၇. နန္ဒမာဏဝပုစ္ဆာ

၁၀၂. ‘‘သန္တိ လောကေ မုနယော၊ [ဣစ္စာယသ္မာ နန္ဒော]

ဇနာ ဝဒန္တိ တယိဒံ ကထံသု၊

ဉာဏူပပန္နံ မုနိ နော ဝဒန္တိ၊ ဥဒါဟု ဝေ ဇီဝိတေနူပပန္နံ’’.

၁၀၃. ‘‘န ဒိဋ္ဌိယာ န သုတိယာ န ဉာဏေန၊ မုနီဓ နန္ဒ ကုသလာ ဝဒန္တိ၊

ဝိသေနိကတွာ အနီဃာ နိရာသာ၊ စရန္တိ ယေ တေ မုနယောတိ ဗြူမိ’’.

၁၀၄. ‘‘ယေ ကေစိမေ သမဏဗြာဟ္မဏာသေ၊ [ဣစ္စာယသ္မာ နန္ဒော]

ဒိဋ္ဌဿုတေနာပိ ဝဒန္တိ သုဒ္ဓိံ၊

သီလဗ္ဗတေနာပိ ဝဒန္တိ သုဒ္ဓိံ၊

အနေကရူပေန ဝဒန္တိ သုဒ္ဓိံ၊

ကစ္စိဿု တေ ဘဂဝါ တတ္ထ ယတာ စရန္တာ၊

အတာရု ဇာတိဉ္စ ဇရဉ္စ မာရိသ၊

ပုစ္ဆာမိ တံ ဘဂဝါ ဗြူဟိ မေတံ’’.

၁၀၅. ‘‘ယေ ကေစိမေ သမဏဗြာဟ္မဏာသေ၊ [နန္ဒာတိ ဘဂဝါ]

ဒိဋ္ဌဿုတေနာပိ ဝဒန္တိ သုဒ္ဓိံ၊

သီလဗ္ဗတေနာပိ ဝဒန္တိ သုဒ္ဓိံ၊ အနေကရူပေန ဝဒန္တိ သုဒ္ဓိံ၊

ကိဉ္စာပိ တေ တတ္ထ ယတာ စရန္တိ၊ နာတရိံသု ဇာတိဇရန္တိ ဗြူမိ’’.

၁၀၆. ‘‘ယေ ကေစိမေ သမဏဗြာဟ္မဏာသေ၊ [ဣစ္စာယသ္မာ နန္ဒော]

ဒိဋ္ဌဿုတေနာပိ ဝဒန္တိ သုဒ္ဓိံ၊

သီလဗ္ဗတေနာပိ ဝဒန္တိ သုဒ္ဓိံ၊ အနေကရူပေန ဝဒန္တိ သုဒ္ဓိံ၊

တေ စေ မုနိ ဗြူသိ အနောဃတိဏ္ဏေ၊ အထ ကော စရဟိ ဒေဝမနုဿလောကေ၊

အတာရိ ဇာတိဉ္စ ဇရဉ္စ မာရိသ၊ ပုစ္ဆာမိ တံ ဘဂဝါ ဗြူဟိ မေတံ’’.

၁၀၇. ‘‘နာဟံ သဗ္ဗေ သမဏဗြာဟ္မဏာသေ၊ [နန္ဒာတိ ဘဂဝါ]

ဇာတိဇရာယ နိဝုတာတိ ဗြူမိ၊

ယေ သီဓ ဒိဋ္ဌံ ဝ သုတံ မုတံ ဝါ၊ သီလဗ္ဗတံ ဝါပိ ပဟာယ သဗ္ဗံ၊

အနေကရူပမ္ပိ ပဟာယ သဗ္ဗံ၊ တဏှံ ပရိညာယ အနာသဝါသေ၊

တေ ဝေ နရာ ဩဃတိဏ္ဏာတိ ဗြူမိ’’.

၁၀၈. ‘‘ဧတာဘိနန္ဒာမိ ဝစော မဟေသိနော၊ သုကိတ္တိတံ ဂေါတမနူပဓီကံ၊

ယေ သီဓ ဒိဋ္ဌံ ဝ သုတံ မုတံ ဝါ၊ သီလဗ္ဗတံ ဝါပိ ပဟာယ သဗ္ဗံ၊

အနေကရူပမ္ပိ ပဟာယ သဗ္ဗံ၊ တဏှံ ပရိညာယ အနာသဝါသေ၊

အဟမ္ပိ တေ ဩဃတိဏ္ဏာတိ ဗြူမီ’’တိ.

နန္ဒမာဏဝပုစ္ဆာ သတ္တမာ.