၄. ဥပစိကာဝဂ္ဂေါ

၁. ဥပစိကင်္ဂပဉှော

၁. ‘‘ဘန္တေ နာဂသေန၊ ‘ဥပစိကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဥပစိကာ ဥပရိ ဆဒနံ ကတွာ အတ္တာနံ ပိဒဟိတွာ ဂေါစရာယ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သီလသံဝရဆဒနံ ကတွာ မာနသံ ပိဒဟိတွာ ပိဏ္ဍာယ စရိတဗ္ဗံ၊ သီလသံဝရဆဒနေန ခေါ၊ မဟာရာဇ၊ ယောဂီ ယောဂါဝစရော သဗ္ဗဘယသမတိက္ကန္တော ဟောတိ. ဣဒံ၊ မဟာရာဇ၊ ဥပစိကာယ ဧကံ အင်္ဂံ ဂဟေတဗ္ဗံ၊ ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘သီလသံဝရဆဒနံ၊ ယောဂီ ကတွာန မာနသံ၊

အနုပလိတ္တော လောကေန၊ ဘယာ စ ပရိမုစ္စတီ’’’တိ.

ဥပစိကင်္ဂပဉှော ပဌမော.

၂. ဗိဠာရင်္ဂပဉှော

၂. ‘‘ဘန္တေ နာဂသေန၊ ‘ဗိဠာရဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဗိဠာရော ဂုဟာဂတောပိ သုသိရဂတောပိ ဟမ္မိယန္တရဂတောပိ ဥန္ဒူရံ ယေဝ ပရိယေသတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဂါမဂတေနာပိ အရညဂတေနာပိ ရုက္ခမူလဂတေနာပိ သုညာဂါရဂတေနာပိ သတတံ သမိတံ အပ္ပမတ္တေန ကာယဂတာသတိဘောဇနံ ယေဝ ပရိယေသိတဗ္ဗံ. ဣဒံ၊ မဟာရာဇ၊ ဗိဠာရဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဗိဠာရော အာသန္နေ ယေဝ ဂေါစရံ ပရိယေသတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဣမေသု ယေဝ ပဉ္စသု ဥပါဒါနက္ခန္ဓေသု ဥဒယဗ္ဗယာနုပဿိနာ ဝိဟရိတဗ္ဗံ ‘ဣတိ ရူပံ ဣတိ ရူပဿ သမုဒယော ဣတိ ရူပဿ အတ္ထင်္ဂမော၊ ဣတိ ဝေဒနာ ဣတိ ဝေဒနာယ သမုဒယော ဣတိ ဝေဒနာယ အတ္ထင်္ဂမော၊ ဣတိ သညာ ဣတိ သညာယ သမုဒယော ဣတိ သညာယ အတ္ထင်္ဂမော၊ ဣတိ သင်္ခါရာ ဣတိ သင်္ခါရာနံ သမုဒယော ဣတိ သင်္ခါရာနံ အတ္ထင်္ဂမော၊ ဣတိ ဝိညာဏံ ဣတိ ဝိညာဏဿ သမုဒယော ဣတိ ဝိညာဏဿ အတ္ထင်္ဂမော’တိ. ဣဒံ၊ မဟာရာဇ၊ ဗိဠာရဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန –

‘‘‘န ဣတော ဒူရေ ဘဝိတဗ္ဗံ၊ ဘဝဂ္ဂံ ကိံ ကရိဿတိ၊

ပစ္စုပ္ပန္နမှိ ဝေါဟာရေ၊ သကေ ကာယမှိ ဝိန္ဒထာ’’’တိ.

ဗိဠာရင်္ဂပဉှော ဒုတိယော.

၃. ဥန္ဒူရင်္ဂပဉှော

၃. ‘‘ဘန္တေ နာဂသေန၊ ‘ဥန္ဒူရဿ [ဥန္ဒုရဿ (သျာ. က.)] ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဥန္ဒူရော ဣတောစိတော စ ဝိစရန္တော အာဟာရူပါသီသကော ယေဝ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဣတောစိတော စ ဝိစရန္တေန ယောနိသော မနသိကာရူပါသီသကေနေဝ ဘဝိတဗ္ဗံ. ဣဒံ၊ မဟာရာဇ၊ ဥန္ဒူရဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘ဓမ္မာသီသံ [ဓမ္မသီသံ (သီ. ပီ.)] ကရိတွာန၊ ဝိဟရန္တော ဝိပဿကော၊

အနောလီနော ဝိဟရတိ၊ ဥပသန္တော သဒါ သတော’’’တိ.

ဥန္ဒူရင်္ဂပဉှော တတိယော.

၄. ဝိစ္ဆိကင်္ဂပဉှော

၄. ‘‘ဘန္တေ နာဂသေန၊ ‘ဝိစ္ဆိကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဝိစ္ဆိကော နင်္ဂုလာဝုဓော နင်္ဂုလံ ဥဿာပေတွာ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဉာဏာဝုဓေန ဘဝိတဗ္ဗံ၊ ဉာဏံ ဥဿာပေတွာ ဝိဟရိတဗ္ဗံ. ဣဒံ၊ မဟာရာဇ၊ ဝိစ္ဆိကဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘ဉာဏခဂ္ဂံ ဂဟေတွာန၊ ဝိဟရန္တော ဝိပဿကော၊

ပရိမုစ္စတိ သဗ္ဗဘယာ၊ ဒုပ္ပသဟော စ သော ဘဝေ’’’တိ.

ဝိစ္ဆိကင်္ဂပဉှော စတုတ္ထော.

၅. နကုလင်္ဂပဉှော

၅. ‘‘ဘန္တေ နာဂသေန၊ ‘နကုလဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ နကုလော ဥရဂမုပဂစ္ဆန္တော ဘေသဇ္ဇေန ကာယံ ပရိဘာဝေတွာ ဥရဂမုပဂစ္ဆတိ ဂဟေတုံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကောဓာဃာတဗဟုလံ ကလဟဝိဂ္ဂဟဝိဝါဒဝိရောဓာဘိဘူတံ လောကမုပဂစ္ဆန္တေန မေတ္တာဘေသဇ္ဇေန မာနသံ အနုလိမ္ပိတဗ္ဗံ. ဣဒံ၊ မဟာရာဇ၊ နကုလဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘တသ္မာ သကံ ပရေသမ္ပိ၊ ကာတဗ္ဗာ မေတ္တဘာဝနာ၊

မေတ္တစိတ္တေန ဖရိတဗ္ဗံ၊ ဧတံ ဗုဒ္ဓါန သာသန’’’န္တိ.

နကုလင်္ဂပဉှော ပဉ္စမော.

၆. ဇရသိင်္ဂါလင်္ဂပဉှော

၆. ‘‘ဘန္တေ နာဂသေန၊ ‘ဇရသိင်္ဂါလဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဇရသိင်္ဂါလော ဘောဇနံ ပဋိလဘိတွာ အဇိဂုစ္ဆမာနော ယာဝဒတ္ထံ အာဟရယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဘောဇနံ ပဋိလဘိတွာ အဇိဂုစ္ဆမာနေန သရီရယာပနမတ္တမေဝ ပရိဘုဉ္ဇိတဗ္ဗံ. ဣဒံ၊ မဟာရာဇ၊ ဇရသိင်္ဂါလဿ ပဌမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန မဟာကဿပေန –

‘‘‘သေနာသနမှာ ဩရုယှ၊ ဂါမံ ပိဏ္ဍာယ ပါဝိသိံ၊

ဘုဉ္ဇန္တံ ပုရိသံ ကုဋ္ဌိံ၊ သက္ကစ္စ နံ ဥပဋ္ဌဟိံ.

‘‘‘သော မေ ပက္ကေန ဟတ္ထေန၊ အာလောပံ ဥပနာမယိ၊

အာလောပံ ပက္ခိပန္တဿ၊ အင်္ဂုလိပေတ္ထ ဆိဇ္ဇထ.

‘‘‘ကုဋ္ဋမူလဉ္စ နိဿာယ၊ အာလောပံ တံ အဘုဉ္ဇိသံ၊

ဘုဉ္ဇမာနေ ဝါ ဘုတ္တေ ဝါ၊ ဇေဂုစ္ဆံ မေ န ဝိဇ္ဇတီ’တိ.

‘‘ပုန စပရံ၊ မဟာရာဇ၊ ဇရသိင်္ဂါလော ဘောဇနံ ပဋိလဘိတွာ န ဝိစိနာတိ လူခံ ဝါ ပဏီတံ ဝါတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဘောဇနံ ပဋိလဘိတွာ န ဝိစိနိတဗ္ဗံ ‘လူခံ ဝါ ပဏီတံ ဝါ သမ္ပန္နံ ဝါ အသမ္ပန္နံ ဝါ’တိ၊ ယထာလဒ္ဓေန သန္တုဿိတဗ္ဗံ. ဣဒံ၊ မဟာရာဇ၊ ဇရသိင်္ဂါလဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘လူခေနပိ စ သန္တုဿေ၊ နာညံ ပတ္ထေ ရသံ ဗဟုံ၊

ရသေသု အနုဂိဒ္ဓဿ၊ ဈာနေ န ရမတေ [ရမတီ (သီ. ပီ.)] မနော၊

ဣတရီတရေန သန္တုဋ္ဌော [သန္တုဋ္ဌေ (သီ. ပီ.)]၊ သာမညံ ပရိပူရတီ’’’တိ.

ဇရသိင်္ဂါလင်္ဂပဉှော ဆဋ္ဌော.

၇. မိဂင်္ဂပဉှော

၇. ‘‘ဘန္တေ နာဂသေန၊ ‘မိဂဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ မိဂေါ ဒိဝါ အရညေ စရတိ၊ ရတ္တိံ အဗ္ဘောကာသေ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဒိဝါ အရညေ ဝိဟရိတဗ္ဗံ၊ ရတ္တိံ အဗ္ဘောကာသေ. ဣဒံ၊ မဟာရာဇ၊ မိဂဿ ပဌမံ အင်္ဂံ ဂဟေတဗ္ဗံ.

‘‘ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန လောမဟံသနပရိယာယေ –

‘သော ခေါ အဟံ၊ သာရိပုတ္တ၊ ယာ တာ ရတ္တိယော သီတာ ဟေမန္တိကာ အန္တရဋ္ဌကာ ဟိမပါတသမယာ [အန္တရဋ္ဌကေ ဟိမပါတသမယေ (သီ. ပီ. က.)]၊ တထာရူပါသု ရတ္တီသု ရတ္တိံ အဗ္ဘောကာသေ ဝိဟရာမိ၊ ဒိဝါ ဝနသဏ္ဍေ. ဂိမှာနံ ပစ္ဆိမေ မာသေ ဒိဝါ အဗ္ဘောကာသေ ဝိဟရာမိ၊ ရတ္တိံ ဝနသဏ္ဍေ’တိ.

‘‘ပုန စပရံ၊ မဟာရာဇ၊ မိဂေါ သတ္တိမှိ ဝါ သရေ ဝါ ဩပတန္တေ ဝဉ္စေတိ [ဝဇ္ဇေတိ (က.)] ပလာယတိ၊ န ကာယမုပနေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကိလေသေသု ဩပတန္တေသု ဝဉ္စယိတဗ္ဗံ [ဝဇ္ဇယိတဗ္ဗံ (က.)] ပလာယိတဗ္ဗံ၊ န စိတ္တမုပနေတဗ္ဗံ. ဣဒံ၊ မဟာရာဇ၊ မိဂဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ မိဂေါ မနုဿေ ဒိသွာ ယေန ဝါ တေန ဝါ ပလာယတိ ‘မာ မံ တေ အဒ္ဒသံသူ’တိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဘဏ္ဍနကလဟဝိဂ္ဂဟဝိဝါဒသီလေ ဒုဿီလေ ကုသီတေ သင်္ဂဏိကာရာမေ ဒိသွာ ယေန ဝါ တေန ဝါ ပလာယိတဗ္ဗံ ‘မာ မံ တေ အဒ္ဒသံသု၊ အဟဉ္စ တေ မာ အဒ္ဒသ’န္တိ. ဣဒံ၊ မဟာရာဇ၊ မိဂဿ တတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘မာ မေ ကဒါစိ ပါပိစ္ဆော၊ ကုသီတော ဟီနဝီရိယော၊

အပ္ပဿုတော အနာစာရော၊ သမ္မတော [သမေတော (သီ. ပီ.)] အဟု ကတ္ထစီ’’’တိ.

မိဂင်္ဂပဉှော သတ္တမော.

၈. ဂေါရူပင်္ဂပဉှော

၈. ‘‘ဘန္တေ နာဂသေန၊ ‘ဂေါရူပဿ စတ္တာရိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ စတ္တာရိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဂေါရူပေါ သကံ ဂေဟံ န ဝိဇဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သကော ကာယော န ဝိဇဟိတဗ္ဗော ‘အနိစ္စုစ္ဆာဒနပရိမဒ္ဒနဘေဒနဝိကိရဏဝိဒ္ဓံသနဓမ္မော အယံ ကာယော’တိ. ဣဒံ၊ မဟာရာဇ၊ ဂေါရူပဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဂေါရူပေါ အာဒိန္နဓုရော သုခဒုက္ခေန ဓုရံ ဝဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အာဒိန္နဗြဟ္မစရိယေန သုခဒုက္ခေန ယာဝ ဇီဝိတပရိယာဒါနာ အာပါဏကောဋိကံ ဗြဟ္မစရိယံ စရိတဗ္ဗံ. ဣဒံ၊ မဟာရာဇ၊ ဂေါရူပဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဂေါရူပေါ ဆန္ဒေန ဃာယမာနော ပါနီယံ ပိဝတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အာစရိယုပဇ္ဈာယာနံ အနုသိဋ္ဌိ ဆန္ဒေန ပေမေန ပသာဒေန ဃာယမာနေန ပဋိဂ္ဂဟေတဗ္ဗာ. ဣဒံ၊ မဟာရာဇ၊ ဂေါရူပဿ တတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဂေါရူပေါ ယေန ကေနစိ ဝါဟိယမာနော ဝဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ထေရနဝမဇ္ဈိမဘိက္ခူနမ္ပိ ဂိဟိဥပါသကဿာပိ ဩဝါဒါနုသာသနီ သိရသာ သမ္ပဋိစ္ဆိတဗ္ဗာ. ဣဒံ၊ မဟာရာဇ၊ ဂေါရူပဿ စတုတ္ထံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘တဒဟု ပဗ္ဗဇိတော သန္တော၊ ဇာတိယာ သတ္တဝဿိကော၊

သောပိ မံ အနုသာသေယျ၊ သမ္ပဋိစ္ဆာမိ မတ္ထကေ [မုဒ္ဓနာ (သီ.)].

‘‘‘တိဗ္ဗံ ဆန္ဒဉ္စ ပေမဉ္စ၊ တသ္မိံ ဒိသွာ ဥပဋ္ဌပေ၊

ဌပေယျာစရိယဋ္ဌာနေ၊ သက္ကစ္စ နံ ပုနပ္ပုန’’’န္တိ.

ဂေါရူပင်္ဂပဉှော အဋ္ဌမော.

၉. ဝရာဟင်္ဂပဉှော

၉. ‘‘ဘန္တေ နာဂသေန၊ ‘ဝရာဟဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဝရာဟော သန္တတ္တကဌိတေ [သန္တတ္တကဌိနေ (သီ. ပီ.)] ဂိမှသမယေ သမ္ပတ္တေ ဥဒကံ ဥပဂစ္ဆတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဒေါသေန စိတ္တေ အာလုဠိတခလိတဝိဗ္ဘန္တသန္တတ္တေ သီတလာမတပဏီတမေတ္တာဘာဝနံ ဥပဂန္တဗ္ဗံ. ဣဒံ၊ မဟာရာဇ၊ ဝရာဟဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဝရာဟော စိက္ခလ္လမုဒကမုပဂန္တွာ နာသိကာယ ပထဝိံ ခဏိတွာ ဒေါဏိံ ကတွာ ဒေါဏိကာယ သယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန မာနသေ ကာယံ နိက္ခိပိတွာ အာရမ္မဏန္တရဂတေန သယိတဗ္ဗံ. ဣဒံ၊ မဟာရာဇ၊ ဝရာဟဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ပိဏ္ဍောလဘာရဒွါဇေန –

‘‘‘ကာယေ [ကာယေန (က.)] သဘာဝံ ဒိသွာန၊ ဝိစိနိတွာ ဝိပဿကော၊

ဧကာကိယော အဒုတိယော၊ သေတိ အာရမ္မဏန္တရေ’’’တိ.

ဝရာဟင်္ဂပဉှော နဝမော.

၁၀. ဟတ္ထိင်္ဂပဉှော

၁၀. ‘‘ဘန္တေ နာဂသေန၊ ‘ဟတ္ထိဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဟတ္ထီ နာမ စရန္တော ယေဝ ပထဝိံ ဒါလေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကာယံ သမ္မသမာနေနေဝ သဗ္ဗေ ကိလေသာ ဒါလေတဗ္ဗာ. ဣဒံ၊ မဟာရာဇ၊ ဟတ္ထိဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဟတ္ထီ သဗ္ဗကာယေနေဝ အပလောကေတိ၊ ဥဇုကံ ယေဝ ပေက္ခတိ၊ န ဒိသာဝိဒိသာ ဝိလောကေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သဗ္ဗကာယေန အပလောကိနာ ဘဝိတဗ္ဗံ၊ န ဒိသာဝိဒိသာ ဝိလောကေတဗ္ဗာ၊ န ဥဒ္ဓံ ဥလ္လောကေတဗ္ဗံ၊ န အဓော ဩလောကေတဗ္ဗံ၊ ယုဂမတ္တပေက္ခိနာ ဘဝိတဗ္ဗံ. ဣဒံ၊ မဟာရာဇ၊ ဟတ္ထိဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဟတ္ထီ အနိဗဒ္ဓသယနော ဂေါစရာယမနုဂန္တွာ န တမေဝ ဒေသံ ဝါသတ္ထမုပဂစ္ဆတိ၊ န ဓုဝပ္ပတိဋ္ဌာလယော၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အနိဗဒ္ဓသယနေန ဘဝိတဗ္ဗံ၊ နိရာလယေန ပိဏ္ဍာယ ဂန္တဗ္ဗံ၊ ယဒိ ပဿတိ ဝိပဿကော မနုညံ ပတိရူပံ ရုစိရဒေသေ ဘဝံ မဏ္ဍပံ ဝါ ရုက္ခမူလံ ဝါ ဂုဟံ ဝါ ပဗ္ဘာရံ ဝါ၊ တတ္ထေဝ ဝါသမုပဂန္တဗ္ဗံ၊ ဓုဝပ္ပတိဋ္ဌာလယော န ကာတဗ္ဗော. ဣဒံ၊ မဟာရာဇ၊ ဟတ္ထိဿ တတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဟတ္ထီ ဥဒကံ ဩဂါဟိတွာ သုစိဝိမလသီတလသလိလပရိပုဏ္ဏံ ကုမုဒုပ္ပလပဒုမပုဏ္ဍရီကသဉ္ဆန္နံ မဟတိမဟန္တံ ပဒုမသရံ ဩဂါဟိတွာ ကီဠတိ ဂဇဝရကီဠံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သုစိဝိမလဝိပ္ပသန္နမနာဝိလဓမ္မဝရဝါရိပုဏ္ဏံ ဝိမုတ္တိကုသုမသဉ္ဆန္နံ မဟာသတိပဋ္ဌာနပေါက္ခရဏိံ ဩဂါဟိတွာ ဉာဏေန သင်္ခါရာ ဩဓုနိတဗ္ဗာ ဝိဓုနိတဗ္ဗာ၊ ယောဂါဝစရကီဠာ ကီဠိတဗ္ဗာ. ဣဒံ၊ မဟာရာဇ၊ ဟတ္ထိဿ စတုတ္ထံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဟတ္ထီ သတော ပါဒံ ဥဒ္ဓရတိ၊ သတော ပါဒံ နိက္ခိပတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သတေန သမ္ပဇာနေန ပါဒံ ဥဒ္ဓရိတဗ္ဗံ၊ သတေန သမ္ပဇာနေန ပါဒံ နိက္ခိပိတဗ္ဗံ၊ အဘိက္ကမပဋိက္ကမေ သမိဉ္ဇနပသာရဏေ သဗ္ဗတ္ထ သတေန သမ္ပဇာနေန ဘဝိတဗ္ဗံ. ဣဒံ၊ မဟာရာဇ၊ ဟတ္ထိဿ ပဉ္စမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ကာယေန သံဝရော သာဓု၊ သာဓု ဝါစာယ သံဝရော၊

မနသာ သံဝရော သာဓု၊ သာဓု သဗ္ဗတ္ထ သံဝရော၊

သဗ္ဗတ္ထ သံဝုတော လဇ္ဇီ၊ ရက္ခိတောတိ ပဝုစ္စတီ’’’တိ.

ဟတ္ထိင်္ဂပဉှော ဒသမော.ဥပစိကာဝဂ္ဂေါ စတုတ္ထော.

တဿုဒ္ဒါနံ –

ဥပစိကာ ဗိဠာရော စ၊ ဥန္ဒူရော ဝိစ္ဆိကေန စ၊

နကုလော သိင်္ဂါလော မိဂေါ၊

ဂေါရူပေါ ဝရာဟော ဟတ္ထိနာ ဒသာတိ.