၁၀. ကပ္ပမာဏဝပုစ္ဆာ

၁၀၉၈. ‘‘မဇ္ဈေ သရသ္မိံ တိဋ္ဌတံ၊ (ဣစ္စာယသ္မာ ကပ္ပေါ)

ဩဃေ ဇာတေ မဟဗ္ဘယေ၊

ဇရာမစ္စုပရေတာနံ၊ ဒီပံ ပဗြူဟိ မာရိသ၊

တွဉ္စ မေ ဒီပမက္ခာဟိ၊ ယထာယိဒံ နာပရံ သိယာ’’.

၁၀၉၉. ‘‘မဇ္ဈေ သရသ္မိံ တိဋ္ဌတံ၊ (ကပ္ပါတိ ဘဂဝါ)

ဩဃေ ဇာတေ မဟဗ္ဘယေ၊

ဇရာမစ္စုပရေတာနံ၊ ဒီပံ ပဗြူမိ ကပ္ပ တေ.

၁၁၀၀. ‘‘အကိဉ္စနံ အနာဒါနံ၊ ဧတံ ဒီပံ အနာပရံ၊

နိဗ္ဗာနံ ဣတိ [နိဗ္ဗာနမီတိ (သီ.)] နံ ဗြူမိ၊ ဇရာမစ္စုပရိက္ခယံ.

၁၁၀၁. ‘‘ဧတဒညာယ ယေ သတာ၊ ဒိဋ္ဌဓမ္မာဘိနိဗ္ဗုတာ၊

န တေ မာရဝသာနုဂါ၊ န တေ မာရဿ ပဒ္ဓဂူ’’တိ [ပဋ္ဌဂူတိ (သျာ. က.)].

ကပ္ပမာဏဝပုစ္ဆာ ဒသမာ နိဋ္ဌိတာ.