၄. ဝိစ္ဆိကင်္ဂပဉှော

၄. ‘‘ဘန္တေ နာဂသေန၊ ‘ဝိစ္ဆိကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဝိစ္ဆိကော နင်္ဂုလာဝုဓော နင်္ဂုလံ ဥဿာပေတွာ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဉာဏာဝုဓေန ဘဝိတဗ္ဗံ၊ ဉာဏံ ဥဿာပေတွာ ဝိဟရိတဗ္ဗံ. ဣဒံ၊ မဟာရာဇ၊ ဝိစ္ဆိကဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘ဉာဏခဂ္ဂံ ဂဟေတွာန၊ ဝိဟရန္တော ဝိပဿကော၊

ပရိမုစ္စတိ သဗ္ဗဘယာ၊ ဒုပ္ပသဟော စ သော ဘဝေ’’’တိ.

ဝိစ္ဆိကင်္ဂပဉှော စတုတ္ထော.