၄. ဒီပိနိယင်္ဂပဉှော

၄. ‘‘ဘန္တေ နာဂသေန၊ ‘ဒီပိနိယာ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ဒီပိနီ သကိံ ယေဝ ဂဗ္ဘံ ဂဏှာတိ၊ န ပုနပ္ပုနံ ပုရိသံ ဥပေတိ? ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အာယတိံ ပဋိသန္ဓိံ ဥပ္ပတ္တိံ ဂဗ္ဘသေယျံ စုတိံ ဘေဒံ ခယံ ဝိနာသံ သံသာရဘယံ ဒုဂ္ဂတိံ ဝိသမံ သမ္ပီဠိတံ ဒိသွာ ‘ပုနဗ္ဘဝေ နပ္ပဋိသန္ဒဟိဿာမီ’တိ ယောနိသော မနသိကာရော ကရဏီယော. ဣဒံ၊ မဟာရာဇ၊ ဒီပိနိယာ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သုတ္တနိပါတေ ဓနိယဂေါပါလကသုတ္တေ –

‘‘‘ဥသဘောရိဝ ဆေတွ ဗန္ဓနာနိ၊ နာဂေါ ပူတိလတံဝ ဒါလယိတွာ၊

နာဟံ ပုနုပေဿံ ဂဗ္ဘသေယျံ၊ အထ စေ ပတ္ထယသီ ပဝဿ ဒေဝါ’’’တိ.

ဒီပိနိယင်္ဂပဉှော စတုတ္ထော.