၁၀. နိဗ္ဗာနရူပသဏ္ဌာနပဉှော

၁၀. ‘‘ဘန္တေ နာဂသေန၊ ‘နိဗ္ဗာနံ နိဗ္ဗာန’န္တိ ယံ ဝဒေသိ၊ သက္ကာ ပန တဿ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ? ‘‘အပ္ပဋိဘာဂံ၊ မဟာရာဇ၊ နိဗ္ဗာနံ၊ န သက္ကာ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ. ‘‘ဧတမ္ပာဟံ၊ ဘန္တေ နာဂသေန၊ န သမ္ပဋိစ္ဆာမိ၊ ယံ အတ္ထိဓမ္မဿ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ အပညာပနံ၊ ကာရဏေန မံ သညာပေဟီ’’တိ. ‘‘ဟောတု၊ မဟာရာဇ၊ ကာရဏေန တံ သညာပေဿာမိ. အတ္ထိ၊ မဟာရာဇ၊ မဟာသမုဒ္ဒေါ နာမာ’’တိ? ‘‘အာမ၊ ဘန္တေ၊ အတ္ထေသော မဟာသမုဒ္ဒေါ’’တိ. ‘‘သစေ တံ၊ မဟာရာဇ၊ ကောစိ ဧဝံ ပုစ္ဆေယျ ‘ကိတ္တကံ၊ မဟာရာဇ၊ မဟာသမုဒ္ဒေ ဥဒကံ၊ ကတိ ပန တေ သတ္တာ၊ ယေ မဟာသမုဒ္ဒေ ပဋိဝသန္တီ’တိ၊ ဧဝံ ပုဋ္ဌော တွံ၊ မဟာရာဇ၊ ကိန္တိ တဿ ဗျာကရေယျာသီ’’တိ? ‘‘သစေ မံ၊ ဘန္တေ၊ ကောစိ ဧဝံ ပုစ္ဆေယျ ‘ကိတ္တကံ၊ မဟာရာဇ၊ မဟာသမုဒ္ဒေ ဥဒကံ၊ ကတိ ပန တေ သတ္တာ၊ ယေ မဟာသမုဒ္ဒေ ပဋိဝသန္တီ’တိ၊ တမဟံ၊ ဘန္တေ၊ ဧဝံ ဝဒေယျံ ‘အပုစ္ဆိတဗ္ဗံ မံ တွံ အမ္ဘော ပုရိသ ပုစ္ဆသိ၊ နေသာ ပုစ္ဆာ ကေနစိ ပုစ္ဆိတဗ္ဗာ၊ ဌပနီယော ဧသော ပဉှော. အဝိဘတ္တော လောကက္ခာယိကေဟိ မဟာသမုဒ္ဒေါ၊ န သက္ကာ မဟာသမုဒ္ဒေ ဥဒကံ ပရိမိနိတုံ သတ္တာ ဝါ ယေ တတ္ထ ဝါသမုပဂတာတိ ဧဝါဟံ ဘန္တေ တဿ ပဋိဝစနံ ဒဒေယျ’’’န္တိ.

‘‘ကိဿ ပန၊ တွံ မဟာရာဇ၊ အတ္ထိဓမ္မေ မဟာသမုဒ္ဒေ ဧဝံ ပဋိဝစနံ ဒဒေယျာသိ၊ နနု ဝိဂဏေတွာ [မိနိတွာ (က.)] တဿ အာစိက္ခိတဗ္ဗံ ‘ဧတ္တကံ မဟာသမုဒ္ဒေ ဥဒကံ၊ ဧတ္တကာ စ သတ္တာ မဟာသမုဒ္ဒေ ပဋိဝသန္တီ’’တိ? ‘‘န သက္ကာ၊ ဘန္တေ၊ အဝိသယော ဧသော ပဉှော’’တိ.

‘‘ယထာ၊ မဟာရာဇ၊ အတ္ထိဓမ္မေ ယေဝ မဟာသမုဒ္ဒေ န သက္ကာ ဥဒကံ ပရိဂဏေတုံ [ပရိမိနိတုံ (က.)] သတ္တာ ဝါ ယေ တတ္ထ ဝါသမုပဂတာ၊ ဧဝမေဝ ခေါ၊ မဟာရာဇ၊ အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ၊ ဝိဂဏေယျ၊ မဟာရာဇ၊ ဣဒ္ဓိမာ စေတောဝသိပ္ပတ္တော မဟာသမုဒ္ဒေ ဥဒကံ တတြာသယေ စ သတ္တေ၊ န တွေဝ သော ဣဒ္ဓိမာ စေတောဝသိပ္ပတ္တော သက္ကုဏေယျ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ.

‘‘အပရမ္ပိ၊ မဟာရာဇ၊ ဥတ္တရိံ ကာရဏံ သုဏောဟိ၊ အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုန္တိ. အတ္ထိ၊ မဟာရာဇ၊ ဒေဝေသု အရူပကာယိကာ နာမ ဒေဝါ’’တိ. ‘‘အာမ၊ ဘန္တေ၊ သုယျတိ ‘အတ္ထိ ဒေဝေသု အရူပကာယိကာ နာမ ဒေဝါ’’’တိ. ‘‘သက္ကာ ပန၊ မဟာရာဇ၊ တေသံ အရူပကာယိကာနံ ဒေဝါနံ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ? ‘‘န ဟိ၊ ဘန္တေ’’တိ. ‘‘တေန ဟိ၊ မဟာရာဇ၊ နတ္ထိ အရူပကာယိကာ ဒေဝါ’’တိ? ‘‘အတ္ထိ၊ ဘန္တေ၊ အရူပကာယိကာ ဒေဝါ၊ န စ သက္ကာ တေသံ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ. ‘‘ယထာ၊ မဟာရာဇ၊ အတ္ထိသတ္တာနံ ယေဝ အရူပကာယိကာနံ ဒေဝါနံ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ၊ ဧဝမေဝ ခေါ၊ မဟာရာဇ၊ အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ.

‘‘ဘန္တေ နာဂသေန၊ ဟောတု ဧကန္တသုခံ နိဗ္ဗာနံ၊ န စ သက္ကာ တဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ. အတ္ထိ ပန၊ ဘန္တေ၊ နိဗ္ဗာနဿ ဂုဏံ အညေဟိ အနုပဝိဋ္ဌံ ကိဉ္စိ ဩပမ္မနိဒဿနမတ္တ’’န္တိ? ‘‘သရူပတော၊ မဟာရာဇ၊ နတ္ထိ၊ ဂုဏတော ပန သက္ကာ ကိဉ္စိ ဩပမ္မနိဒဿနမတ္တံ ဥပဒဿယိတု’’န္တိ. ‘‘သာဓု၊ ဘန္တေ နာဂသေန၊ ယထာဟံ လဘာမိ နိဗ္ဗာနဿ ဂုဏတောပိ ဧကဒေသပရိဒီပနမတ္တံ၊ တထာ သီဃံ ဗြူဟိ၊ နိဗ္ဗာပေဟိ မေ ဟဒယပရိဠာဟံ ဝိနယ သီတလမဓုရဝစနမာလုတေနာ’’တိ.

‘‘ပဒုမဿ၊ မဟာရာဇ၊ ဧကော ဂုဏော နိဗ္ဗာနံ အနုပဝိဋ္ဌော၊ ဥဒကဿ ဒွေ ဂုဏာ၊ အဂဒဿ တယော ဂုဏာ၊ မဟာသမုဒ္ဒဿ စတ္တာရော ဂုဏာ၊ ဘောဇနဿ ပဉ္စ ဂုဏာ၊ အာကာသဿ ဒသ ဂုဏာ၊ မဏိရတနဿ တယော ဂုဏာ၊ လောဟိတစန္ဒနဿ တယော ဂုဏာ၊ သပ္ပိမဏ္ဍဿ တယော ဂုဏာ၊ ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’တိ ယံ ဝဒေသိ၊ ကတမော ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’’တိ? ‘‘ယထာ၊ မဟာရာဇ၊ ပဒုမံ အနုပလိတ္တံ ဥဒကေန၊ ဧဝမေဝ ခေါ၊ မဟာရာဇ၊ နိဗ္ဗာနံ သဗ္ဗကိလေသေဟိ အနုပလိတ္တံ. အယံ၊ မဟာရာဇ၊ ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’’တိ.

‘‘ဘန္တေ နာဂသေန၊ ‘ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ ဥဒကံ သီတလံ ပရိဠာဟနိဗ္ဗာပနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သီတလံ သဗ္ဗကိလေသပရိဠာဟနိဗ္ဗာပနံ. အယံ၊ မဟာရာဇ၊ ဥဒကဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဥဒကံ ကိလန္တတသိတပိပါသိတဃမ္မာဘိတတ္တာနံ ဇနပသုပဇာနံ ပိပါသာဝိနယနံ၊ ဧဝမေဝ ခေါ၊ မဟာရာဇ၊ နိဗ္ဗာနံ ကာမတဏှာဘဝတဏှာဝိဘဝတဏှာပိပါသာဝိနယနံ. အယံ၊ မဟာရာဇ၊ ဥဒကဿ ဒုတိယော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘အဂဒဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ အဂဒဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ အဂဒေါ ဝိသပီဠိတာနံ သတ္တာနံ ပဋိသရဏံ၊ ဧဝမေဝ ခေါ၊ မဟာရာဇ၊ နိဗ္ဗာနံ ကိလေသဝိသပီဠိတာနံ သတ္တာနံ ပဋိသရဏံ. အယံ၊ မဟာရာဇ၊ အဂဒဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ အဂဒေါ ရောဂါနံ အန္တကရော၊ ဧဝမေဝ ခေါ၊ မဟာရာဇ၊ နိဗ္ဗာနံ သဗ္ဗဒုက္ခာနံ အန္တကရံ. အယံ၊ မဟာရာဇ၊ အဂဒဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ အဂဒေါ အမတံ၊ ဧဝမေဝ ခေါ၊ မဟာရာဇ၊ နိဗ္ဗာနံ အမတံ. အယံ၊ မဟာရာဇ၊ အဂဒဿ တတိယော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ အဂဒဿ တယော ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ မဟာသမုဒ္ဒေါ သုညော သဗ္ဗကုဏပေဟိ၊ ဧဝမေဝ ခေါ၊ မဟာရာဇ၊ နိဗ္ဗာနံ သုညံ သဗ္ဗကိလေသကုဏပေဟိ. အယံ၊ မဟာရာဇ၊ မဟာသမုဒ္ဒဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ မဟာသမုဒ္ဒေါ မဟန္တော အနောရပါရော၊ န ပရိပူရတိ သဗ္ဗသဝန္တီဟိ၊ ဧဝမေဝ ခေါ၊ မဟာရာဇ၊ နိဗ္ဗာနံ မဟန္တံ အနောရပါရံ၊ န ပူရတိ သဗ္ဗသတ္တေဟိ. အယံ၊ မဟာရာဇ၊ မဟာသမုဒ္ဒဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ မဟာသမုဒ္ဒေါ မဟန္တာနံ ဘူတာနံ အာဝါသော၊ ဧဝမေဝ ခေါ၊ မဟာရာဇ၊ နိဗ္ဗာနံ မဟန္တာနံ အရဟန္တာနံ ဝိမလခီဏာသဝဗလပ္ပတ္တဝသီဘူတမဟာဘူတာနံ အာဝါသော. အယံ၊ မဟာရာဇ၊ မဟာသမုဒ္ဒဿ တတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ မဟာသမုဒ္ဒေါ အပရိမိတဝိဝိဓဝိပုလဝီစိပုပ္ဖသံကုသုမိတော၊ ဧဝမေဝ ခေါ၊ မဟာရာဇ၊ နိဗ္ဗာနံ အပရိမိတဝိဝိဓဝိပုလပရိသုဒ္ဓဝိဇ္ဇာဝိမုတ္တိပုပ္ဖသံကုသုမိတံ. အယံ၊ မဟာရာဇ၊ မဟာသမုဒ္ဒဿ စတုတ္ထော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ ဘောဇနံ သဗ္ဗသတ္တာနံ အာယုဓာရဏံ၊ ဧဝမေဝ ခေါ၊ မဟာရာဇ၊ နိဗ္ဗာနံ သစ္ဆိကတံ ဇရာမရဏနာသနတော အာယုဓာရဏံ. အယံ၊ မဟာရာဇ၊ ဘောဇနဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဘောဇနံ သဗ္ဗသတ္တာနံ ဗလဝဍ္ဎနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သစ္ဆိကတံ သဗ္ဗသတ္တာနံ ဣဒ္ဓိဗလဝဍ္ဎနံ. အယံ၊ မဟာရာဇ၊ ဘောဇနဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဘောဇနံ သဗ္ဗသတ္တာနံ ဝဏ္ဏဇနနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သစ္ဆိကတံ သဗ္ဗသတ္တာနံ ဂုဏဝဏ္ဏဇနနံ. အယံ၊ မဟာရာဇ၊ ဘောဇနဿ တတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဘောဇနံ သဗ္ဗသတ္တာနံ ဒရထဝူပသမနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗကိလေသဒရထဝူပသမနံ. အယံ၊ မဟာရာဇ၊ ဘောဇနဿ စတုတ္ထော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဘောဇနံ သဗ္ဗသတ္တာနံ ဇိဃစ္ဆာဒုဗ္ဗလျပဋိဝိနောဒနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗဒုက္ခဇိဃစ္ဆာဒုဗ္ဗလျပဋိဝိနောဒနံ. အယံ၊ မဟာရာဇ၊ ဘောဇနဿ ပဉ္စမော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ အာကာသော န ဇာယတိ၊ န ဇီယတိ၊ န မီယတိ၊ န စဝတိ၊ န ဥပ္ပဇ္ဇတိ၊ ဒုပ္ပသဟော၊ အစောရာဟရဏော၊ အနိဿိတော၊ ဝိဟဂဂမနော၊ နိရာဝရဏော၊ အနန္တော. ဧဝမေဝ ခေါ၊ မဟာရာဇ၊ နိဗ္ဗာနံ န ဇာယတိ၊ န ဇီယတိ၊ န မီယတိ၊ န စဝတိ၊ န ဥပ္ပဇ္ဇတိ၊ ဒုပ္ပသဟံ၊ အစောရာဟရဏံ၊ အနိဿိတံ၊ အရိယဂမနံ၊ နိရာဝရဏံ၊ အနန္တံ. ဣမေ ခေါ၊ မဟာရာဇ၊ အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ မဏိရတနံ ကာမဒဒံ၊ ဧဝမေဝ ခေါ၊ မဟာရာဇ၊ နိဗ္ဗာနံ ကာမဒဒံ. အယံ၊ မဟာရာဇ၊ မဏိရတနဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ မဏိရတနံ ဟာသကရံ၊ ဧဝမေဝ ခေါ၊ မဟာရာဇ၊ နိဗ္ဗာနံ ဟာသကရံ. အယံ၊ မဟာရာဇ၊ မဏိရတနဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ မဏိရတနံ ဥဇ္ဇောတတ္တကရံ၊ ဧဝမေဝ ခေါ၊ မဟာရာဇ၊ နိဗ္ဗာနံ ဥဇ္ဇောတတ္တကရံ [ဥဇ္ဇောတတ္ထကရံ (သီ. ပီ.)၊ ဥဇ္ဇောတိတတ္ထကရံ (သျာ.)]. အယံ၊ မဟာရာဇ၊ မဏိရတနဿ တတိယော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ လောဟိတစန္ဒနံ ဒုလ္လဘံ၊ ဧဝမေဝ ခေါ၊ မဟာရာဇ၊ နိဗ္ဗာနံ ဒုလ္လဘံ. အယံ၊ မဟာရာဇ၊ လောဟိတစန္ဒနဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ လောဟိတစန္ဒနံ အသမသုဂန္ဓံ၊ ဧဝမေဝ ခေါ၊ မဟာရာဇ၊ နိဗ္ဗာနံ အသမသုဂန္ဓံ. အယံ၊ မဟာရာဇ၊ လောဟိတစန္ဒနဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ လောဟိတစန္ဒနံ သဇ္ဇနပသတ္ထံ [သဗ္ဗဇနပသတ္ထံ (သျာ.)]၊ ဧဝမေဝ ခေါ၊ မဟာရာဇ၊ နိဗ္ဗာနံ အရိယသဇ္ဇနပသတ္ထံ. အယံ၊ မဟာရာဇ၊ လောဟိတစန္ဒနဿ တတိယော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ သပ္ပိမဏ္ဍော ဝဏ္ဏသမ္ပန္နော၊ ဧဝမေဝ ခေါ၊ မဟာရာဇ၊ နိဗ္ဗာနံ ဂုဏဝဏ္ဏသမ္ပန္နံ. အယံ၊ မဟာရာဇ၊ သပ္ပိမဏ္ဍဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ သပ္ပိမဏ္ဍော ဂန္ဓသမ္ပန္နော၊ ဧဝမေဝ ခေါ၊ မဟာရာဇ၊ နိဗ္ဗာနံ သီလဂန္ဓသမ္ပန္နံ. အယံ၊ မဟာရာဇ၊ သပ္ပိမဏ္ဍဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ သပ္ပိမဏ္ဍော ရသသမ္ပန္နော၊ ဧဝမေဝ ခေါ၊ မဟာရာဇ၊ နိဗ္ဗာနံ ရသသမ္ပန္နံ. အယံ၊ မဟာရာဇ၊ သပ္ပိမဏ္ဍဿ တတိယော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’’တိ.

‘‘ဘန္တေ နာဂသေန၊ ‘ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ၊ ကတမေ ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ၊ မဟာရာဇ၊ ဂိရိသိခရံ အစ္စုဂ္ဂတံ၊ ဧဝမေဝ ခေါ၊ မဟာရာဇ၊ နိဗ္ဗာနံ အစ္စုဂတံ. အယံ၊ မဟာရာဇ၊ ဂိရိသိခရဿ ပဌမော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဂိရိသိခရံ အစလံ၊ ဧဝမေဝ ခေါ၊ မဟာရာဇ၊ နိဗ္ဗာနံ အစလံ. အယံ၊ မဟာရာဇ၊ ဂိရိသိခရဿ ဒုတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဂိရိသိခရံ ဒုရဓိရောဟံ၊ ဧဝမေဝ ခေါ၊ မဟာရာဇ၊ နိဗ္ဗာနံ ဒုရဓိရောဟံ သဗ္ဗကိလေသာနံ. အယံ၊ မဟာရာဇ၊ ဂိရိသိခရဿ တတိယော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဂိရိသိခရံ သဗ္ဗဗီဇာနံ အဝိရူဟနံ၊ ဧဝမေဝ ခေါ၊ မဟာရာဇ၊ နိဗ္ဗာနံ သဗ္ဗကိလေသာနံ အဝိရူဟနံ. အယံ၊ မဟာရာဇ၊ ဂိရိသိခရဿ စတုတ္ထော ဂုဏော နိဗ္ဗာနံ အနုပဝိဋ္ဌော. ပုန စပရံ၊ မဟာရာဇ၊ ဂိရိသိခရံ အနုနယပ္ပဋိဃဝိပ္ပမုတ္တံ၊ ဧဝမေဝ ခေါ၊ မဟာရာဇ၊ နိဗ္ဗာနံ အနုနယပ္ပဋိဃဝိပ္ပမုတ္တံ. အယံ၊ မဟာရာဇ၊ ဂိရိသိခရဿ ပဉ္စမော ဂုဏော နိဗ္ဗာနံ အနုပဝိဋ္ဌော. ဣမေ ခေါ၊ မဟာရာဇ၊ ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

နိဗ္ဗာနရူပသဏ္ဌာနပဉှော ဒသမော.