၉. တောဒေယျမာဏဝပုစ္ဆာ
၁၁၃. ‘‘ယသ္မိံ ကာမာ န ဝသန္တိ၊ [ဣစ္စာယသ္မာ တောဒေယျော]
တဏှာ ယဿ န ဝိဇ္ဇတိ၊
ကထံကထာ စ ယော တိဏ္ဏော၊ ဝိမောက္ခော တဿ ကီဒိသော’’.
၁၁၄. ‘‘ယသ္မိံ ကာမာ န ဝသန္တိ၊ [တောဒေယျာတိ ဘဂဝါ]
တဏှာ ယဿ န ဝိဇ္ဇတိ၊
ကထံကထာ စ ယော တိဏ္ဏော၊ ဝိမောက္ခော တဿ နာပရော’’.
၁၁၅. ‘‘နိရာသသော သော ဥဒ အာသသာနော [အာသယာနော (က.)]၊ ပညာဏဝါ သော ဥဒ ပညကပ္ပီ၊
မုနိံ အဟံ သက္က ယထာ ဝိဇညံ၊ တံ မေ ဝိယာစိက္ခ သမန္တစက္ခု’’.
၁၁၆. ‘‘နိရာသသော သော န စ အာသသာနော၊ ပညာဏဝါ သော န စ ပညကပ္ပီ၊
ဧဝမ္ပိ တောဒေယျ မုနိံ ဝိဇာန၊ အကိဉ္စနံ ကာမဘဝေ အသတ္တ’’န္တိ.
တောဒေယျမာဏဝပုစ္ဆာ နဝမာ.