါထာ

၁၅၇. ‘‘ဗုဒ္ဓ ဝီရ နမော တျတ္ထု၊ သဗ္ဗသတ္တာနမုတ္တမ၊

ယော မံ ဒုက္ခာ ပမောစေသိ၊ အညဉ္စ ဗဟုကံ ဇနံ.

၁၅၈. ‘‘သဗ္ဗဒုက္ခံ ပရိညာတံ၊ ဟေတုတဏှာ ဝိသောသိတာ၊

ဘာဝိတော အဋ္ဌင်္ဂိကော [အရိယဋ္ဌင်္ဂိကော (သီ. က.)၊ ဘာဝိတဋ္ဌင်္ဂိကော (သျာ.)] မဂ္ဂေါ၊ နိရောဓော ဖုသိတော မယာ.

၁၅၉. ‘‘မာတာ ပုတ္တော ပိတာ ဘာတာ၊ အယျကာ စ ပုရေ အဟုံ၊

ယထာဘုစ္စမဇာနန္တီ၊ သံသရိံဟံ အနိဗ္ဗိသံ.

၁၆၀. ‘‘ဒိဋ္ဌော ဟိ မေ သော ဘဂဝါ၊ အန္တိမောယံ သမုဿယော၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ.

၁၆၁. ‘‘အာရဒ္ဓဝီရိယေ ပဟိတတ္တေ၊ နိစ္စံ ဒဠှပရက္ကမေ၊

သမဂ္ဂေ သာဝကေ ပဿေ၊ ဧသာ ဗုဒ္ဓါန ဝန္ဒနာ.

၁၆၂. ‘‘ဗဟူနံ [ဗဟုန္နံ (သီ. သျာ.)] ဝတ အတ္ထာယ၊ မာယာ ဇနယိ ဂေါတမံ၊

ဗျာဓိမရဏတုန္နာနံ၊ ဒုက္ခက္ခန္ဓံ ဗျပါနုဒီ’’တိ.

။ မဟာပဇာပတိဂေါတမီ ထေရီ။.