၈. ဒုတိယမိဂလုဒ္ဒကပေတဝတ္ထု

၄၈၈. ‘‘ကူဋာဂါရေ စ ပါသာဒေ၊ ပလ္လင်္ကေ ဂေါနကတ္ထတေ၊

ပဉ္စင်္ဂိကေန တုရိယေန၊ ရမသိ သုပ္ပဝါဒိတေ.

၄၈၉. ‘‘တတော ရတျာ ဝိဝသာနေ [ဝျဝသာနေ (သီ.)]၊ သူရိယုဂ္ဂမနံ ပတိ၊

အပဝိဒ္ဓေါ သုသာနသ္မိံ၊ ဗဟုဒုက္ခံ နိဂစ္ဆသိ.

၄၉၀. ‘‘ကိံ နု ကာယေန ဝါစာယ၊ မနသာ ဒုက္ကဋံ ကတံ၊

ကိဿ ကမ္မဝိပါကေန၊ ဣဒံ ဒုက္ခံ နိဂစ္ဆသိ’’.

၄၉၁. ‘‘အဟံ ရာဇဂဟေ ရမ္မေ၊ ရမဏီယေ ဂိရိဗ္ဗဇေ၊

မိဂလုဒ္ဒေါ ပုရေ အာသိံ၊ လုဒ္ဒေါ စာသိမသညတော.

၄၉၂. ‘‘တဿ မေ သဟာယော သုဟဒယော၊ သဒ္ဓေါ အာသိ ဥပါသကော၊

တဿ ကုလုပကော ဘိက္ခု၊ အာသိ ဂေါတမသာဝကော၊

သောပိ မံ အနုကမ္ပန္တော၊ နိဝါရေသိ ပုနပ္ပုနံ.

၄၉၃. ‘‘‘မာကာသိ ပါပကံ ကမ္မံ၊ မာ တာတ ဒုဂ္ဂတိံ အဂါ၊

သစေ ဣစ္ဆသိ ပေစ္စ သုခံ၊ ဝိရမ ပါဏဝဓာ အသံယမာ’.

၄၉၄. ‘‘တဿာဟံ ဝစနံ သုတွာ၊ သုခကာမဿ ဟိတာနုကမ္ပိနော၊

နာကာသိံ သကလာနုသာသနိံ၊ စိရပါပါဘိရတော အဗုဒ္ဓိမာ.

၄၉၅. ‘‘သော မံ ပုန ဘူရိသုမေဓသော၊ အနုကမ္ပာယ သံယမေ နိဝေသယိ၊

‘သစေ ဒိဝါ ဟနသိ ပါဏိနော၊ အထ တေ ရတ္တိံ ဘဝတု သံယမော’.

၄၉၆. ‘‘သွာဟံ ဒိဝါ ဟနိတွာ ပါဏိနော၊ ဝိရတော ရတ္တိမဟောသိ သညတော၊

ရတ္တာဟံ ပရိစာရေမိ၊ ဒိဝါ ခဇ္ဇာမိ ဒုဂ္ဂတော.

၄၉၇. ‘‘တဿ ကမ္မဿ ကုသလဿ၊ အနုဘောမိ ရတ္တိံ အမာနုသိံ၊

ဒိဝါ ပဋိဟတာဝ ကုက္ကုရာ၊ ဥပဓာဝန္တိ သမန္တာ ခါဒိတုံ.

၄၉၈. ‘‘ယေ စ တေ သတတာနုယောဂိနော၊ ဓုဝံ ပယုတ္တာ [ဓုဝယုတ္တာ (သီ.)] သုဂတဿ သာသနေ၊

မညာမိ တေ အမတမေဝ ကေဝလံ၊ အဓိဂစ္ဆန္တိ ပဒံ အသင်္ခတ’’န္တိ.

ဒုတိယမိဂလုဒ္ဒကပေတဝတ္ထု အဋ္ဌမံ.