၁၆. သမာရောပနဟာရသမ္ပာတော

၇၈. တတ္ထ ကတမော သမာရောပနော ဟာရသမ္ပာတော?

‘‘တသ္မာ ရက္ခိတစိတ္တဿ၊ သမ္မာသင်္ကပ္ပဂေါစရော၊

သမ္မာဒိဋ္ဌိပုရေက္ခာရော၊ ဉတွာန ဥဒယဗ္ဗယံ၊

ထိနမိဒ္ဓါဘိဘူ ဘိက္ခု၊ သဗ္ဗာ ဒုဂ္ဂတိယော ဇဟေ’’တိ.

တသ္မာ ရက္ခိတစိတ္တဿာတိ တိဏ္ဏံ သုစရိတာနံ ပဒဋ္ဌာနံ၊ စိတ္တေ ရက္ခိတေ တံ ရက္ခိတံ ဘဝတိ ကာယကမ္မံ ဝစီကမ္မံ မနောကမ္မံ. သမ္မာဒိဋ္ဌိပုရေက္ခာရောတိ သမ္မာဒိဋ္ဌိယာ ဘာဝိတာယ ဘာဝိတော ဘဝတိ အရိယော အဋ္ဌင်္ဂိကော မဂ္ဂေါ. ကေန ကာရဏေန? သမ္မာဒိဋ္ဌိတော ဟိ သမ္မာသင်္ကပ္ပေါ ပဘဝတိ၊ သမ္မာသင်္ကပ္ပတော သမ္မာဝါစာ ပဘဝတိ၊ သမ္မာဝါစာတော သမ္မာကမ္မန္တော ပဘဝတိ၊ သမ္မာကမ္မန္တတော သမ္မာအာဇီဝေါ ပဘဝတိ၊ သမ္မာအာဇီဝတော သမ္မာဝါယာမော ပဘဝတိ၊ သမ္မာဝါယာမတော သမ္မာသတိ ပဘဝတိ၊ သမ္မာသတိတော သမ္မာသမာဓိ ပဘဝတိ၊ သမ္မာသမာဓိတော သမ္မာဝိမုတ္တိ ပဘဝတိ၊ သမ္မာဝိမုတ္တိတော သမ္မာဝိမုတ္တိဉာဏဒဿနံ ပဘဝတိ. အယံ အနုပါဒိသေသော ပုဂ္ဂလော အနုပါဒိသေသာ စ နိဗ္ဗာနဓာတု.

နိယုတ္တော သမာရောပနော ဟာရသမ္ပာတော.

တေနာဟ အာယသ္မာ မဟာကစ္စာယနော –

‘‘သောဠသ ဟာရာ ပဌမံ၊ ဒိသလောစနတော ဒိသာ ဝိလောကေတွာ၊

သင်္ခိပိယ အင်္ကုသေန ဟိ၊ နယေဟိ တီဟိ နိဒ္ဒိသေ သုတ္တ’’န္တိ.

နိယုတ္တော ဟာရသမ္ပာတော.