၉. ကူဋဝိနိစ္ဆယိကပေတဝတ္ထု

၄၉၉. ‘‘မာလီ ကိရိဋီ ကာယူရီ [ကေယူရီ (သီ.)]၊ ဂတ္တာ တေ စန္ဒနုဿဒါ၊

ပသန္နမုခဝဏ္ဏောသိ၊ သူရိယဝဏ္ဏောဝ သောဘသိ.

၅၀၀. ‘‘အမာနုသာ ပါရိသဇ္ဇာ၊ ယေ တေမေ ပရိစာရကာ၊

ဒသ ကညာသဟဿာနိ၊ ယာ တေမာ ပရိစာရိကာ၊

တာ [ကာ (က.)] ကမ္ဗုကာယူရဓရာ၊ ကဉ္စနာဝေဠဘူသိတာ.

၅၀၁. ‘‘မဟာနုဘာဝေါသိ တုဝံ၊ လောမဟံသနရူပဝါ၊

ပိဋ္ဌိမံသာနိ အတ္တနော၊ သာမံ ဥက္ကစ္စ [ဥက္ကဍ္ဎ (သီ.)] ခါဒသိ.

၅၀၂. ‘‘ကိံ နု ကာယေန ဝါစာယ၊ မနသာ ဒုက္ကုဋံ ကတံ၊

ကိဿ ကမ္မဝိပါကေန၊ ပိဋ္ဌိမံသာနိ အတ္တနော၊

သာမံ ဥက္ကစ္စ ခါဒသီ’’တိ.

၅၀၃. ‘‘အတ္တနောဟံ အနတ္ထာယ၊ ဇီဝလောကေ အစာရိသံ၊

ပေသုညမုသာဝါဒေန၊ နိကတိဝဉ္စနာယ စ.

၅၀၄. ‘‘တတ္ထာဟံ ပရိသံ ဂန္တွာ၊ သစ္စကာလေ ဥပဋ္ဌိတေ၊

အတ္ထံ ဓမ္မံ နိရာကတွာ [နိရံကတွာ (က.) နိ + အာ + ကရ + တွာ = နိရာကတွာ]၊ အဓမ္မမနုဝတ္တိသံ.

၅၀၅. ‘‘ဧဝံ သော ခါဒတတ္တာနံ၊ ယော ဟောတိ ပိဋ္ဌိမံသိကော၊

ယထာဟံ အဇ္ဇ ခါဒါမိ၊ ပိဋ္ဌိမံသာနိ အတ္တနော.

၅၀၆. ‘‘တယိဒံ တယာ နာရဒ သာမံ ဒိဋ္ဌံ၊ အနုကမ္ပကာ ယေ ကုသလာ ဝဒေယျုံ၊

မာ ပေသုဏံ မာ စ မုသာ အဘာဏိ၊ မာ ခေါသိ ပိဋ္ဌိမံသိကော တုဝ’’န္တိ.

ကူဋဝိနိစ္ဆယိကပေတဝတ္ထု နဝမံ.