၈. ဓမ္မာဘိသမယပဉှော

၈. ‘‘ဘန္တေ နာဂသေန၊ ယေ တေ သမ္မာ ပဋိပဇ္ဇန္တိ၊ တေသံ သဗ္ဗေသံ ယေဝ ဓမ္မာဘိသမယော ဟောတိ၊ ဥဒါဟု ကဿစိ န ဟောတီ’’တိ? ‘‘ကဿစိ၊ မဟာရာဇ၊ ဟောတိ၊ ကဿစိ န ဟောတီ’’တိ. ‘‘ကဿ ဘန္တေ ဟောတိ၊ ကဿ န ဟောတီ’’တိ? ‘‘တိရစ္ဆာနဂတဿ၊ မဟာရာဇ၊ သုပ္ပဋိပန္နဿာပိ ဓမ္မာဘိသမယော န ဟောတိ၊ ပေတ္တိဝိသယူပပန္နဿ။ပေ။ မိစ္ဆာဒိဋ္ဌိကဿ။ပေ။ ကုဟကဿ။ပေ။ မာတုဃာတကဿ။ပေ။ ပိတုဃာတကဿ။ပေ။ အရဟန္တဃာတကဿ။ပေ။ သံဃဘေဒကဿ။ပေ။ လောဟိတုပ္ပါဒကဿ။ပေ။ ထေယျသံဝါသကဿ။ပေ။ တိတ္ထိယပက္ကန္တဿ။ပေ။ ဘိက္ခုနိဒူသကဿ။ပေ။ တေရသန္နံ ဂရုကာပတ္တီနံ အညတရံ အာပဇ္ဇိတွာ အဝုဋ္ဌိတဿ။ပေ။ ပဏ္ဍကဿ။ပေ။ ဥဘတောဗျဉ္ဇနကဿ သုပ္ပဋိပန္နဿာပိ ဓမ္မာဘိသမယော န ဟောတိ။ပေ။ ယောပိ မနုဿဒဟရကော ဦနကသတ္တဝဿိကော၊ တဿ သုပ္ပဋိပန္နဿာပိ ဓမ္မာဘိသမယော န ဟောတိ. ဣမေသံ ခေါ၊ မဟာရာဇ၊ သောဠသန္နံ ပုဂ္ဂလာနံ သုပ္ပဋိပန္နာနမ္ပိ ဓမ္မာဘိသမယော န ဟောတီ’’တိ.

‘‘ဘန္တေ နာဂသေန၊ ယေ တေ ပန္နရသ ပုဂ္ဂလာ ဝိရုဒ္ဓါ ယေဝ၊ တေသံ ဓမ္မာဘိသမယော ဟောတု ဝါ မာ ဝါ ဟောတု၊ အထ ကေန ကာရဏေန မနုဿဒဟရကဿ ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ? ဧတ္ထ တာဝ ပဉှော ဘဝတိ ‘နနု နာမ ဒဟရကဿ န ရာဂေါ ဟောတိ၊ န ဒေါသော ဟောတိ၊ န မောဟော ဟောတိ၊ န မာနော ဟောတိ၊ န မိစ္ဆာဒိဋ္ဌိ ဟောတိ၊ န အရတိ ဟောတိ၊ န ကာမဝိတက္ကော ဟောတိ၊ အမိဿိတော ကိလေသေဟိ၊ သော နာမ ဒဟရကော ယုတ္တော စ ပတ္တော စ အရဟတိ စ စတ္တာရိ သစ္စာနိ ဧကပဋိဝေဓေန ပဋိဝိဇ္ဈိတု’’’န္တိ.

‘‘တညေဝေတ္ထ၊ မဟာရာဇ၊ ကာရဏံ၊ ယေနာဟံ ကာရဏေန ဘဏာမိ ‘ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတီ’တိ. ယဒိ၊ မဟာရာဇ၊ ဦနကသတ္တဝဿိကော ရဇနီယေ ရဇ္ဇေယျ၊ ဒုဿနီယေ ဒုဿေယျ၊ မောဟနီယေ မုယှေယျ၊ မဒနီယေ မဇ္ဇေယျ၊ ဒိဋ္ဌိံ ဝိဇာနေယျ၊ ရတိဉ္စ အရတိဉ္စ ဝိဇာနေယျ၊ ကုသလာကုသလံ ဝိတက္ကေယျ၊ ဘဝေယျ တဿ ဓမ္မာဘိသမယော၊ အပိ စ၊ မဟာရာဇ၊ ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ၊ အသင်္ခတာ နိဗ္ဗာနဓာတု ဂရုကာ ဘာရိကာ ဝိပုလာ မဟတီ. ဦနကသတ္တဝဿိကော၊ မဟာရာဇ၊ တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ ဂရုကံ ဘာရိကံ ဝိပုလံ မဟတိံ အသင်္ခတံ နိဗ္ဗာနဓာတုံ ပဋိဝိဇ္ဈိတုံ.

‘‘ယထာ၊ မဟာရာဇ၊ သိနေရုပဗ္ဗတရာဇာ ဂရုကော ဘာရိကော ဝိပုလော မဟန္တော၊ အပိ နု ခေါ တံ၊ မဟာရာဇ၊ ပုရိသော အတ္တနော ပါကတိကေန ထာမဗလဝီရိယေန သက္ကုဏေယျ သိနေရုပဗ္ဗတရာဇာနံ ဥဒ္ဓရိတု’’န္တိ? ‘‘န ဟိ၊ ဘန္တေ’’တိ. ‘‘ကေန ကာရဏေန မဟာရာဇာ’’တိ? ‘‘ဒုဗ္ဗလတ္တာ၊ ဘန္တေ၊ ပုရိသဿ၊ မဟန္တတ္တာ သိနေရုပဗ္ဗတရာဇဿာ’’တိ. ‘‘ဧဝမေဝ ခေါ၊ မဟာရာဇ၊ ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ၊ အသင်္ခတာ နိဗ္ဗာနဓာတု ဂရုကာ ဘာရိကာ ဝိပုလာ မဟတီ. ဦနကသတ္တဝဿိကော တေန ဒုဗ္ဗလေန စိတ္တေန ပရိတ္တေန မန္ဒေန အဝိဘူတေန န သက္ကောတိ ဂရုကံ ဘာရိကံ ဝိပုလံ မဟတိံ အသင်္ခတံ နိဗ္ဗာနဓာတုံ ပဋိဝိဇ္ဈိတုံ၊ တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ.

‘‘ယထာ ဝါ ပန၊ မဟာရာဇ၊ အယံ မဟာပထဝီ ဒီဃာ အာယတာ ပုထုလာ ဝိတ္ထတာ ဝိသာလာ ဝိတ္ထိဏ္ဏာ ဝိပုလာ မဟန္တာ၊ အပိ နု ခေါ တံ၊ မဟာရာဇ၊ မဟာပထဝိံ သက္ကာ ပရိတ္တကေန ဥဒကဗိန္ဒုကေန တေမေတွာ ဥဒကစိက္ခလ္လံ ကာတု’’န္တိ? ‘‘န ဟိ၊ ဘန္တေ’’တိ. ‘‘ကေန ကာရဏေန၊ မဟာရာဇာ’’တိ? ‘‘ပရိတ္တတ္တာ၊ ဘန္တေ၊ ဥဒကဗိန္ဒုဿ၊ မဟန္တတ္တာ မဟာပထဝိယာ’’တိ. ‘‘ဧဝမေဝ ခေါ၊ မဟာရာဇ၊ ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ၊ အသင်္ခတာ နိဗ္ဗာနဓာတု ဒီဃာ အာယတာ ပုထုလာ ဝိတ္ထတာ ဝိသာလာ ဝိတ္ထိဏ္ဏာ ဝိပုလာ မဟန္တာ. ဦနကသတ္တဝဿိကော တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ မဟတိံ အသင်္ခတံ နိဗ္ဗာနဓာတုံ ပဋိဝိဇ္ဈိတုံ၊ တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ.

‘‘ယထာ ဝါ ပန၊ မဟာရာဇ၊ အဗလဒုဗ္ဗလပရိတ္တအပ္ပထောကမန္ဒဂ္ဂိ ဘဝေယျ၊ အပိ နု ခေါ၊ မဟာရာဇ၊ တာဝတကေန မန္ဒေန အဂ္ဂိနာ သက္ကာ သဒေဝကေ လောကေ အန္ဓကာရံ ဝိဓမိတွာ အာလောကံ ဒဿေတု’’န္တိ? ‘‘န ဟိ၊ ဘန္တေ’’တိ. ‘‘ကေန ကာရဏေန မဟာရာဇာ’’တိ? ‘‘မန္ဒတ္တာ၊ ဘန္တေ၊ အဂ္ဂိဿ၊ လောကဿ မဟန္တတ္တာ’’တိ. ‘‘ဧဝမေဝ ခေါ၊ မဟာရာဇ၊ ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ၊ မဟတာ စ အဝိဇ္ဇန္ဓကာရေန ပိဟိတံ. တသ္မာ ဒုက္ကရံ ဉာဏာလောကံ ဒဿယိတုံ၊ တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ.

‘‘ယထာ ဝါ ပန၊ မဟာရာဇ၊ အာတုရော ကိသော အဏုပရိမိတကာယော သာလကကိမိ ဟတ္ထိနာဂံ တိဓာ ပဘိန္နံ နဝါယတံ တိဝိတ္ထတံ ဒသပရိဏာဟံ အဋ္ဌရတနိကံ သကဋ္ဌာနမုပဂတံ ဒိသွာ ဂိလိတုံ ပရိကဍ္ဎေယျ၊ အပိ နု ခေါ သော၊ မဟာရာဇ၊ သာလကကိမိ သက္ကုဏေယျ တံ ဟတ္ထိနာဂံ ဂိလိတု’’န္တိ? ‘‘န ဟိ၊ ဘန္တေ’’တိ. ‘‘ကေန ကာရဏေန၊ မဟာရာဇာ’’တိ? ‘‘ပရိတ္တတ္တာ၊ ဘန္တေ၊ သာလကကိမိဿ၊ မဟန္တတ္တာ ဟတ္ထိနာဂဿာ’’တိ. ‘‘ဧဝမေဝ ခေါ၊ မဟာရာဇ၊ ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ၊ မဟတီ အသင်္ခတာ နိဗ္ဗာနဓာတု. သော တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ မဟတိံ အသင်္ခတံ နိဗ္ဗာနဓာတုံ ပဋိဝိဇ္ဈိတုံ၊ တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ဓမ္မာဘိသမယပဉှော အဋ္ဌမော.