၆. အကာလမရဏပဉှော

၆. ‘‘ဘန္တေ နာဂသေန၊ ယေ တေ သတ္တာ မရန္တိ၊ သဗ္ဗေ တေ ကာလေ ယေဝ မရန္တိ၊ ဥဒါဟု အကာလေပိ မရန္တီ’’တိ? ‘‘အတ္ထိ၊ မဟာရာဇ၊ ကာလေပိ မရဏံ၊ အတ္ထိ အကာလေပိ မရဏ’’န္တိ.

‘‘ဘန္တေ နာဂသေန၊ ကေ ကာလေ မရန္တိ၊ ကေ အကာလေ မရန္တီ’’တိ? ‘‘ဒိဋ္ဌပုဗ္ဗာ ပန၊ မဟာရာဇ၊ တယာ အမ္ဗရုက္ခာ ဝါ ဇမ္ဗုရုက္ခာ ဝါ၊ အညသ္မာ ဝါ ပန ဖလရုက္ခာ ဖလာနိ ပတန္တာနိ အာမာနိ စ ပက္ကာနိ စာ’’တိ? ‘‘အာမ၊ ဘန္တေ’’တိ. ‘‘ယာနိ တာနိ၊ မဟာရာဇ၊ ဖလာနိ ရုက္ခတော ပတန္တိ၊ သဗ္ဗာနိ တာနိ ကာလေ ယေဝ ပတန္တိ၊ ဥဒါဟု အကာလေပီ’’တိ? ‘‘ယာနိ တာနိ၊ ဘန္တေ နာဂသေန၊ ဖလာနိ ပရိပက္ကာနိ ဝိလီနာနိ ပတန္တိ၊ သဗ္ဗာနိ တာနိ ကာလေ ပတန္တိ. ယာနိ ပန တာနိ အဝသေသာနိ ဖလာနိ တေသု ကာနိစိ ကိမိဝိဒ္ဓါနိ ပတန္တိ၊ ကာနိစိ လဂုဠဟတာနိ [သကုဏပဟတာ (သျာ.)၊ လကုဋဟတာနိ (သီ. ပီ. က.)] ပတန္တိ၊ ကာနိစိ ဝါတပ္ပဟတာနိ ပတန္တိ၊ ကာနိစိ အန္တောပူတိကာနိ ဟုတွာ ပတန္တိ၊ သဗ္ဗာနိ တာနိ အကာလေ ပတန္တီ’’တိ. ‘‘ဧဝမေဝ ခေါ၊ မဟာရာဇ၊ ယေ တေ ဇရာဝေဂဟတာ မရန္တိ၊ တေ ယေဝ ကာလေ မရန္တိ၊ အဝသေသာ ကေစိ ကမ္မပ္ပဋိဗာဠှာ မရန္တိ၊ ကေစိ ဂတိပ္ပဋိဗာဠှာ မရန္တိ၊ ကေစိ ကိရိယပ္ပဋိဗာဠှာ မရန္တီ’’တိ.

‘‘ဘန္တေ နာဂသေန၊ ယေ တေ ကမ္မပ္ပဋိဗာဠှာ မရန္တိ၊ ယေပိ တေ ဂတိပ္ပဋိဗာဠှာ မရန္တိ၊ ယေပိ တေ ကိရိယပ္ပဋိဗာဠှာ မရန္တိ၊ ယေပိ တေ ဇရာဝေဂပ္ပဋိဗာဠှာ မရန္တိ၊ သဗ္ဗေ တေ ကာလေ ယေဝ မရန္တိ၊ ယောပိ မာတုကုစ္ဆိဂတော မရတိ၊ သော တဿ ကာလော၊ ကာလေ ယေဝ သော မရတိ. ယောပိ ဝိဇာတဃရေ မရတိ၊ သော တဿ ကာလော၊ သောပိ ကာလေ ယေဝ မရတိ. ယောပိ မာသိကော မရတိ။ပေ။ ယောပိ ဝဿသတိကော မရတိ၊ သော တဿ ကာလော၊ ကာလေ ယေဝ သော မရတိ၊ တေန ဟိ၊ ဘန္တေ နာဂသေန၊ အကာလေ မရဏံ နာမ န ဟောတိ၊ ယေ ကေစိ မရန္တိ၊ သဗ္ဗေ တေ ကာလေ ယေဝ မရန္တီ’’တိ.

‘‘သတ္တိမေ၊ မဟာရာဇ၊ ဝိဇ္ဇမာနေပိ ဥတ္တရိံ အာယုသ္မိံ အကာလေ မရန္တိ. ကတမေ သတ္တ? ဇိဃစ္ဆိတော၊ မဟာရာဇ၊ ဘောဇနံ အလဘမာနော ဥပဟတဗ္ဘန္တရော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ ပိပါသိတော၊ မဟာရာဇ၊ ပါနီယံ အလဘမာနော ပရိသုက္ခဟဒယော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ အဟိနာ ဒဋ္ဌော၊ မဟာရာဇ၊ ဝိသဝေဂါဘိဟတော တိကိစ္ဆကံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ ဝိသမာသိတော၊ မဟာရာဇ၊ ဍယှန္တေသု အင်္ဂပစ္စင်္ဂေသု အဂဒံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ အဂ္ဂိဂတော၊ မဟာရာဇ၊ ဈာယမာနော နိဗ္ဗာပနံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ ဥဒကဂတော၊ မဟာရာဇ၊ ပတိဋ္ဌံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ သတ္တိဟတော၊ မဟာရာဇ၊ အာဗာဓိကော ဘိသက္ကံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ၊ ဣမေ ခေါ၊ မဟာရာဇ၊ သတ္တ ဝိဇ္ဇမာနေပိ ဥတ္တရိံ အာယုသ္မိံ အကာလေ မရန္တိ. တတြာပါဟံ၊ မဟာရာဇ၊ ဧကံသေန ဝဒါမိ.

‘‘အဋ္ဌဝိဓေန၊ မဟာရာဇ၊ သတ္တာနံ ကာလင်္ကိရိယာ ဟောတိ၊ ဝါတသမုဋ္ဌာနေန ပိတ္တသမုဋ္ဌာနေန သေမှသမုဋ္ဌာနေန သန္နိပါတိကေန ဥတုဝိပရိဏာမေန ဝိသမပရိဟာရေန ဩပက္ကမိကေန ကမ္မဝိပါကေန၊ မဟာရာဇ၊ သတ္တာနံ ကာလင်္ကိရိယာ ဟောတိ. တတြ၊ မဟာရာဇ၊ ယဒိဒံ ကမ္မဝိပါကေန ကာလင်္ကိရိယာ၊ သာ ယေဝ တတ္ထ သာမယိကာ [သာမာယိကာ (က.)] ကာလင်္ကိရိယာ၊ အဝသေသာ အသာမယိကာ ကာလင်္ကိရိယာတိ. ဘဝတိ စ –

‘‘‘ဇိဃစ္ဆာယ ပိပါသာယ၊ အဟိဒဋ္ဌာ [အဟိဒဋ္ဌော (သီ.)၊ အဟိနာ ဒဋ္ဌော (ပီ.)] ဝိသေန စ၊

အဂ္ဂိဥဒကသတ္တီဟိ၊ အကာလေ တတ္ထ မီယတိ၊

ဝါတပိတ္တေန သေမှေန၊ သန္နိပါတေနုတူဟိ စ၊

ဝိသမောပက္ကမကမ္မေဟိ၊ အကာလေ တတ္ထ မီယတီ’တိ.

‘‘ကေစိ၊ မဟာရာဇ၊ သတ္တာ ပုဗ္ဗေ ကတေန တေန တေန အကုသလကမ္မဝိပါကေန မရန္တိ. ဣဓ၊ မဟာရာဇ၊ ယော ပုဗ္ဗေ ပရေ ဇိဃစ္ဆာယ မာရေတိ၊ သော ဗဟူနိ ဝဿသတသဟဿာနိ ဇိဃစ္ဆာယ ပရိပီဠိတော ဆာတော ပရိကိလန္တော သုက္ခမိလာတဟဒယော ဗုဘုက္ခိတော [သုက္ခိတော (သီ. ပီ. က.)] ဝိသုက္ခိတော ဈာယန္တော အဗ္ဘန္တရံ ပရိဍယှန္တော ဇိဃစ္ဆာယ ယေဝ မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ ပိပါသာယ မာရေတိ၊ သော ဗဟူနိ ဝဿသတသဟဿာနိ ပေတော ဟုတွာ နိဇ္ဈာမတဏှိကော သမာနော လူခေါ ကိသော ပရိသုက္ခိတဟဒယော ပိပါသာယ ယေဝ မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ အဟိနာ ဍံသာပေတွာ မာရေတိ၊ သော ဗဟူနိ ဝဿသတသဟဿာနိ အဇဂရမုခေနေဝ အဇဂရမုခံ ကဏှသပ္ပမုခေနေဝ ကဏှသပ္ပမုခံ ပရိဝတ္တိတွာ တေဟိ ခါယိတခါယိတော အဟီဟိ ဒဋ္ဌော ယေဝ မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ ဝိသံ ဒတွာ မာရေတိ၊ သော ဗဟူနိ ဝဿသတသဟဿာနိ ဍယှန္တေဟိ အင်္ဂပစ္စင်္ဂေဟိ ဘိဇ္ဇမာနေန သရီရေန ကုဏပဂန္ဓံ ဝါယန္တော ဝိသေနေဝ မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ အဂ္ဂိနာ မာရေတိ၊ သော ဗဟူနိ ဝဿသတသဟဿာနိ အင်္ဂါရပဗ္ဗတေနေဝ အင်္ဂါရပဗ္ဗတံ ယမဝိသယေနေဝ ယမဝိသယံ ပရိဝတ္တိတွာ ဒဍ္ဎဝိဒဍ္ဎဂတ္တော အဂ္ဂိနာ ယေဝ မရတိ ဒဟရောပိ မဇ္ဈိမောပိ မလလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ ဥဒကေန မာရေတိ၊ သော ဗဟူနိ ဝဿသတသဟဿာနိ ဟတဝိလုတ္တဘဂ္ဂဒုဗ္ဗလဂတ္တော ခုဗ္ဘိတစိတ္တော [ခုဘိတစိတ္တော (သီ. ပီ.)] ဥဒကေနေဝ [ဥဒကေ ယေဝ (ဗဟူသု)] မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ.

‘‘ယော ပုဗ္ဗေ ပရေ သတ္တိယာ မာရေတိ၊ သော ဗဟူနိ ဝဿသတသဟဿာနိ ဆိန္နဘိန္နကောဋ္ဋိတဝိကောဋ္ဋိတော သတ္တိမုခသမာဟတော သတ္တိယာ ယေဝ မရတိ ဒဟရောပိ မဇ္ဈိမောပိ မဟလ္လကောပိ၊ ဣဒမ္ပိ တဿ သာမယိကမရဏံ’’.

‘‘ဘန္တေ နာဂသေန၊ အကာလေ မရဏံ အတ္ထီတိ ယံ ဝဒေတိ၊ ဣင်္ဃ မေ တွံ တတ္ထ ကာရဏံ အတိဒိသာတိ’’. ‘‘ယထာ၊ မဟာရာဇ၊ မဟတိမဟာအဂ္ဂိက္ခန္ဓော အာဒိန္နတိဏကဋ္ဌသာခါပလာသော ပရိယာဒိန္နဘက္ခော ဥပါဒါနသင်္ခယာ နိဗ္ဗာယတိ၊ သော အဂ္ဂိ ဝုစ္စတိ ‘အနီတိကော အနုပဒ္ဒဝေါ သမယေ နိဗ္ဗုတော နာမာ’တိ၊ ဧဝမေဝ ခေါ၊ မဟာရာဇ၊ ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘သမယေ မရဏမုပဂတော’တိ.

‘‘ယထာ ဝါ ပန၊ မဟာရာဇ၊ မဟတိမဟာအဂ္ဂိက္ခန္ဓော အာဒိန္နတိဏကဋ္ဌသာခါပလာသော အဿ၊ တံ အပရိယာဒိန္နေ ယေဝ တိဏကဋ္ဌသာခါပလာသေ မဟတိမဟာမေဃော အဘိပ္ပဝဿိတွာ နိဗ္ဗာပေယျ၊ အပိ နု ခေါ၊ မဟာရာဇ၊ မဟာအဂ္ဂိက္ခန္ဓော သမယေ နိဗ္ဗုတော နာမ ဟောတီ’’တိ? ‘‘န ဟိ၊ ဘန္တေ’’တိ. ‘‘ကိဿ ပန သော၊ မဟာရာဇ၊ ပစ္ဆိမော အဂ္ဂိက္ခန္ဓော ပုရိမကေန အဂ္ဂိက္ခန္ဓေန သမသမဂတိကော နာဟောသီ’’တိ? ‘‘အာဂန္တုကေန၊ ဘန္တေ၊ မေဃေန ပဋိပီဠိတော သော အဂ္ဂိက္ခန္ဓော အသမယေ နိဗ္ဗုတော’’တိ. ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ ပိတ္တသမုဋ္ဌာနေန ဝါ သေမှသမုဋ္ဌာနေန ဝါ သန္နိပါတိကေန ဝါ ဥတုပရိဏာမဇေန ဝါ ဝိသမပရိဟာရဇေန ဝါ ဩပက္ကမိကေန ဝါ ဇိဃစ္ဆာယ ဝါ ပိပါသာယ ဝါ သပ္ပဒဋ္ဌေန ဝါ ဝိသမာသိတေန ဝါ အဂ္ဂိနာ ဝါ ဥဒကေန ဝါ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထိ.

‘‘ယထာ ဝါ ပန၊ မဟာရာဇ၊ ဂဂနေ မဟတိမဟာဝလာဟကော ဥဋ္ဌဟိတွာ နိန္နဉ္စ ထလဉ္စ ပရိပူရယန္တော အဘိဝဿတိ၊ သော ဝုစ္စတိ ‘မေဃော အနီတိကော အနုပဒ္ဒဝေါ ဝဿတီ’တိ. ဧဝမေဝ ခေါ၊ မဟာရာဇ၊ ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘သမယေ မရဏမုပဂတော’တိ.

‘‘ယထာ ဝါ ပန၊ မဟာရာဇ၊ ဂဂနေ မဟတိမဟာဝလာဟကော ဥဋ္ဌဟိတွာ အန္တရာယေဝ မဟတာ ဝါတေန အဗ္ဘတ္ထံ ဂစ္ဆေယျ၊ အပိ နု ခေါ သော၊ မဟာရာဇ၊ မဟာဝလာဟကော သမယေ ဝိဂတော နာမ ဟောတီ’’တိ? ‘‘န ဟိ၊ ဘန္တေ’’တိ. ‘‘ကိဿ ပန သော၊ မဟာရာဇ၊ ပစ္ဆိမော ဝလာဟကော ပုရိမေန ဝလာဟကေန သမသမဂတိကော နာဟောသီ’’တိ? ‘‘အာဂန္တုကေန၊ ဘန္တေ၊ ဝါတေန ပဋိပီဠိတော သော ဝလာဟကော အသမယပ္ပတ္တော ယေဝ ဝိဂတော’’တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘ယထာ ဝါ ပန၊ မဟာရာဇ၊ ဗလဝါ အာသီဝိသော ကုပိတော ကိဉ္စိဒေဝ ပုရိသံ ဍံသေယျ၊ တဿ တံ ဝိသံ အနီတိကံ အနုပဒ္ဒဝံ မရဏံ ပါပေယျ၊ တံ ဝိသံ ဝုစ္စတိ ‘အနီတိကမနုပဒ္ဒဝံ ကောဋိဂတ’န္တိ. ဧဝမေဝ ခေါ၊ မဟာရာဇ၊ ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘အနီတိကော အနုပဒ္ဒဝေါ ဇီဝိတကောဋိဂတော သာမယိကံ မရဏမုပဂတော’တိ.

‘‘ယထာ ဝါ ပန၊ မဟာရာဇ၊ ဗလဝတာ အာသီဝိသေန ဒဋ္ဌဿ အန္တရာယေဝ အာဟိတုဏ္ဍိကော အဂဒံ ဒတွာ အဝိသံ ကရေယျ၊ အပိ နု ခေါ တံ၊ မဟာရာဇ၊ ဝိသံ သမယေ ဝိဂတံ နာမ ဟောတီ’’တိ? ‘‘န ဟိ ဘန္တေ’’တိ. ‘‘ကိဿ ပန တံ၊ မဟာရာဇ၊ ပစ္ဆိမံ ဝိသံ ပုရိမကေန ဝိသေန သမသမဂတိကံ နာဟောသီ’’တိ? ‘‘အာဂန္တုကေန၊ ဘန္တေ၊ အဂဒေန ပဋိပီဠိတံ ဝိသံ အကောဋိဂတံ ယေဝ ဝိဂတ’’န္တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘ယထာ ဝါ ပန၊ မဟာရာဇ၊ ဣဿာသော သရံ ပါတေယျ၊ သစေ သော သရော ယထာဂတိဂမနပထမတ္ထကံ ဂစ္ဆတိ၊ သော သရော ဝုစ္စတိ ‘အနီတိကော အနုပဒ္ဒဝေါ ယထာဂတိဂမနပထမတ္ထကံ ဂတော နာမာ’တိ. ဧဝမေဝ ခေါ၊ မဟာရာဇ၊ ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပဂတော’တိ.

‘‘ယထာ ဝါ ပန၊ မဟာရာဇ၊ ဣဿာသော သရံ ပါတေယျ၊ တဿ တံ သရံ တသ္မိံ ယေဝ ခဏေ ကောစိ ဂဏှေယျ၊ အပိ နု ခေါ သော၊ မဟာရာဇ၊ သရော ယထာဂတိဂမနပထမတ္ထကံ ဂတော နာမ ဟောတီ’’တိ? ‘‘န ဟိ၊ ဘန္တေ’’တိ. ‘‘ကိဿ ပန သော၊ မဟာရာဇ၊ ပစ္ဆိမော သရော ပုရိမကေန သရေန သမသမဂတိကော နာဟောသီ’’တိ? ‘‘အာဂန္တုကေန၊ ဘန္တေ၊ ဂဟဏေန တဿ သရဿ ဂမနံ ဥပစ္ဆိန္န’’န္တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘ယထာ ဝါ ပန၊ မဟာရာဇ၊ ယော ကောစိ လောဟမယံ ဘာဇနံ အာကောဋေယျ၊ တဿ အာကောဋနေန သဒ္ဒေါ နိဗ္ဗတ္တိတွာ ယထာဂတိဂမနပထမတ္ထကံ ဂစ္ဆတိ၊ သော သဒ္ဒေါ ဝုစ္စတိ ‘အနီတိကော အနုပဒ္ဒဝေါ ယထာဂတိဂမနပထမတ္ထကံ ဂတော နာမာ’တိ. ဧဝမေဝ ခေါ၊ မဟာရာဇ၊ ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပါဂတော’တိ.

‘‘ယထာ ဝါ ပန၊ မဟာရာဇ၊ ယော ကောစိ လောဟမယံ ဘာဇနံ အာကောဋေယျ၊ တဿ အာကောဋနေန သဒ္ဒေါ နိဗ္ဗတ္တေယျ၊ နိဗ္ဗတ္တေ သဒ္ဒေ အဒူရဂတေ ကောစိ အာမသေယျ၊ သဟ အာမသနေန သဒ္ဒေါ နိရုဇ္ဈေယျ၊ အပိ နု ခေါ သော၊ မဟာရာဇ၊ သဒ္ဒေါ ယထာဂတိဂမနပထမတ္ထကံ ဂတော နာမ ဟောတီ’’တိ? ‘‘န ဟိ၊ ဘန္တေ’’တိ. ‘‘ကိဿ ပန၊ မဟာရာဇ၊ ပစ္ဆိမော သဒ္ဒေါ ပုရိမကေန သဒ္ဒေန သမသမဂတိကော နာဟောသီ’’တိ? ‘‘အာဂန္တုကေန၊ ဘန္တေ၊ အာမသနေန သော သဒ္ဒေါ ဥပရတော’’တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ မဟာရာဇ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘ယထာ ဝါ ပန၊ မဟာရာဇ၊ ခေတ္တေ သုဝိရူဠှံ ဓညဗီဇံ သမ္မာ ပဝတ္တမာနေန ဝဿေန ဩတတဝိတတအာကိဏ္ဏဗဟုဖလံ ဟုတွာ [ဥဋ္ဌိတအာကိဏ္ဏဗဟုဖလံ ဘဝိတွာ (သျာ.)] သဿုဋ္ဌာနသမယံ ပါပုဏာတိ၊ တံ ဓညံ ဝုစ္စတိ ‘အနီတိကမနုပဒ္ဒဝံ သမယသမ္ပတ္တံ နာမ ဟောတီ’တိ. ဧဝမေဝ ခေါ၊ မဟာရာဇ၊ ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ၊ သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပဂတော’တိ.

‘‘ယထာ ဝါ ပန၊ မဟာရာဇ၊ ခေတ္တေ သုဝိရူဠှံ ဓညဗီဇံ ဥဒကေန ဝိကလံ မရေယျ၊ အပိ နု ခေါ တံ၊ မဟာရာဇ၊ ဓညံ အသမယသမ္ပတ္တံ နာမ ဟောတီ’’တိ? ‘‘န ဟိ၊ ဘန္တေ’’တိ. ‘‘ကိဿ ပန တံ၊ မဟာရာဇ၊ ပစ္ဆိမံ ဓညံ ပုရိမကေန ဓညေန သမသမဂတိကံ နာဟောသီ’’တိ? ‘‘အာဂန္တုကေန၊ ဘန္တေ၊ ဥဏှေန ပဋိပီဠိတံ တံ ဓညံ မတ’’န္တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ အကာလေ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘သုတပုဗ္ဗံ ပန တယာ၊ မဟာရာဇ၊ ‘သမ္ပန္နတရုဏသဿံ ကိမယော ဥဋ္ဌဟိတွာ သမူလံ နာသေန္တီ’’’တိ? ‘‘သုတပုဗ္ဗဉ္စေဝ တံ၊ ဘန္တေ၊ အမှေဟိ ဒိဋ္ဌပုဗ္ဗဉ္စာ’’တိ. ‘‘ကိံ နု ခေါ တံ၊ မဟာရာဇ၊ သဿံ ကာလေ နဋ္ဌံ၊ ဥဒါဟု အကာလေ နဋ္ဌ’’န္တိ? ‘‘အကာလေ၊ ဘန္တေ၊ ယဒိ ခေါ တံ၊ ဘန္တေ၊ သဿံ ကိမယော န ခါဒေယျုံ၊ သဿုဒ္ဓရဏသမယံ ပါပုဏေယျာ’’တိ. ‘‘ကိံ ပန၊ မဟာရာဇ၊ အာဂန္တုကေန ဥပဃာတေန သဿံ ဝိနဿတိ၊ နိရုပဃာတံ သဿံ သဿုဒ္ဓရဏသမယံ ပါပုဏာတီ’’တိ? ‘‘အာမ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ။ပေ။ သတ္တိဝေဂပ္ပဋိပီဠိတော ဝါ မရတိ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီတိ.

‘‘သုတပုဗ္ဗံ ပန တယာ၊ မဟာရာဇ၊ ‘သမ္ပန္နေ သဿေ ဖလဘာရနမိတေ မဉ္စရိတပတ္တေ ကရကဝဿံ နာမ ဝဿဇာတိ နိပတိတွာ ဝိနာသေတိ အဖလံ ကရောတီ’တိ? ‘‘သုတပုဗ္ဗဉ္စေဝ တံ၊ ဘန္တေ၊ အမှေဟိ ဒိဋ္ဌပုဗ္ဗဉ္စာ’’တိ. ‘‘အပိ နု ခေါ တံ၊ မဟာရာဇ၊ သဿံ ကာလေ နဋ္ဌံ၊ ဥဒါဟု အကာလေ နဋ္ဌ’’န္တိ? ‘‘အကာလေ၊ ဘန္တေ၊ ယဒိ ခေါ တံ၊ ဘန္တေ၊ သဿံ ကရကဝဿံ န ဝဿေယျ သဿုဒ္ဓရဏသမယံ ပါပုဏေယျာ’’တိ. ‘‘ကိံ ပန၊ မဟာရာဇ၊ အာဂန္တုကေန ဥပဃာတေန သဿံ ဝိနဿတိ၊ နိရုပဃာတံ သဿံ သဿုဒ္ဓရဏသမယံ ပါပုဏာတီ’’တိ? ‘‘အာမ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ယော ကောစိ အကာလေ မရတိ၊ သော အာဂန္တုကေန ရောဂေန ပဋိပီဠိတော ဝါတသမုဋ္ဌာနေန ဝါ ပိတ္တသမုဋ္ဌာနေန ဝါ သေမှသမုဋ္ဌာနေန ဝါ သန္နိပါတိကေန ဝါ ဥတုပရိဏာမဇေန ဝါ ဝိသမပရိဟာရဇေန ဝါ ဩပက္ကမိကေန ဝါ ဇိဃစ္ဆာယ ဝါ ပိပါသာယ ဝါ သပ္ပဒဋ္ဌေန ဝါ ဝိသမာသိတေန ဝါ အဂ္ဂိနာ ဝါ ဥဒကေန ဝါ သတ္တိဝေဂပ္ပဋိပီဠိတော ဝါ အကာလေ မရတိ. ယဒိ ပန အာဂန္တုကေန ရောဂေန ပဋိပီဠိတော န ဘဝေယျ၊ သမယေဝ မရဏံ ပါပုဏေယျ. ဣဒမေတ္ထ၊ မဟာရာဇ၊ ကာရဏံ၊ ယေန ကာရဏေန အကာလေ မရဏံ အတ္ထီ’’တိ.

‘‘အစ္ဆရိယံ၊ ဘန္တေ နာဂသေန၊ အဗ္ဘုတံ ဘန္တေ နာဂသေန၊ သုဒဿိတံ ကာရဏံ၊ သုဒဿိတံ ဩပမ္မံ အကာလေ မရဏဿ ပရိဒီပနာယ၊ ‘အတ္ထိ အကာလေ မရဏ’န္တိ ဥတ္တာနီကတံ ပါကဋံ ကတံ ဝိဘူတံ ကတံ၊ အစိတ္တဝိက္ခိတ္တကောပိ၊ ဘန္တေ နာဂသေန၊ မနုဇော ဧကမေကေနပိ တာဝ ဩပမ္မေန နိဋ္ဌံ ဂစ္ဆေယျ ‘အတ္ထိ အကာလေ မရဏ’န္တိ၊ ကိံ ပန မနုဇော သစေတနော? ပဌမောပမ္မေနေဝါဟံ၊ ဘန္တေ၊ သညတ္တော ‘အတ္ထိ အကာလေ မရဏ’န္တိ၊ အပိ စ အပရာပရံ နိဗ္ဗာဟနံ သောတုကာမော န သမ္ပဋိစ္ဆိ’’န္တိ.

အကာလမရဏပဉှော ဆဋ္ဌော.