၅. နကုလင်္ဂပဉှော

၅. ‘‘ဘန္တေ နာဂသေန၊ ‘နကုလဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ နကုလော ဥရဂမုပဂစ္ဆန္တော ဘေသဇ္ဇေန ကာယံ ပရိဘာဝေတွာ ဥရဂမုပဂစ္ဆတိ ဂဟေတုံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကောဓာဃာတဗဟုလံ ကလဟဝိဂ္ဂဟဝိဝါဒဝိရောဓာဘိဘူတံ လောကမုပဂစ္ဆန္တေန မေတ္တာဘေသဇ္ဇေန မာနသံ အနုလိမ္ပိတဗ္ဗံ. ဣဒံ၊ မဟာရာဇ၊ နကုလဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘တသ္မာ သကံ ပရေသမ္ပိ၊ ကာတဗ္ဗာ မေတ္တဘာဝနာ၊

မေတ္တစိတ္တေန ဖရိတဗ္ဗံ၊ ဧတံ ဗုဒ္ဓါန သာသန’’’န္တိ.

နကုလင်္ဂပဉှော ပဉ္စမော.