၁၃. ဥဒယမာဏဝပုစ္ဆာ

၁၃၀. ‘‘ဈာယိံ ဝိရဇမာသီနံ၊ [ဣစ္စာယသ္မာ ဥဒယော]

ကတကိစ္စံ အနာသဝံ၊

ပါရဂုံ သဗ္ဗဓမ္မာနံ၊ အတ္ထိ ပဉှေန အာဂမံ၊

အညာဝိမောက္ခံ ပဗြူဟိ၊ အဝိဇ္ဇာယ ပဘေဒနံ’’.

၁၃၁. ‘‘ပဟာနံ ကာမစ္ဆန္ဒာနံ၊ [ဥဒယာတိ ဘဂဝါ]

ဒေါမနဿာန စူဘယံ၊

ထိနဿ စ ပနူဒနံ၊ ကုက္ကုစ္စာနံ နိဝါရဏံ.

၁၃၂. ‘‘ဥပေက္ခာသတိသံသုဒ္ဓံ၊ ဓမ္မတက္ကပုရေဇဝံ၊

အညာဝိမောက္ခံ ပဗြူမိ၊ အဝိဇ္ဇာယ ပဘေဒနံ’’.

၁၃၃. ‘‘ကိံသု သံယောဇနော လောကော၊ ကိံသု တဿ ဝိစာရဏံ၊

ကိဿဿ ဝိပ္ပဟာနေန၊ နိဗ္ဗာနံ ဣတိ ဝုစ္စတိ’’.

၁၃၄. ‘‘နန္ဒိသံယောဇနော လောကော၊ ဝိတက္ကဿ ဝိစာရဏံ၊

တဏှာယ ဝိပ္ပဟာနေန၊ နိဗ္ဗာနံ ဣတိ ဝုစ္စတိ’’.

၁၃၅. ‘‘ကထံ သတဿ စရတော၊ ဝိညာဏံ ဥပရုဇ္ဈတိ၊

ဘဂဝန္တံ ပုဋ္ဌုမာဂမ္မ၊ တံ သုဏောမ ဝစော တဝ’’.

၁၃၆. ‘‘အဇ္ဈတ္တဉ္စ ဗဟိဒ္ဓါ စ၊ ဝေဒနံ နာဘိနန္ဒတော၊

ဧဝံ သတဿ စရတော၊ ဝိညာဏံ ဥပရုဇ္ဈတီ’’တိ.

ဥဒယမာဏဝပုစ္ဆာ တေရသမာ.