၁၀. ကပ္ပမာဏဝပုစ္ဆာ

၁၁၇. ‘‘မဇ္ဈေ သရသ္မိံ တိဋ္ဌတံ၊ [ဣစ္စာယသ္မာ ကပ္ပေါ]

ဩဃေ ဇာတေ မဟဗ္ဘယေ၊

ဇရာမစ္စုပရေတာနံ၊ ဒီပံ ပဗြူဟိ မာရိသ၊

တွဉ္စ မေ ဒီပမက္ခာဟိ၊ ယထာယိဒံ နာပရံ သိယာ’’.

၁၁၈. ‘‘မဇ္ဈေ သရသ္မိံ တိဋ္ဌတံ၊ [ကပ္ပါတိ ဘဂဝါ]

ဩဃေ ဇာတေ မဟဗ္ဘယေ၊

ဇရာမစ္စုပရေတာနံ၊ ဒီပံ ပဗြူမိ ကပ္ပ တေ.

၁၁၉. ‘‘အကိဉ္စနံ အနာဒါနံ၊ ဧတံ ဒီပံ အနာပရံ၊

နိဗ္ဗာနံ ဣတိ နံ ဗြူမိ၊ ဇရာမစ္စုပရိက္ခယံ.

၁၂၀. ‘‘ဧတဒညာယ ယေ သတာ၊ ဒိဋ္ဌဓမ္မာဘိနိဗ္ဗုတာ၊

န တေ မာရဝသာနုဂါ၊ န တေ မာရဿ ပဋ္ဌဂူ’’တိ [ပဒ္ဓဂူ (သီ.)].

ကပ္ပမာဏဝပုစ္ဆာ ဒသမာ.