၈. စာပင်္ဂပဉှော

၈. ‘‘ဘန္တေ နာဂသေန၊ ‘စာပဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ စာပေါ သုတစ္ဆိတော နမိတော [မိတော (သီ. ပီ. က.)] ယာဝဂ္ဂမူလံ သမကမေဝ အနုနမတိ နပ္ပဋိတ္ထမ္ဘတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ထေရနဝမဇ္ဈိမသမကေသု အနုနမိတဗ္ဗံ နပ္ပဋိဖရိတဗ္ဗံ. ဣဒံ၊ မဟာရာဇ၊ စာပဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန ဝိဓုရ [ပုဏ္ဏက] ဇာတကေ –

‘‘‘စာပေါဝူနုဒရော ဓီရော၊ ဝံသော ဝါပိ ပကမ္ပယေ [စာပေါ ဝါ နုန မေ ဓီရော၊ ဝံသောဝ အနုလောမယံ (သီ. ပီ. က.)]၊

ပဋိလောမံ န ဝတ္တေယျ၊ သ ရာဇဝသတိံ ဝသေ’’’တိ.

စာပင်္ဂပဉှော အဋ္ဌမော.