၉. တောဒေယျမာဏဝပုစ္ဆာ
၁၀၉၄. ‘‘ယသ္မိံ ကာမာ န ဝသန္တိ၊ (ဣစ္စာယသ္မာ တောဒေယျော)
တဏှာ ယဿ န ဝိဇ္ဇတိ၊
ကထံကထာ စ ယော တိဏ္ဏော၊ ဝိမောက္ခော တဿ ကီဒိသော’’.
၁၀၉၅. ‘‘ယသ္မိံ ကာမာ န ဝသန္တိ၊ (တောဒေယျာတိ ဘဂဝါ)
တဏှာ ယဿ န ဝိဇ္ဇတိ၊
ကထံကထာ စ ယော တိဏ္ဏော၊ ဝိမောက္ခော တဿ နာပရော’’.
၁၀၉၆. ‘‘နိရာသသော သော ဥဒ အာသသာနော၊ ပညာဏဝါ သော ဥဒ ပညကပ္ပီ၊
မုနိံ အဟံ သက္က ယထာ ဝိဇညံ၊ တံ မေ ဝိယာစိက္ခ သမန္တစက္ခု’’.
၁၀၉၇. ‘‘နိရာသသော သော န စ အာသသာနော၊ ပညာဏဝါ သော န စ ပညကပ္ပီ၊
ဧဝမ္ပိ တောဒေယျ မုနိံ ဝိဇာန၊ အကိဉ္စနံ ကာမဘဝေ အသတ္တ’’န္တိ.
တောဒေယျမာဏဝပုစ္ဆာ နဝမာ နိဋ္ဌိတာ.