၃. ဥန္ဒူရင်္ဂပဉှော

၃. ‘‘ဘန္တေ နာဂသေန၊ ‘ဥန္ဒူရဿ [ဥန္ဒုရဿ (သျာ. က.)] ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဥန္ဒူရော ဣတောစိတော စ ဝိစရန္တော အာဟာရူပါသီသကော ယေဝ စရတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဣတောစိတော စ ဝိစရန္တေန ယောနိသော မနသိကာရူပါသီသကေနေဝ ဘဝိတဗ္ဗံ. ဣဒံ၊ မဟာရာဇ၊ ဥန္ဒူရဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန ဥပသေနေန ဝင်္ဂန္တပုတ္တေန –

‘‘‘ဓမ္မာသီသံ [ဓမ္မသီသံ (သီ. ပီ.)] ကရိတွာန၊ ဝိဟရန္တော ဝိပဿကော၊

အနောလီနော ဝိဟရတိ၊ ဥပသန္တော သဒါ သတော’’’တိ.

ဥန္ဒူရင်္ဂပဉှော တတိယော.