၇. စေတိယပါဋိဟာရိယပဉှော

၇. ‘‘ဘန္တေ နာဂသေန၊ သဗ္ဗေသံ ပရိနိဗ္ဗုတာနံ စေတိယေ ပါဋိဟီရံ ဟောတိ၊ ဥဒါဟု ဧကစ္စာနံ ယေဝ ဟောတီ’’တိ? ‘‘ဧကစ္စာနံ၊ မဟာရာဇ၊ ဟောတိ၊ ဧကစ္စာနံ န ဟောတီ’’တိ. ‘‘ကတမေသံ၊ ဘန္တေ၊ ဟောတိ၊ ကတမေသံ န ဟောတီ’’တိ? ‘‘တိဏ္ဏန္နံ၊ မဟာရာဇ၊ အညတရဿ အဓိဋ္ဌာနာ ပရိနိဗ္ဗုတဿ စေတိယေ ပါဋိဟီရံ ဟောတိ. ကတမေသံ တိဏ္ဏန္နံ? ဣဓ၊ မဟာရာဇ၊ အရဟာ ဒေဝမနုဿာနံ အနုကမ္ပာယ တိဋ္ဌန္တောဝ အဓိဋ္ဌာတိ ‘ဧဝံနာမ စေတိယေ ပါဋိဟီရံ ဟောတူ’တိ၊ တဿ အဓိဋ္ဌာနဝသေန စေတိယေ ပါဋိဟီရံ ဟောတိ၊ ဧဝံ အရဟတော အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ.

‘‘ပုန စပရံ၊ မဟာရာဇ၊ ဒေဝတာ မနုဿာနံ အနုကမ္ပာယ ပရိနိဗ္ဗုတဿ စေတိယေ ပါဋိဟီရံ ဒဿေန္တိ ‘ဣမိနာ ပါဋိဟီရေန သဒ္ဓမ္မော နိစ္စသမ္ပဂ္ဂဟိတော ဘဝိဿတိ၊ မနုဿာ စ ပသန္နာ ကုသလေန အဘိဝဍ္ဎိဿန္တီ’တိ၊ ဧဝံ ဒေဝတာနံ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ.

‘‘ပုန စပရံ၊ မဟာရာဇ၊ ဣတ္ထီ ဝါ ပုရိသော ဝါ သဒ္ဓေါ ပသန္နော ပဏ္ဍိတော ဗျတ္တော မေဓာဝီ ဗုဒ္ဓိသမ္ပန္နော ယောနိသော စိန္တယိတွာ ဂန္ဓံ ဝါ မာလံ ဝါ ဒုဿံ ဝါ အညတရံ ဝါ ကိဉ္စိ အဓိဋ္ဌဟိတွာ စေတိယေ ဥက္ခိပတိ ‘ဧဝံနာမ ဟောတူ’တိ၊ တဿပိ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ၊ ဧဝံ မနုဿာနံ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ.

‘‘ဣမေသံ ခေါ၊ မဟာရာဇ၊ တိဏ္ဏန္နံ အညတရဿ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ.

‘‘ယဒိ၊ မဟာရာဇ၊ တေသံ အဓိဋ္ဌာနံ န ဟောတိ၊ ခီဏာသဝဿပိ ဆဠဘိညဿ စေတောဝသိပ္ပတ္တဿ စေတိယေ ပါဋိဟီရံ န ဟောတိ၊ အသတိပိ၊ မဟာရာဇ၊ ပါဋိဟီရေ စရိတံ ဒိသွာ သုပရိသုဒ္ဓံ ဩကပ္ပေတဗ္ဗံ နိဋ္ဌံ ဂန္တဗ္ဗံ သဒ္ဒဟိတဗ္ဗံ ‘သုပရိနိဗ္ဗုတော အယံ ဗုဒ္ဓပုတ္တော’’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

စေတိယပါဋိဟာရိယပဉှော သတ္တမော.