၇. ဝံသင်္ဂပဉှော

၇. ‘‘ဘန္တေ နာဂသေန၊ ‘ဝံသဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဝံသော ယတ္ထ ဝါတော၊ တတ္ထ အနုလောမေတိ၊ နာညတ္ထမနုဓာဝတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ယံ ဗုဒ္ဓေန ဘဂဝတာ ဘာသိတံ နဝင်္ဂံ သတ္ထု သာသနံ၊ တံ အနုလောမယိတွာ ကပ္ပိယေ အနဝဇ္ဇေ ဌတွာ သမဏဓမ္မံ ယေဝ ပရိယေသိတဗ္ဗံ. ဣဒံ၊ မဟာရာဇ၊ ဝံသဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ မဟာရာဇ ထေရေန ရာဟုလေန –

‘‘‘နဝင်္ဂံ ဗုဒ္ဓဝစနံ၊ အနုလောမေတွာန သဗ္ဗဒါ၊

ကပ္ပိယေ အနဝဇ္ဇသ္မိံ၊ ဌတွာပါယံ သမုတ္တရိ’’’န္တိ.

ဝံသင်္ဂပဉှော သတ္တမော.