၁၄. ပေါသာလမာဏဝပုစ္ဆာ

၁၃၇. ‘‘ယော အတီတံ အာဒိသတိ၊ [ဣစ္စာယသ္မာ ပေါသာလော]

အနေဇော ဆိန္နသံသယော၊

ပါရဂုံ သဗ္ဗဓမ္မာနံ၊ အတ္ထိ ပဉှေန အာဂမံ.

၁၃၈. ‘‘ဝိဘူတရူပသညိဿ၊ သဗ္ဗကာယပ္ပဟာယိနော၊

အဇ္ဈတ္တဉ္စ ဗဟိဒ္ဓါ စ၊ နတ္ထိ ကိဉ္စီတိ ပဿတော၊

ဉာဏံ သက္ကာနုပုစ္ဆာမိ၊ ကထံ နေယျော တထာဝိဓော’’.

၁၃၉. ‘‘ဝိညာဏဋ္ဌိတိယော သဗ္ဗာ၊ [ပေါသာလာတိ ဘဂဝါ]

အဘိဇာနံ တထာဂတော၊

တိဋ္ဌန္တမေနံ ဇာနာတိ၊ ဝိမုတ္တံ တပ္ပရာယဏံ.

၁၄၀. ‘‘အာကိဉ္စညသမ္ဘဝံ ဉတွာ၊ နန္ဒီ သံယောဇနံ ဣတိ၊

ဧဝမေတံ အဘိညာယ၊ တတော တတ္ထ ဝိပဿတိ၊

ဧတံ [ဧဝံ (သျာ. က.)] ဉာဏံ တထံ တဿ၊ ဗြာဟ္မဏဿ ဝုသီမတော’’တိ.

ပေါသာလမာဏဝပုစ္ဆာ စုဒ္ဒသမာ.