၅. ပါရာယနဝဂ္ဂေါ

ဝတ္ထုဂါထာ

၉၈၂. ကောသလာနံ ပုရာ ရမ္မာ၊ အဂမာ ဒက္ခိဏာပထံ၊

အာကိဉ္စညံ ပတ္ထယာနော၊ ဗြာဟ္မဏော မန္တပါရဂူ.

၉၈၃. သော အဿကဿ ဝိသယေ၊ အဠကဿ [မုဠကဿ (သျာ.)၊ မူဠှကဿ (က.)၊ မဠကဿ (နိဒ္ဒေသ)] သမာသနေ၊

ဝသိ ဂေါဓာဝရီကူလေ၊ ဥဉ္ဆေန စ ဖလေန စ.

၉၈၄. တဿေဝ ဥပနိဿာယ၊ ဂါမော စ ဝိပုလော အဟု၊

တတော ဇာတေန အာယေန၊ မဟာယညမကပ္ပယိ.

၉၈၅. မဟာယညံ ယဇိတွာန၊ ပုန ပါဝိသိ အဿမံ၊

တသ္မိံ ပဋိပဝိဋ္ဌမှိ၊ အညော အာဂဉ္ဆိ ဗြာဟ္မဏော.

၉၈၆. ဥဂ္ဃဋ္ဋပါဒေါ တသိတော [တဿိတော (က.)]၊ ပင်္ကဒန္တော ရဇဿိရော၊

သော စ နံ ဥပသင်္ကမ္မ၊ သတာနိ ပဉ္စ ယာစတိ.

၉၈၇. တမေနံ ဗာဝရီ ဒိသွာ၊ အာသနေန နိမန္တယိ၊

သုခဉ္စ ကုသလံ ပုစ္ဆိ၊ ဣဒံ ဝစနမဗြဝိ.

၉၈၈. ‘‘ယံ ခေါ မမ ဒေယျဓမ္မံ၊ သဗ္ဗံ ဝိသဇ္ဇိတံ မယာ၊

အနုဇာနာဟိ မေ ဗြဟ္မေ၊ နတ္ထိ ပဉ္စသတာနိ မေ’’.

၉၈၉. ‘‘သစေ မေ ယာစမာနဿ၊ ဘဝံ နာနုပဒဿတိ၊

သတ္တမေ ဒိဝသေ တုယှံ၊ မုဒ္ဓါ ဖလတု သတ္တဓာ’’.

၉၉၀. အဘိသင်္ခရိတွာ ကုဟကော၊ ဘေရဝံ သော အကိတ္တယိ၊

တဿ တံ ဝစနံ သုတွာ၊ ဗာဝရီ ဒုက္ခိတော အဟု.

၉၉၁. ဥဿုဿတိ အနာဟာရော၊ သောကသလ္လသမပ္ပိတော၊

အထောပိ ဧဝံ စိတ္တဿ၊ ဈာနေ န ရမတီ မနော.

၉၉၂. ဥတြသ္တံ ဒုက္ခိတံ ဒိသွာ၊ ဒေဝတာ အတ္ထကာမိနီ၊

ဗာဝရိံ ဥပသင်္ကမ္မ၊ ဣဒံ ဝစနမဗြဝိ.

၉၉၃. ‘‘န သော မုဒ္ဓံ ပဇာနာတိ၊ ကုဟကော သော ဓနတ္ထိကော၊

မုဒ္ဓနိ မုဒ္ဓပါတေ ဝါ၊ ဉာဏံ တဿ န ဝိဇ္ဇတိ’’.

၉၉၄. ‘‘ဘောတီ စရဟိ ဇာနာသိ၊ တံ မေ အက္ခာဟိ ပုစ္ဆိတာ၊

မုဒ္ဓံ မုဒ္ဓါဓိပါတဉ္စ၊ တံ သုဏောမ ဝစော တဝ’’.

၉၉၅. ‘‘အဟမ္ပေတံ န ဇာနာမိ၊ ဉာဏမေတ္ထ န ဝိဇ္ဇတိ၊

မုဒ္ဓနိ မုဒ္ဓါဓိပါတေ စ၊ ဇိနာနံ ဟေတ္ထ [မုဒ္ဓံ မုဒ္ဓါဓိပါတော စ၊ ဇိနာနံ ဟေတ (သီ. သျာ. ပီ.)] ဒဿနံ’’.

၉၉၆. ‘‘အထ ကော စရဟိ ဇာနာတိ၊ အသ္မိံ ပထဝိမဏ္ဍလေ [ပုထဝိမဏ္ဍလေ (သီ. ပီ.)]၊

မုဒ္ဓံ မုဒ္ဓါဓိပါတဉ္စ၊ တံ မေ အက္ခာဟိ ဒေဝတေ’’.

၉၉၇. ‘‘ပုရာ ကပိလဝတ္ထုမှာ၊ နိက္ခန္တော လောကနာယကော၊

အပစ္စော ဩက္ကာကရာဇဿ၊ သကျပုတ္တော ပဘင်္ကရော.

၉၉၈. ‘‘သော ဟိ ဗြာဟ္မဏ သမ္ဗုဒ္ဓေါ၊ သဗ္ဗဓမ္မာန ပါရဂူ၊

သဗ္ဗာဘိညာဗလပ္ပတ္တော၊ သဗ္ဗဓမ္မေသု စက္ခုမာ၊

သဗ္ဗကမ္မက္ခယံ ပတ္တော၊ ဝိမုတ္တော ဥပဓိက္ခယေ.

၉၉၉. ‘‘ဗုဒ္ဓေါ သော ဘဂဝါ လောကေ၊ ဓမ္မံ ဒေသေတိ စက္ခုမာ၊

တံ တွံ ဂန္တွာန ပုစ္ဆဿု၊ သော တေ တံ ဗျာကရိဿတိ’’.

၁၀၀၀. သမ္ဗုဒ္ဓေါတိ ဝစော သုတွာ၊ ဥဒဂ္ဂေါ ဗာဝရီ အဟု၊

သောကဿ တနုကော အာသိ၊ ပီတိဉ္စ ဝိပုလံ လဘိ.

၁၀၀၁. သော ဗာဝရီ အတ္တမနော ဥဒဂ္ဂေါ၊ တံ ဒေဝတံ ပုစ္ဆတိ ဝေဒဇာတော၊

‘‘ကတမမှိ ဂါမေ နိဂမမှိ ဝါ ပန၊ ကတမမှိ ဝါ ဇနပဒေ လောကနာထော၊

ယတ္ထ ဂန္တွာန ပဿေမု [ဂန္တွာ နမဿေမု (သီ. သျာ. ပီ.)]၊ သမ္ဗုဒ္ဓံ ဒွိပဒုတ္တမံ’’ [ဒွိပဒုတ္တမံ (သီ. သျာ. ပီ.)]၊.

၁၀၀၂. ‘‘သာဝတ္ထိယံ ကောသလမန္ဒိရေ ဇိနော၊ ပဟူတပညော ဝရဘူရိမေဓသော၊

သော သကျပုတ္တော ဝိဓုရော အနာသဝေါ၊ မုဒ္ဓါဓိပါတဿ ဝိဒူ နရာသဘော’’.

၁၀၀၃. တတော အာမန္တယီ သိဿေ၊ ဗြာဟ္မဏေ မန္တပါရဂေ၊

‘‘ဧထ မာဏဝါ အက္ခိဿံ၊ သုဏာထ ဝစနံ မမ.

၁၀၀၄. ‘‘ယဿေသော ဒုလ္လဘော လောကေ၊ ပါတုဘာဝေါ အဘိဏှသော၊

သွာဇ္ဇ လောကမှိ ဥပ္ပန္နော၊ သမ္ဗုဒ္ဓေါ ဣတိ ဝိဿုတော၊

ခိပ္ပံ ဂန္တွာန သာဝတ္ထိံ၊ ပဿဝှေါ ဒွိပဒုတ္တမံ’’.

၁၀၀၅. ‘‘ကထံ စရဟိ ဇာနေမု၊ ဒိသွာ ဗုဒ္ဓေါတိ ဗြာဟ္မဏ၊

အဇာနတံ နော ပဗြူဟိ၊ ယထာ ဇာနေမု တံ မယံ’’.

၁၀၀၆. ‘‘အာဂတာနိ ဟိ မန္တေသု၊ မဟာပုရိသလက္ခဏာ၊

ဒွတ္တိံသာနိ စ [ဒွိတ္တိံသာ စ (သီ. သျာ. ပီ.)၊ ဒွိတ္တိံသ တာနိ (?)] ဗျာက္ခာတာ၊ သမတ္တာ အနုပုဗ္ဗသော.

၁၀၀၇. ‘‘ယဿေတေ ဟောန္တိ ဂတ္တေသု၊ မဟာပုရိသလက္ခဏာ၊

ဒွေယေဝ တဿ ဂတိယော၊ တတိယာ ဟိ န ဝိဇ္ဇတိ.

၁၀၀၈. ‘‘သစေ အဂါရံ အာဝသတိ [အဇ္ဈာဝသတိ (က.)]၊ ဝိဇေယျ ပထဝိံ ဣမံ၊

အဒဏ္ဍေန အသတ္ထေန၊ ဓမ္မေနမနုသာသတိ.

၁၀၀၉. ‘‘သစေ စ သော ပဗ္ဗဇတိ၊ အဂါရာ အနဂါရိယံ၊

ဝိဝဋ္ဋစ္ဆဒေါ [ဝိဝတ္တဆဒ္ဒေါ (သီ.)] သမ္ဗုဒ္ဓေါ၊ အရဟာ ဘဝတိ အနုတ္တရော.

၁၀၁၀. ‘‘ဇာတိံ ဂေါတ္တဉ္စ လက္ခဏံ၊ မန္တေ သိဿေ ပုနာပရေ၊

မုဒ္ဓံ မုဒ္ဓါဓိပါတဉ္စ၊ မနသာယေဝ ပုစ္ဆထ.

၁၀၁၁. ‘‘အနာဝရဏဒဿာဝီ၊ ယဒိ ဗုဒ္ဓေါ ဘဝိဿတိ၊

မနသာ ပုစ္ဆိတေ ပဉှေ၊ ဝါစာယ ဝိဿဇေဿတိ’’.

၁၀၁၂. ဗာဝရိဿ ဝစော သုတွာ၊ သိဿာ သောဠသ ဗြာဟ္မဏာ၊

အဇိတော တိဿမေတ္တေယျော၊ ပုဏ္ဏကော အထ မေတ္တဂူ.

၁၀၁၃. ဓောတကော ဥပသီဝေါ စ၊ နန္ဒော စ အထ ဟေမကော၊

တောဒေယျကပ္ပါ ဒုဘယော၊ ဇတုကဏ္ဏီ စ ပဏ္ဍိတော.

၁၀၁၄. ဘဒြာဝုဓော ဥဒယော စ၊ ပေါသာလော စာပိ ဗြာဟ္မဏော၊

မောဃရာဇာ စ မေဓာဝီ၊ ပိင်္ဂိယော စ မဟာဣသိ.

၁၀၁၅. ပစ္စေကဂဏိနော သဗ္ဗေ၊ သဗ္ဗလောကဿ ဝိဿုတာ၊

ဈာယီ ဈာနရတာ ဓီရာ၊ ပုဗ္ဗဝါသနဝါသိတာ.

၁၀၁၆. ဗာဝရိံ အဘိဝါဒေတွာ၊ ကတွာ စ နံ ပဒက္ခိဏံ၊

ဇဋာဇိနဓရာ သဗ္ဗေ၊ ပက္ကာမုံ ဥတ္တရာမုခါ.

၁၀၁၇. အဠကဿ ပတိဋ္ဌာနံ၊ ပုရိမာဟိဿတိံ [ပုရိမံ မာဟိဿတိံ (သီ. ပီ.)၊ ပုရံ မာဟိဿတိံ (သျာ.)] တဒါ၊

ဥဇ္ဇေနိဉ္စာပိ ဂေါနဒ္ဓံ၊ ဝေဒိသံ ဝနသဝှယံ.

၁၀၁၈. ကောသမ္ဗိဉ္စာပိ သာကေတံ၊ သာဝတ္ထိဉ္စ ပုရုတ္တမံ၊

သေတဗျံ ကပိလဝတ္ထုံ၊ ကုသိနာရဉ္စ မန္ဒိရံ.

၁၀၁၉. ပါဝဉ္စ ဘောဂနဂရံ၊ ဝေသာလိံ မာဂဓံ ပုရံ၊

ပါသာဏကံ စေတိယဉ္စ၊ ရမဏီယံ မနောရမံ.

၁၀၂၀. တသိတောဝုဒကံ သီတံ၊ မဟာလာဘံဝ ဝါဏိဇော၊

ဆာယံ ဃမ္မာဘိတတ္တောဝ၊ တုရိတာ ပဗ္ဗတမာရုဟုံ.

၁၀၂၁. ဘဂဝါ တမှိ သမယေ၊ ဘိက္ခုသံဃပုရက္ခတော၊

ဘိက္ခူနံ ဓမ္မံ ဒေသေတိ၊ သီဟောဝ နဒတီ ဝနေ.

၁၀၂၂. အဇိတော အဒ္ဒသ ဗုဒ္ဓံ၊ သတရံသိံ [ဝီတရံသိံဝ (သျာ.)၊ သတရံသီဝ (က.)၊ ပီတရံသီဝ (နိဒ္ဒေသ)] ဝ ဘာဏုမံ၊

စန္ဒံ ယထာ ပန္နရသေ၊ ပါရိပူရိံ ဥပါဂတံ.

၁၀၂၃. အထဿ ဂတ္တေ ဒိသွာန၊ ပရိပူရဉ္စ ဗျဉ္ဇနံ၊

ဧကမန္တံ ဌိတော ဟဋ္ဌော၊ မနောပဉှေ အပုစ္ဆထ.

၁၀၂၄. ‘‘အာဒိဿ ဇမ္မနံ [ဇပ္ပနံ (က.)] ဗြူဟိ၊ ဂေါတ္တံ ဗြူဟိ သလက္ခဏံ [ဗြူဟိဿ လက္ခဏံ (နိဒ္ဒေသ)]၊

မန္တေသု ပါရမိံ ဗြူဟိ၊ ကတိ ဝါစေတိ ဗြာဟ္မဏော’’.

၁၀၂၅. ‘‘ဝီသံ ဝဿသတံ အာယု၊ သော စ ဂေါတ္တေန ဗာဝရီ၊

တီဏိဿ လက္ခဏာ ဂတ္တေ၊ တိဏ္ဏံ ဝေဒါန ပါရဂူ.

၁၀၂၆. ‘‘လက္ခဏေ ဣတိဟာသေ စ၊ သနိဃဏ္ဍုသကေဋုဘေ၊

ပဉ္စသတာနိ ဝါစေတိ၊ သဓမ္မေ ပါရမိံ ဂတော’’.

၁၀၂၇. ‘‘လက္ခဏာနံ ပဝိစယံ၊ ဗာဝရိဿ နရုတ္တမ၊

ကင်္ခစ္ဆိဒ [တဏှစ္ဆိဒ (ဗဟူသု)] ပကာသေဟိ၊ မာ နော ကင်္ခါယိတံ အဟု’’.

၁၀၂၈. ‘‘မုခံ ဇိဝှါယ ဆာဒေတိ၊ ဥဏ္ဏဿ ဘမုကန္တရေ၊

ကောသောဟိတံ ဝတ္ထဂုယှံ၊ ဧဝံ ဇာနာဟိ မာဏဝ’’.

၁၀၂၉. ပုစ္ဆဉှိ ကိဉ္စိ အသုဏန္တော၊ သုတွာ ပဉှေ ဝိယာကတေ၊

ဝိစိန္တေတိ ဇနော သဗ္ဗော၊ ဝေဒဇာတော ကတဉ္ဇလီ.

၁၀၃၀. ‘‘ကော နု ဒေဝေါ ဝါ ဗြဟ္မာ ဝါ၊ ဣန္ဒော ဝါပိ သုဇမ္ပတိ၊

မနသာ ပုစ္ဆိတေ ပဉှေ၊ ကမေတံ ပဋိဘာသတိ.

၁၀၃၁. ‘‘မုဒ္ဓံ မုဒ္ဓါဓိပါတဉ္စ၊ ဗာဝရီ ပရိပုစ္ဆတိ၊

တံ ဗျာကရောဟိ ဘဂဝါ၊ ကင်္ခံ ဝိနယ နော ဣသေ’’.

၁၀၃၂. ‘‘အဝိဇ္ဇာ မုဒ္ဓါတိ ဇာနာဟိ၊ ဝိဇ္ဇာ မုဒ္ဓါဓိပါတိနီ၊

သဒ္ဓါသတိသမာဓီဟိ၊ ဆန္ဒဝီရိယေန သံယုတာ’’.

၁၀၃၃. တတော ဝေဒေန မဟတာ၊ သန္ထမ္ဘိတွာန မာဏဝေါ၊

ဧကံသံ အဇိနံ ကတွာ၊ ပါဒေသု သိရသာ ပတိ.

၁၀၃၄. ‘‘ဗာဝရီ ဗြာဟ္မဏော ဘောတော၊ သဟ သိဿေဟိ မာရိသ၊

ဥဒဂ္ဂစိတ္တော သုမနော၊ ပါဒေ ဝန္ဒတိ စက္ခုမ’’.

၁၀၃၅. ‘‘သုခိတော ဗာဝရီ ဟောတု၊ သဟ သိဿေဟိ ဗြာဟ္မဏော၊

တွဉ္စာပိ သုခိတော ဟောဟိ၊ စိရံ ဇီဝါဟိ မာဏဝ.

၁၀၃၆. ‘‘ဗာဝရိဿ စ တုယှံ ဝါ၊ သဗ္ဗေသံ သဗ္ဗသံသယံ၊

ကတာဝကာသာ ပုစ္ဆဝှေါ၊ ယံ ကိဉ္စိ မနသိစ္ဆထ’’.

၁၀၃၇. သမ္ဗုဒ္ဓေန ကတောကာသော၊ နိသီဒိတွာန ပဉ္ဇလီ၊

အဇိတော ပဌမံ ပဉှံ၊ တတ္ထ ပုစ္ဆိ တထာဂတံ.

ဝတ္ထုဂါထာ နိဋ္ဌိတာ.

၁. အဇိတမာဏဝပုစ္ဆာ

၁၀၃၈. ‘‘ကေနဿု နိဝုတော လောကော၊ (ဣစ္စာယသ္မာ အဇိတော)

ကေနဿု နပ္ပကာသတိ၊

ကိဿာဘိလေပနံ ဗြူသိ၊ ကိံသု တဿ မဟဗ္ဘယံ’’.

၁၀၃၉. ‘‘အဝိဇ္ဇာယ နိဝုတော လောကော၊ (အဇိတာတိ ဘဂဝါ)

ဝေဝိစ္ဆာ ပမာဒါ နပ္ပကာသတိ၊

ဇပ္ပါဘိလေပနံ ဗြူမိ၊ ဒုက္ခမဿ မဟဗ္ဘယံ’’.

၁၀၄၀. ‘‘သဝန္တိ သဗ္ဗဓိ သောတာ၊ (ဣစ္စာယသ္မာ အဇိတော)

သောတာနံ ကိံ နိဝါရဏံ၊

သောတာနံ သံဝရံ ဗြူဟိ၊ ကေန သောတာ ပိဓိယျရေ’’ [ပိထိယျရေ (သီ. သျာ. ပီ.)၊ ပိထီယရေ (သီ. အဋ္ဌ.)၊ ပိဓီယရေ (?)].

၁၀၄၁. ‘‘ယာနိ သောတာနိ လောကသ္မိံ၊ (အဇိတာတိ ဘဂဝါ)

သတိ တေသံ နိဝါရဏံ၊

သောတာနံ သံဝရံ ဗြူမိ၊ ပညာယေတေ ပိဓိယျရေ’’.

၁၀၄၂. ‘‘ပညာ စေဝ သတိ ယဉ္စ [သတီ စေဝ (သီ.)၊ သတီ စ (သျာ.)၊ သတီ စာပိ (ပီ. နိဒ္ဒေသ)၊ သတိ စာပိ (နိဒ္ဒေသ)]၊ (ဣစ္စာယသ္မာ အဇိတော)

နာမရူပဉ္စ မာရိသ၊

ဧတံ မေ ပုဋ္ဌော ပဗြူဟိ၊ ကတ္ထေတံ ဥပရုဇ္ဈတိ’’.

၁၀၄၃. ‘‘ယမေတံ ပဉှံ အပုစ္ဆိ၊ အဇိတ တံ ဝဒါမိ တေ၊

ယတ္ထ နာမဉ္စ ရူပဉ္စ၊ အသေသံ ဥပရုဇ္ဈတိ၊

ဝိညာဏဿ နိရောဓေန၊ ဧတ္ထေတံ ဥပရုဇ္ဈတိ’’.

၁၀၄၄. ‘‘ယေ စ သင်္ခါတဓမ္မာသေ၊ ယေ စ သေခါ ပုထူ ဣဓ၊

တေသံ မေ နိပကော ဣရိယံ၊ ပုဋ္ဌော ပဗြူဟိ မာရိသ’’.

၁၀၄၅. ‘‘ကာမေသု နာဘိဂိဇ္ဈေယျ၊ မနသာနာဝိလော သိယာ၊

ကုသလော သဗ္ဗဓမ္မာနံ၊ သတော ဘိက္ခု ပရိဗ္ဗဇေ’’တိ.

အဇိတမာဏဝပုစ္ဆာ ပဌမာ နိဋ္ဌိတာ.

၂. တိဿမေတ္တေယျမာဏဝပုစ္ဆာ

၁၀၄၆. ‘‘ကောဓ သန္တုသိတော လောကေ၊ (ဣစ္စာယသ္မာ တိဿမေတ္တေယျော)

ကဿ နော သန္တိ ဣဉ္ဇိတာ၊

ကော ဥဘန္တမဘိညာယ၊ မဇ္ဈေ မန္တာ န လိပ္ပတိ [လိမ္ပတိ (က.)]၊

ကံ ဗြူသိ မဟာပုရိသောတိ၊ ကော ဣဓ သိဗ္ဗိနိမစ္စဂါ’’.

၁၀၄၇. ‘‘ကာမေသု ဗြဟ္မစရိယဝါ၊ (မေတ္တေယျာတိ ဘဂဝါ)

ဝီတတဏှော သဒါ သတော၊

သင်္ခါယ နိဗ္ဗုတော ဘိက္ခု၊ တဿ နော သန္တိ ဣဉ္ဇိတာ.