၁၁. ဇတုကဏ္ဏိမာဏဝပုစ္ဆာ

၁၂၁. ‘‘သုတွာနဟံ ဝီရမကာမကာမိံ၊ [ဣစ္စာယသ္မာ ဇတုကဏ္ဏိ]

ဩဃာတိဂံ ပုဋ္ဌုမကာမမာဂမံ၊

သန္တိပဒံ ဗြူဟိ သဟဇနေတ္တ၊ ယထာတစ္ဆံ ဘဂဝါ ဗြူဟိ မေတံ.

၁၂၂. ‘‘ဘဂဝါ ဟိ ကာမေ အဘိဘုယျ ဣရိယတိ၊ အာဒိစ္စောဝ ပထဝိံ တေဇီ တေဇသာ၊

ပရိတ္တပညဿ မေ ဘူရိပည၊ အာစိက္ခ ဓမ္မံ ယမဟံ ဝိဇညံ၊

ဇာတိဇရာယ ဣဓ ဝိပ္ပဟာနံ’’.

၁၂၃. ‘‘ကာမေသု ဝိနယ ဂေဓံ၊ [ဇတုကဏ္ဏီတိ ဘဂဝါ]

နေက္ခမ္မံ ဒဋ္ဌု ခေမတော၊

ဥဂ္ဂဟိတံ နိရတ္တံ ဝါ၊ မာ တေ ဝိဇ္ဇိတ္ထ ကိဉ္စနံ.

၁၂၄. ‘‘ယံ ပုဗ္ဗေ တံ ဝိသောသေဟိ၊ ပစ္ဆာ တေ မာဟု ကိဉ္စနံ၊

မဇ္ဈေ စေ နော ဂဟေဿသိ၊ ဥပသန္တော စရိဿသိ.

၁၂၅. ‘‘သဗ္ဗသော နာမရူပသ္မိံ၊ ဝီတဂေဓဿ ဗြာဟ္မဏ၊

အာသဝါဿ န ဝိဇ္ဇန္တိ၊ ယေဟိ မစ္စုဝသံ ဝဇေ’’တိ.

ဇတုကဏ္ဏိမာဏဝပုစ္ဆာ ဧကာဒသမာ.