၉. ဧကန္တသုခနိဗ္ဗာနပဉှော

၉. ‘‘ဘန္တေ နာဂသေန၊ ကိံ ဧကန္တသုခံ နိဗ္ဗာနံ၊ ဥဒါဟု ဒုက္ခေန မိဿ’’န္တိ? ‘‘ဧကန္တသုခံ၊ မဟာရာဇ၊ နိဗ္ဗာနံ၊ ဒုက္ခေန အမိဿ’’န္တိ.

‘‘န မယံ တံ၊ ဘန္တေ နာဂသေန၊ ဝစနံ သဒ္ဒဟာမ ‘ဧကန္တသုခံ နိဗ္ဗာန’န္တိ၊ ဧဝမေတ္ထ မယံ၊ ဘန္တေ နာဂသေန၊ ပစ္စေမ ‘နိဗ္ဗာနံ ဒုက္ခေန မိဿ’န္တိ၊ ကာရဏဉ္စေတ္ထ ဥပလဘာမ ‘နိဗ္ဗာနံ ဒုက္ခေန မိဿ’န္တိ. ကတမံ ဧတ္ထ ကာရဏံ? ယေ တေ၊ ဘန္တေ နာဂသေန၊ နိဗ္ဗာနံ ပရိယေသန္တိ၊ တေသံ ဒိဿတိ ကာယဿ စ စိတ္တဿ စ အာတာပေါ ပရိတာပေါ ဌာနစင်္ကမနိသဇ္ဇာသယနာဟာရပရိဂ္ဂဟော မိဒ္ဓဿ စ ဥပရောဓော အာယတနာနဉ္စ ပဋိပီဠနံ ဓနဓညပိယဉာတိမိတ္တပ္ပဇဟနံ. ယေ ကေစိ လောကေ သုခိတာ သုခသမပ္ပိတာ၊ တေ သဗ္ဗေပိ ပဉ္စဟိ ကာမဂုဏေဟိ အာယတနေ ရမေန္တိ ဗြူဟေန္တိ၊ မနာပိကမနာပိကဗဟုဝိဓသုဘနိမိတ္တေန ရူပေန စက္ခုံ ရမေန္တိ ဗြူဟေန္တိ၊ မနာပိကမနာပိကဂီတဝါဒိတဗဟုဝိဓသုဘနိမိတ္တေန သဒ္ဒေန သောတံ ရမေန္တိ ဗြူဟေန္တိ၊ မနာပိကမနာပိကပုပ္ဖဖလပတ္တတစမူလသာရဗဟုဝိဓသုဘနိမိတ္တေန ဂန္ဓေန ဃာနံ ရမေန္တိ ဗြူဟေန္တိ၊ မနာပိကမနာပိကခဇ္ဇဘောဇ္ဇလေယျပေယျသာယနီယဗဟုဝိဓသုဘနိမိတ္တေန ရသေန ဇိဝှံ ရမေန္တိ ဗြုဟေန္တိ၊ မနာပိကမနာပိကသဏှသုခုမမုဒုမဒ္ဒဝဗဟုဝိဓသုဘနိမိတ္တေန ဖဿေန ကာယံ ရမေန္တိ ဗြူဟေန္တိ၊ မနာပိကမနာပိကကလျာဏပါပကသုဘာသုဘဗဟုဝိဓဝိတက္ကမနသိကာရေန မနံ ရမေန္တိ ဗြူဟေန္တိ. တုမှေ တံ စက္ခုသောတဃာနဇိဝှါကာယမနောဗြူဟနံ ဟနထ ဥပဟနထ၊ ဆိန္ဒထ ဥပစ္ဆိန္ဒထ၊ ရုန္ဓထ ဥပရုန္ဓထ. တေန ကာယောပိ ပရိတပတိ၊ စိတ္တမ္ပိ ပရိတပတိ၊ ကာယေ ပရိတတ္တေ ကာယိကဒုက္ခဝေဒနံ ဝေဒိယတိ၊ စိတ္တေ ပရိတတ္တေ စေတသိကဒုက္ခဝေဒနံ ဝေဒယတိ. နနု မာဂဏ္ဍိယောပိ [မာဂန္ဒိယောပိ (သီ. ပီ.)] ပရိဗ္ဗာဇကော ဘဂဝန္တံ ဂရဟမာနော ဧဝမာဟ ‘ဘူနဟု [ဘူတဟစ္စော (ပီ.)၊ ဘူနဟစ္စော (က.)] သမဏော ဂေါတမော’တိ. ဣဒမေတ္ထ ကာရဏံ၊ ယေနာဟံ ကာရဏေန ဗြူမိ ‘နိဗ္ဗာနံ ဒုက္ခေန မိဿ’’’န္တိ.

‘‘န ဟိ၊ မဟာရာဇ၊ နိဗ္ဗာနံ ဒုက္ခေန မိဿံ၊ ဧကန္တသုခံ နိဗ္ဗာနံ. ယံ ပန တွံ၊ မဟာရာဇ၊ ဗြူသိ ‘နိဗ္ဗာနံ ဒုက္ခ’န္တိ၊ နေတံ ဒုက္ခံ နိဗ္ဗာနံ နာမ၊ နိဗ္ဗာနဿ ပန သစ္ဆိကိရိယာယ ပုဗ္ဗဘာဂေါ ဧသော၊ နိဗ္ဗာနပရိယေသနံ ဧတံ၊ ဧကန္တသုခံ ယေဝ၊ မဟာရာဇ၊ နိဗ္ဗာနံ၊ န ဒုက္ခေန မိဿံ. ဧတ္ထ ကာရဏံ ဝဒါမိ. အတ္ထိ၊ မဟာရာဇ၊ ရာဇူနံ ရဇ္ဇသုခံ နာမာ’’တိ? ‘‘အာမ၊ ဘန္တေ၊ အတ္ထိ ရာဇူနံ ရဇ္ဇသုခ’’န္တိ. ‘‘အပိ နု ခေါ တံ၊ မဟာရာဇ၊ ရဇ္ဇသုခံ ဒုက္ခေန မိဿ’’န္တိ? ‘‘န ဟိ၊ ဘန္တေ’’တိ. ‘‘ကိဿ ပန တေ၊ မဟာရာဇ၊ ရာဇာနော ပစ္စန္တေ ကုပိတေ တေသံ ပစ္စန္တနိဿိတာနံ ပဋိသေဓာယ အမစ္စေဟိ ပရိဏာယကေဟိ ဘဋေဟိ ဗလတ္ထေဟိ ပရိဝုတာ ပဝါသံ ဂန္တွာ ဍံသမကသဝါတာတပပဋိပီဠိတာ သမဝိသမေ ပရိဓာဝန္တိ၊ မဟာယုဒ္ဓဉ္စ ကရောန္တိ၊ ဇီဝိတသံသယဉ္စ ပါပုဏန္တီ’’တိ? ‘‘နေတံ၊ ဘန္တေ နာဂသေန၊ ရဇ္ဇသုခံ နာမ၊ ရဇ္ဇသုခဿ ပရိယေသနာယ ပုဗ္ဗဘာဂေါ ဧသော၊ ဒုက္ခေန၊ ဘန္တေ နာဂသေန၊ ရာဇာနော ရဇ္ဇံ ပရိယေသိတွာ ရဇ္ဇသုခံ အနုဘဝန္တိ၊ ဧဝံ၊ ဘန္တေ နာဂသေန၊ ရဇ္ဇသုခံ ဒုက္ခေန အမိဿံ၊ အညံ တံ ရဇ္ဇသုခံ၊ အညံ ဒုက္ခ’’န္တိ. ‘‘ဧဝမေဝ ခေါ၊ မဟာရာဇ၊ ဧကန္တသုခံ နိဗ္ဗာနံ၊ န ဒုက္ခေန မိဿံ. ယေ ပန တံ နိဗ္ဗာနံ ပရိယေသန္တိ၊ တေ ကာယဉ္စ စိတ္တဉ္စ အာတာပေတွာ ဌာနစင်္ကမနိသဇ္ဇာသယနာဟာရံ ပရိဂ္ဂဟေတွာ မိဒ္ဓံ ဥပရုန္ဓိတွာ အာယတနာနိ ပဋိပီဠေတွာ ကာယဉ္စ ဇီဝိတဉ္စ ပရိစ္စဇိတွာ ဒုက္ခေန နိဗ္ဗာနံ ပရိယေသိတွာ ဧကန္တသုခံ နိဗ္ဗာနံ အနုဘဝန္တိ၊ နိဟတပစ္စာမိတ္တာ ဝိယ ရာဇာနော ရဇ္ဇသုခံ. ဧဝံ၊ မဟာရာဇ၊ ဧကန္တသုခံ နိဗ္ဗာနံ၊ န ဒုက္ခေန မိဿံ၊ အညံ နိဗ္ဗာနံ၊ အညံ ဒုက္ခန္တိ.

‘‘အပရမ္ပိ၊ မဟာရာဇ၊ ဥတ္တရိံ ကာရဏံ သုဏောဟိ ဧကန္တသုခံ နိဗ္ဗာနံ၊ န ဒုက္ခေန မိဿံ၊ အညံ ဒုက္ခံ၊ အညံ နိဗ္ဗာနန္တိ. အတ္ထိ၊ မဟာရာဇ၊ အာစရိယာနံ သိပ္ပဝန္တာနံ သိပ္ပသုခံ နာမာ’’တိ? ‘‘အာမ၊ ဘန္တေ၊ အတ္ထိ အာစရိယာနံ သိပ္ပဝန္တာနံ သိပ္ပသုခ’’န္တိ. ‘‘အပိ နု ခေါ တံ၊ မဟာရာဇ၊ သိပ္ပသုခံ ဒုက္ခေန မိဿ’’န္တိ? ‘‘န ဟိ၊ ဘန္တေ’’တိ. ‘‘ကိဿ ပန တေ၊ မဟာရာဇ၊ အာစရိယာ [ဣဒံ ပဒံ သီ. ပီ. ပေါတ္ထကေသု နတ္ထိ] အာစရိယာနံ အဘိဝါဒနပစ္စုဋ္ဌာနေန ဥဒကာဟရဏဃရသမ္မဇ္ဇနဒန္တကဋ္ဌမုခေါဒကာနုပ္ပဒါနေန ဥစ္ဆိဋ္ဌပဋိဂ္ဂဟဏဥစ္ဆာဒနနဟာပနပါဒပရိကမ္မေန သကစိတ္တံ နိက္ခိပိတွာ ပရစိတ္တာနုဝတ္တနေန ဒုက္ခသေယျာယ ဝိသမဘောဇနေန ကာယံ အာတာပေန္တီ’’တိ? ‘‘နေတံ၊ ဘန္တေ နာဂသေန၊ သိပ္ပသုခံ နာမ၊ သိပ္ပပရိယေသနာယ ပုဗ္ဗဘာဂေါ ဧသော၊ ဒုက္ခေန၊ ဘန္တေ နာဂသေန၊ အာစရိယာ သိပ္ပံ ပရိယေသိတွာ သိပ္ပသုခံ အနုဘဝန္တိ၊ ဧဝံ၊ ဘန္တေ နာဂသေန၊ သိပ္ပသုခံ ဒုက္ခေန အမိဿံ၊ အညံ တံ သိပ္ပသုခံ၊ အညံ ဒုက္ခ’’န္တိ. ‘‘ဧဝမေဝ ခေါ၊ မဟာရာဇ၊ ဧကန္တသုခံ နိဗ္ဗာနံ၊ န ဒုက္ခေန မိဿံ. ယေ ပန တံ နိဗ္ဗာနံ ပရိယေသန္တိ၊ တေ ကာယဉ္စ စိတ္တဉ္စ အာတာပေတွာ ဌာနစင်္ကမနိသဇ္ဇာသယနာဟာရံ ပရိဂ္ဂဟေတွာ မိဒ္ဓံ ဥပရုန္ဓိတွာ အာယတနာနိ ပဋိပီဠေတွာ ကာယဉ္စ ဇီဝိတဉ္စ ပရိစ္စဇိတွာ ဒုက္ခေန နိဗ္ဗာနံ ပရိယေသိတွာ ဧကန္တသုခံ နိဗ္ဗာနံ အနုဘဝန္တိ၊ အာစရိယာ ဝိယ သိပ္ပသုခံ. ဧဝံ၊ မဟာရာဇ၊ ဧကန္တသုခံ နိဗ္ဗာနံ၊ န ဒုက္ခေန မိဿံ၊ အညံ ဒုက္ခံ၊ အညံ နိဗ္ဗာန’’န္တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ဧကန္တသုခနိဗ္ဗာနပဉှော နဝမော.