၃. ကလန္ဒကင်္ဂပဉှော

၃. ‘‘ဘန္တေ နာဂသေန၊ ‘ကလန္ဒကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ကလန္ဒကော ပဋိသတ္တုမှိ ဩပတန္တေ နင်္ဂုဋ္ဌံ ပပ္ဖေါဋေတွာ မဟန္တံ ကတွာ တေနေဝ နင်္ဂုဋ္ဌလဂုဠေန ပဋိသတ္တုံ ပဋိဗာဟတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ကိလေသသတ္တုမှိ ဩပတန္တေ သတိပဋ္ဌာနလဂုဠံ ပပ္ဖေါဋေတွာ မဟန္တံ ကတွာ တေနေဝ သတိပဋ္ဌာနလဂုဠေန သဗ္ဗကိလေသာ ပဋိဗာဟိတဗ္ဗာ. ဣဒံ၊ မဟာရာဇ၊ ကလန္ဒကဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန စူဠပန္ထကေန –

‘ယဒါ ကိလေသာ ဩပတန္တိ၊ သာမညဂုဏဓံသနာ၊

သတိပဋ္ဌာနလဂုဠေန၊ ဟန္တဗ္ဗာ တေ ပုနပ္ပုန’’’န္တိ.

ကလန္ဒကင်္ဂပဉှော တတိယော.