၅. သီဟဝဂ္ဂေါ

၁. သီဟင်္ဂပဉှော

၁. ‘‘ဘန္တေ နာဂသေန၊ ‘သီဟဿ သတ္တ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ သတ္တ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ သီဟော နာမ သေတဝိမလပရိသုဒ္ဓပဏ္ဍရော၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သေတဝိမလပရိသုဒ္ဓပဏ္ဍရစိတ္တေန ဗျပဂတကုက္ကုစ္စေန ဘဝိတဗ္ဗံ. ဣဒံ၊ မဟာရာဇ၊ သီဟဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော စတုစရဏော ဝိက္ကန္တစာရီ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန စတုရိဒ္ဓိပါဒစရဏေန ဘဝိတဗ္ဗံ. ဣဒံ၊ မဟာရာဇ၊ သီဟဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော အဘိရူပရုစိရကေသရီ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အဘိရူပရုစိရသီလကေသရိနာ ဘဝိတဗ္ဗံ. ဣဒံ၊ မဟာရာဇ၊ သီဟဿ တတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော ဇီဝိတပရိယာဒါနေပိ န ကဿစိ ဩနမတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရပရိယာဒါနေပိ န ကဿစိ ဩနမိတဗ္ဗံ. ဣဒံ၊ မဟာရာဇ၊ သီဟဿ စတုတ္ထံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော သပဒါနဘက္ခော ယသ္မိံ ဩကာသေ နိပတတိ၊ တတ္ထေဝ ယာဝဒတ္ထံ ဘက္ခယတိ၊ န ဝရမံသံ ဝိစိနာတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သပဒါနဘက္ခေန ဘဝိတဗ္ဗံ၊ န ကုလာနိ ဝိစိနိတဗ္ဗာနိ၊ န ပုဗ္ဗဂေဟံ ဟိတွာ ကုလာနိ ဥပသင်္ကမိတဗ္ဗာနိ၊ န ဘောဇနံ ဝိစိနိတဗ္ဗံ၊ ယသ္မိံ ဩကာသေ ကဗဠံ အာဒီယတိ၊ တသ္မိံ ယေဝ ဩကာသေ ဘုဉ္ဇိတဗ္ဗံ သရီရယာပနတ္ထံ [သရီရယာပနမတ္တံ (သီ. ပီ.)]၊ န ဝရဘောဇနံ ဝိစိနိတဗ္ဗံ. ဣဒံ၊ မဟာရာဇ၊ သီဟဿ ပဉ္စမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော အသန္နိဓိဘက္ခော၊ သကိံ ဂေါစရံ ဘက္ခယိတွာ န ပုန တံ ဥပဂစ္ဆတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အသန္နိဓိကာရပရိဘောဂိနာ ဘဝိတဗ္ဗံ. ဣဒံ၊ မဟာရာဇ၊ သီဟဿ ဆဋ္ဌံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သီဟော ဘောဇနံ အလဒ္ဓါ န ပရိတဿတိ၊ လဒ္ဓါပိ ဘောဇနံ အဂဓိတော [အဂထိတော (သီ.)] အမုစ္ဆိတော အနဇ္ဈောသန္နော ပရိဘုဉ္ဇတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဘောဇနံ အလဒ္ဓါ န ပရိတဿိတဗ္ဗံ၊ လဒ္ဓါပိ ဘောဇနံ အဂဓိတေန အမုစ္ဆိတေန အနဇ္ဈောသန္နေန အာဒီနဝဒဿာဝိနာ နိဿရဏပညေန ပရိဘုဉ္ဇိတဗ္ဗံ. ဣဒံ၊ မဟာရာဇ၊ သီဟဿ သတ္တမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ ထေရံ မဟာကဿပံ ပရိကိတ္တယမာနေန –

‘သန္တုဋ္ဌောယံ၊ ဘိက္ခဝေ၊ ကဿပေါ ဣတရီတရေန ပိဏ္ဍပါတေန၊ ဣတရီတရပိဏ္ဍပါတသန္တုဋ္ဌိယာ စ ဝဏ္ဏဝါဒီ၊ န စ ပိဏ္ဍပါတဟေတု အနေသနံ အပ္ပတိရူပံ အာပဇ္ဇတိ၊ အလဒ္ဓါ စ ပိဏ္ဍပါတံ န ပရိတဿတိ၊ လဒ္ဓါ စ ပိဏ္ဍပါတံ အဂဓိတော အမုစ္ဆိတော အနဇ္ဈောသန္နော အာဒီနဝဒဿာဝီ နိဿရဏပညော ပရိဘုဉ္ဇတီ’’’တိ.

သီဟင်္ဂပဉှော ပဌမော.

၂. စက္ကဝါကင်္ဂပဉှော

၂. ‘‘ဘန္တေ နာဂသေန၊ ‘စက္ကဝါကဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီတိ’’? ‘‘ယထာ၊ မဟာရာဇ၊ စက္ကဝါကော ယာဝ ဇီဝိတပရိယာဒါနာ ဒုတိယိကံ န ဝိဇဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယာဝ ဇီဝိတပရိယာဒါနာ ယောနိသော မနသိကာရော န ဝိဇဟိတဗ္ဗော. ဣဒံ၊ မဟာရာဇ၊ စက္ကဝါကဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ စက္ကဝါကော သေဝါလပဏကဘက္ခော၊ တေန စ သန္တုဋ္ဌိံ အာပဇ္ဇတိ၊ တာယ စ သန္တုဋ္ဌိယာ ဗလေန စ ဝဏ္ဏေန စ န ပရိဟာယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယထာလာဘသန္တောသော ကရဏီယော၊ ယထာလာဘသန္တုဋ္ဌော ခေါ၊ မဟာရာဇ၊ ယောဂီ ယောဂါဝစရော န ပရိဟာယတိ သီလေန၊ န ပရိဟာယတိ သမာဓိနာ၊ န ပရိဟာယတိ ပညာယ၊ န ပရိဟာယတိ ဝိမုတ္တိယာ၊ န ပရိဟာယတိ ဝိမုတ္တိဉာဏဒဿနေန၊ န ပရိဟာယတိ သဗ္ဗေဟိ ကုသလေဟိ ဓမ္မေဟိ. ဣဒံ၊ မဟာရာဇ၊ စက္ကဝါကဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ စက္ကဝါကော ပါဏေ န ဝိဟေဌယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန နိဟိတဒဏ္ဍေန နိဟိတသတ္ထေန လဇ္ဇိနာ ဒယာပန္နေန သဗ္ဗပါဏဘူတဟိတာနုကမ္ပိနာ ဘဝိတဗ္ဗံ. ဣဒံ၊ မဟာရာဇ၊ စက္ကဝါကဿ တတိယံ အင်္ဂံ ဂဟေတဗ္ဗံ. ဘာသတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန စက္ကဝါကဇာတကေ –

‘‘‘ယော န ဟန္တိ န ဃာတေတိ၊ န ဇိနာတိ န ဇာပယေ၊

မေတ္တံသော [အဟိံသာ (သီ. ပီ.)] သဗ္ဗဘူတေသု၊ ဝေရံ တဿ န ကေနစီ’’’တိ.

စက္ကဝါကင်္ဂပဉှော ဒုတိယော.

၃. ပေဏာဟိကင်္ဂပဉှော

၃. ‘‘ဘန္တေ နာဂသေန၊ ‘ပေဏာဟိကာယ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ပေဏာဟိကာ သကပတိမှိ ဥသူယာယ ဆာပကေ န ပေါသယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သကမနေ [သကမနော (က.)] ကိလေသေ ဥပ္ပန္နေ ဥသူယာယိတဗ္ဗံ၊ သတိပဋ္ဌာနေန သမ္မာသံဝရသုသိရေ ပက္ခိပိတွာ မနောဒွါရေ ကာယဂတာသတိ ဘာဝေတဗ္ဗာ. ဣဒံ၊ မဟာရာဇ၊ ပေဏာဟိကာယ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပေဏာဟိကာ ပဝနေ ဒိဝသံ ဂေါစရံ စရိတွာ သာယံ ပက္ခိဂဏံ ဥပေတိ အတ္တနော ဂုတ္တိယာ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဧကကေန ပဝိဝေကံ သေဝိတဗ္ဗံ သံယောဇနပရိမုတ္တိယာ၊ တတြ ရတိံ အလဘမာနေန ဥပဝါဒဘယပရိရက္ခဏာယ သံဃံ ဩသရိတွာ သင်္ဃရက္ခိတေန ဝသိတဗ္ဗံ. ဣဒံ၊ မဟာရာဇ၊ ပေဏာဟိကာယ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဗြဟ္မုနာ သဟမ္ပတိနာ ဘဂဝတော သန္တိကေ –

‘‘‘သေဝေထ ပန္တာနိ သေနာသနာနိ၊ စရေယျ သံယောဇနဝိပ္ပမောက္ခာ၊

သစေ ရတိံ နာဓိဂစ္ဆေယျ တတ္ထ၊ သံဃေ ဝသေ ရက္ခိတတ္တော သတီမာ’’’တိ.

ပေဏာဟိကင်္ဂပဉှော တတိယော.

၄. ဃရကပေါတင်္ဂပဉှော

၄. ‘‘ဘန္တေ နာဂသေန၊ ‘ဃရကပေါတဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဃရကပေါတော ပရဂေဟေ ဝသမာနော န တေသံ ကိဉ္စိ ဘဏ္ဍဿ နိမိတ္တံ ဂဏှာတိ၊ မဇ္ဈတ္တော ဝသတိ သညာဗဟုလော၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပရကုလံ ဥပဂတေန တသ္မိံ ကုလေ ဣတ္ထီနံ ဝါ ပုရိသာနံ ဝါ မဉ္စေ ဝါ ပီဌေ ဝါ ဝတ္ထေ ဝါ အလင်္ကာရေ ဝါ ဥပဘောဂေ ဝါ ပရိဘောဂေ ဝါ ဘောဇနဝိကတီသု ဝါ န နိမိတ္တံ ဂဟေတဗ္ဗံ၊ မဇ္ဈတ္တေန ဘဝိတဗ္ဗံ၊ သမဏသညာ ပစ္စုပဋ္ဌပေတဗ္ဗာ. ဣဒံ၊ မဟာရာဇ၊ ဃရကပေါတဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန စူဠနာရဒဇာတကေ –

‘‘‘ပဝိသိတွာ ပရကုလံ၊ ပါနတ္ထံ ဘောဇနာယ ဝါ [ပါနေသု ဘောဇနေသု ဝါ (သီ. ပီ.)]၊

မိတံ ခါဒေ မိတံ ဘုဉ္ဇေ၊ န စ ရူပေ မနံ ကရေ’’’တိ.

ဃရကပေါတင်္ဂပဉှော စတုတ္ထော.

၅. ဥလူကင်္ဂပဉှော

၅. ‘‘ဘန္တေ နာဂသေန၊ ‘ဥလူကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဥလူကော ကာကေဟိ ပဋိဝိရုဒ္ဓေါ၊ ရတ္တိံ ကာကသံဃံ ဂန္တွာ ဗဟူပိ ကာကေ ဟနတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အညာဏေန ပဋိဝိရုဒ္ဓေါ ကာတဗ္ဗော၊ ဧကေန ရဟော နိသီဒိတွာ အညာဏံ သမ္ပမဒ္ဒိတဗ္ဗံ၊ မူလတော ဆိန္ဒိတဗ္ဗံ. ဣဒံ၊ မဟာရာဇ၊ ဥလူကဿ ပဌမံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဥလူကော သုပ္ပဋိသလ္လီနော ဟောတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပဋိသလ္လာနာရာမေန ဘဝိတဗ္ဗံ ပဋိသလ္လာနရတေန. ဣဒံ၊ မဟာရာဇ၊ ဥလူကဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ဣဓ၊ ဘိက္ခဝေ၊ ဘိက္ခု ပဋိသလ္လာနာရာမော ပဋိသလ္လာနရတော ‘‘ဣဒံ ဒုက္ခ’’န္တိ ယထာဘူတံ ပဇာနာတိ၊ ‘‘အယံ ဒုက္ခသမုဒယော’’တိ ယထာ ဘူထံ ပဇာနာတိ၊ ‘‘အယံ ဒုက္ခနိရောဓော’’တိ ယထာဘူတံ ပဇာနာတိ၊ ‘‘အယံ ဒုက္ခနိရောဓဂါမိနီ ပဋိပဒါ’’တိ ယထာဘူတံ ပဇာနာတီ’’’တိ.

ဥလူကင်္ဂပဉှော ပဉ္စမော.

၆. သတပတ္တင်္ဂပဉှော

၆. ‘‘ဘန္တေ နာဂသေန၊ ‘သတပတ္တဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ သတပတ္တော ရဝိတွာ ပရေသံ ခေမံ ဝါ ဘယံ ဝါ အာစိက္ခတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပရေသံ ဓမ္မံ ဒေသယမာနေန ဝိနိပါတံ ဘယတော ဒဿယိတဗ္ဗံ၊ နိဗ္ဗာနံ ခေမတော ဒဿယိတဗ္ဗံ. ဣဒံ၊ မဟာရာဇ၊ သတပတ္တဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ပိဏ္ဍောလဘာရဒွါဇေန –

‘‘‘နိရယေ ဘယသန္တာသံ၊ နိဗ္ဗာနေ ဝိပုလံ သုခံ၊

ဥဘယာနေတာနတ္ထာနိ ဒဿေတဗ္ဗာနိ ယောဂိနာ’’’တိ.

သတပတ္တင်္ဂပဉှော ဆဋ္ဌော.

၇. ဝဂ္ဂုလိင်္ဂပဉှော

၇. ‘‘ဘန္တေ နာဂသေန၊ ‘ဝဂ္ဂုလိဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ဝဂ္ဂုလိ ဂေဟံ ပဝိသိတွာ ဝိစရိတွာ နိက္ခမတိ၊ န တတ္ထ ပလိဗုဒ္ဓတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဂါမံ ပိဏ္ဍာယ ပဝိသိတွာ သပဒါနံ ဝိစရိတွာ ပဋိလဒ္ဓလာဘေန ခိပ္ပမေဝ နိက္ခမိတဗ္ဗံ၊ န တတ္ထ ပလိဗုဒ္ဓေန ဘဝိတဗ္ဗံ. ဣဒံ၊ မဟာရာဇ၊ ဝဂ္ဂုလိဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ဝဂ္ဂုလိ ပရဂေဟေ ဝသမာနော န တေသံ ပရိဟာနိံ ကရောတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကုလာနိ ဥပသင်္ကမိတွာ အတိယာစနာယ ဝါ ဝိညတ္တိဗဟုလတာယ ဝါ ကာယဒေါသဗဟုလတာယ ဝါ အတိဘာဏိတာယ ဝါ သမာနသုခဒုက္ခတာယ ဝါ န တေသံ ကောစိ ဝိပ္ပဋိသာရော ကရဏီယော၊ နပိ တေသံ မူလကမ္မံ ပရိဟာပေတဗ္ဗံ၊ သဗ္ဗထာ ဝဍ္ဎိ ယေဝ ဣစ္ဆိတဗ္ဗာ. ဣဒံ၊ မဟာရာဇ၊ ဝဂ္ဂုလိဿ ဒုတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန ဒီဃနိကာယဝရေ လက္ခဏသုတ္တန္တေ –

‘‘‘သဒ္ဓါယ သီလေန သုတေန ဗုဒ္ဓိယာ၊ စာဂေန ဓမ္မေန ဗဟူဟိ သာဓုဟိ၊

ဓနေန ဓညေန စ ခေတ္တဝတ္ထုနာ၊ ပုတ္တေဟိ ဒါရေဟိ စတုပ္ပဒေဟိ စ.

‘‘‘ဉာတီဟိ မိတ္တေဟိ စ ဗန္ဓဝေဟိ၊ ဗလေန ဝဏ္ဏေန သုခေန စူဘယံ၊

ကထံ န ဟာယေယျုံ ပရေတိ ဣစ္ဆတိ၊ အတ္ထသမိဒ္ဓိဉ္စ ပနာဘိကင်္ခတီ’’’တိ.

ဝဂ္ဂုလိင်္ဂပဉှော သတ္တမော.

၈. ဇလူကင်္ဂပဉှော

၈. ‘‘ဘန္တေ နာဂသေန၊ ‘ဇလူကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဇလူကာ ယတ္ထ အလ္လီယတိ၊ တတ္ထေဝ ဒဠှံ အလ္လီယိတွာ ရုဟိရံ ပိဝတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယသ္မိံ အာရမ္မဏေ စိတ္တံ အလ္လီယတိ၊ တံ အာရမ္မဏံ ဝဏ္ဏတော စ သဏ္ဌာနတော စ ဒိသတော စ ဩကာသတော စ ပရိစ္ဆေဒတော စ လိင်္ဂတော စ နိမိတ္တတော စ ဒဠှံ ပတိဋ္ဌာပေတွာ တေနေဝါရမ္မဏေန ဝိမုတ္တိရသမသေစနကံ ပါတဗ္ဗံ. ဣဒံ၊ မဟာရာဇ၊ ဇလူကာယ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန အနုရုဒ္ဓေန –

‘‘‘ပရိသုဒ္ဓေန စိတ္တေန၊ အာရမ္မဏေ ပတိဋ္ဌာယ၊

တေန စိတ္တေန ပါတဗ္ဗံ၊ ဝိမုတ္တိရသမသေစန’’’န္တိ.

ဇလူကင်္ဂပဉှော အဋ္ဌမော.

၉. သပ္ပင်္ဂပဉှော

၉. ‘‘ဘန္တေ နာဂသေန၊ ‘သပ္ပဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ သပ္ပေါ ဥရေန ဂစ္ဆတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပညာယ စရိတဗ္ဗံ၊ ပညာယ စရမာနဿ ခေါ၊ မဟာရာဇ၊ ယောဂိနော စိတ္တံ ဉာယေ စရတိ၊ ဝိလက္ခဏံ ဝိဝဇ္ဇေတိ၊ သလက္ခဏံ ဘာဝေတိ. ဣဒံ၊ မဟာရာဇ၊ သပ္ပဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သပ္ပေါ စရမာနော ဩသဓံ ပရိဝဇ္ဇေန္တော စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဒုစ္စရိတံ ပရိဝဇ္ဇေန္တေန စရိတဗ္ဗံ. ဣဒံ၊ မဟာရာဇ၊ သပ္ပဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ သပ္ပေါ မနုဿေ ဒိသွာ တပ္ပတိ [မနုဿံ ဒိသွာ ကမ္ပတိ (က.)] သောစတိ စိန္တယတိ၊ ဧဝမေဝ ခေါ မဟာရာဇ ယောဂိနာ ယောဂါဝစရေန ကုဝိတက္ကေ၊ ဝိတက္ကေတွာ အရတိံ ဥပ္ပါဒယိတွာ တပ္ပိတဗ္ဗံ သောစိတဗ္ဗံ စိန္တယိတဗ္ဗံ ‘ပမာဒေန မေ ဒိဝသော ဝီတိနာမိတော၊ န သော ပုန သက္ကာ လဒ္ဓု’န္တိ. ဣဒံ၊ မဟာရာဇ၊ သပ္ပဿ တတိယံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဘလ္လာဋိယဇာတကေ ဒွိန္နံ ကိန္နရာနံ –

‘‘‘မယေကရတ္တံ [ယမေကရတ္တိံ (သီ. ပီ.)] ဝိပ္ပဝသိမှ လုဒ္ဒ၊ အကာမကာ အညမညံ သရန္တာ၊

တမေကရတ္တံ [တမေကရတ္တိံ (သီ. ပီ.)] အနုတပ္ပမာနာ၊ သောစာမ ‘သာ ရတ္တိ ပုန နဟေဿတီ’’’တိ.

သပ္ပင်္ဂပဉှော နဝမော.

၁၀. အဇဂရင်္ဂပဉှော

၁၀. ‘‘ဘန္တေ နာဂသေန၊ ‘အဇဂရဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ အဇဂရော မဟတိမဟာကာယော ဗဟူပိ ဒိဝသေ ဦနူဒရော ဒီနတရော ကုစ္ဆိပူရံ အာဟာရံ န လဘတိ၊ အပရိပုဏ္ဏော ယေဝ ယာဝဒေဝ သရီရယာပနမတ္တကေန ယာပေတိ၊ ဧဝမေဝ ခေါ၊ မဟာရာဇ၊ ယောဂိနော ယောဂါဝစရဿ ဘိက္ခာစရိယပ္ပသုတဿ ပရပိဏ္ဍမုပဂတဿ ပရဒိန္နပ္ပါဋိကင်္ခိဿ သယံဂါဟပ္ပဋိဝိရတဿ ဒုလ္လဘံ ဥဒရပရိပူရံ အာဟာရံ၊ အပိ စ အတ္ထဝသိကေန ကုလပုတ္တေန စတ္တာရော ပဉ္စ အာလောပေ အဘုဉ္ဇိတွာ အဝသေသံ ဥဒကေန ပရိပူရေတဗ္ဗံ. ဣဒံ၊ မဟာရာဇ၊ အဇဂရဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘အလ္လံ သုက္ခံ ဝါ ဘုဉ္ဇန္တော၊ န ဗာဠှံ သုဟိတော သိယာ၊

ဦနူဒရော မိတာဟာရော၊ သတော ဘိက္ခု ပရိဗ္ဗဇေ.

‘‘‘စတ္တာရော ပဉ္စ အာလောပေ၊ အဘုတွာ ဥဒကံ ပိဝေ၊

အလံ ဖာသု ဝိဟာရာယ၊ ပဟိတတ္တဿ ဘိက္ခုနော’’’တိ.

အဇဂရင်္ဂပဉှော ဒသမော.

သီဟဝဂ္ဂေါ ပဉ္စမော.

တဿုဒ္ဒါနံ –

ကေသရီ စက္ကဝါကော စ၊ ပေဏာဟိ ဃရကပေါတကော၊

ဥလူကော သတပတ္တော စ၊ ဝဂ္ဂုလိ စ ဇလူပိကာ၊

သပ္ပေါ အဇဂရော စေဝ၊ ဝဂ္ဂေါ တေန ပဝုစ္စတီတိ.