၂. ဒုက္ကရကာရိကပဉှော

၂. ‘‘ဘန္တေ နာဂသေန၊ သဗ္ဗေဝ ဗောဓိသတ္တာ ဒုက္ကရကာရိကံ ကရောန္တိ၊ ဥဒါဟု ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ? ‘‘နတ္ထိ၊ မဟာရာဇ၊ သဗ္ဗေသံ ဗောဓိသတ္တာနံ ဒုက္ကရကာရိကာ၊ ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ.

‘‘ဘန္တေ နာဂသေန၊ ယဒိ ဧဝံ အယုတ္တံ၊ ယံ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတီ’’တိ. ‘‘စတူဟိ၊ မဟာရာဇ၊ ဌာနေဟိ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတိ. ကတမေဟိ စတူဟိ? ကုလဝေမတ္တတာ ပဓာနဝေမတ္တတာ [အဒ္ဓါနဝေမတ္တတာ (သီ. သျာ. ပီ.)] အာယုဝေမတ္တတာ ပမာဏဝေမတ္တတာတိ. ဣမေဟိ ခေါ၊ မဟာရာဇ၊ စတူဟိ ဌာနေဟိ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတိ. သဗ္ဗေသမ္ပိ၊ မဟာရာဇ၊ ဗုဒ္ဓါနံ ရူပေ သီလေ သမာဓိမှိ ပညာယ ဝိမုတ္တိယာ ဝိမုတ္တိဉာဏဒဿနေ စတုဝေသာရဇ္ဇေ ဒသတထာဂတဗလေ ဆအသာဓာရဏဉာဏေ စုဒ္ဒသဗုဒ္ဓဉာဏေ အဋ္ဌာရသဗုဒ္ဓဓမ္မေ ကေဝလေ စ ဗုဒ္ဓဂုဏေ [ဗုဒ္ဓဓမ္မေ (သီ. ပီ.)] နတ္ထိ ဝေမတ္တတာ၊ သဗ္ဗေပိ ဗုဒ္ဓါ ဗုဒ္ဓဓမ္မေဟိ သမသမာ’’တိ.

‘‘ယဒိ၊ ဘန္တေ နာဂသေန၊ သဗ္ဗေပိ ဗုဒ္ဓါ ဗုဒ္ဓဓမ္မေဟိ သမသမာ၊ ကေန ကာရဏေန ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ? ‘‘အပရိပက္ကေ၊ မဟာရာဇ၊ ဉာဏေ အပရိပက္ကာယ ဗောဓိယာ ဂေါတမော ဗောဓိသတ္တော နေက္ခမ္မမဘိနိက္ခန္တော အပရိပက္ကံ ဉာဏံ ပရိပါစယမာနေန ဒုက္ကရကာရိကာ ကတာ’’တိ.

‘‘ဘန္တေ နာဂသေန၊ ကေန ကာရဏေန ဗောဓိသတ္တော အပရိပက္ကေ ဉာဏေ အပရိပက္ကာယ ဗောဓိယာ မဟာဘိနိက္ခမနံ နိက္ခန္တော၊ နနု နာမ ဉာဏံ ပရိပါစေတွာ ပရိပက္ကေ ဉာဏေ နိက္ခမိတဗ္ဗ’’န္တိ?

‘‘ဗောဓိသတ္တော၊ မဟာရာဇ၊ ဝိပရီတံ ဣတ္ထာဂါရံ ဒိသွာ ဝိပ္ပဋိသာရီ အဟောသိ၊ တဿ ဝိပ္ပဋိသာရိဿ အရတိ ဥပ္ပဇ္ဇိ၊ အရတိစိတ္တံ ဥပ္ပန္နံ ဒိသွာ အညတရော မာရကာယိကော ဒေဝပုတ္တော ‘အယံ ခေါ ကာလော အရတိစိတ္တဿ ဝိနောဒနာယာ’တိ ဝေဟာသေ ဌတွာ ဣဒံ ဝစနမဗြဝိ –

‘‘မာရိသ၊ မာ ခေါ တွံ ဥက္ကဏ္ဌိတော အဟောသိ၊ ဣတော တေ သတ္တမေ ဒိဝသေ ဒိဗ္ဗံ စက္ကရတနံ ပါတုဘဝိဿတိ သဟဿာရံ သနေမိကံ သနာဘိကံ သဗ္ဗာကာရပရိပူရံ၊ ပထဝိဂတာနိ စ တေ ရတနာနိ အာကာသဋ္ဌာနိ စ သယမေဝ ဥပဂစ္ဆိဿန္တိ၊ ဒွိသဟဿပရိတ္တဒီပပရိဝါရေသု စတူသု မဟာဒီပေသု ဧကမုခေန အာဏာ ပဝတ္တိဿတိ၊ ပရောသဟဿဉ္စ တေ ပုတ္တာ ဘဝိဿန္တိ သူရာ ဝီရင်္ဂရူပါ ပရသေနပ္ပမဒ္ဒနာ၊ တေဟိ ပုတ္တေဟိ ပရိကိဏ္ဏော သတ္တရတနသမန္နာဂတော စတုဒ္ဒီပမနုသာသိဿသီ’တိ.

‘‘ယထာ နာမ ဒိဝသသန္တတ္တံ အယောသူလံ သဗ္ဗတ္ထ ဥပဍဟန္တံ ကဏ္ဏသောတံ ပဝိသေယျ၊ ဧဝမေဝ ခေါ၊ မဟာရာဇ၊ ဗောဓိသတ္တဿ တံ ဝစနံ ကဏ္ဏသောတံ ပဝိသိတ္ထ၊ ဣတိ သော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇိ.

‘‘ယထာ ပန၊ မဟာရာဇ၊ မဟတိမဟာအဂ္ဂိက္ခန္ဓော ဇလမာနော အညေန ကဋ္ဌေန ဥပဍဟိတော ဘိယျောသောမတ္တာယ ဇလေယျ၊ ဧဝမေဝ ခေါ၊ မဟာရာဇ၊ ဗောဓိသတ္တော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇိ.

‘‘ယထာ ဝါ ပန၊ မဟာရာဇ၊ မဟာပထဝီ ပကတိတိန္တာ နိဗ္ဗတ္တဟရိတသဒ္ဒလာ အာသိတ္တောဒကာ စိက္ခလ္လဇာတာ ပုနဒေဝ မဟာမေဃေ အဘိဝုဋ္ဌေ ဘိယျောသောမတ္တာယ စိက္ခလ္လတရာ အဿ၊ ဧဝမေဝ ခေါ၊ မဟာရာဇ၊ ဗောဓိသတ္တော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇီ’’တိ.

‘‘အပိ နု ခေါ၊ ဘန္တေ နာဂသေန၊ ဗောဓိသတ္တဿ ယဒိ သတ္တမေ ဒိဝသေ ဒိဗ္ဗံ စက္ကရတနံ နိဗ္ဗတ္တေယျ၊ ပဋိနိဝတ္တေယျ ဗောဓိသတ္တော ဒိဗ္ဗေ စက္ကရတနေ နိဗ္ဗတ္တေ’’တိ? ‘‘န ဟိ၊ မဟာရာဇ၊ သတ္တမေ ဒိဝသေ ဗောဓိသတ္တဿ ဒိဗ္ဗံ စက္ကရတနံ နိဗ္ဗတ္တေယျ၊ အပိ စ ပလောဘနတ္ထာယ တာယ ဒေဝတာယ မုသာ ဘဏိတံ၊ ယဒိပိ၊ မဟာရာဇ၊ သတ္တမေ ဒိဝသေ ဒိဗ္ဗံ စက္ကရတနံ နိဗ္ဗတ္တေယျ၊ ဗောဓိသတ္တော န နိဝတ္တေယျ. ကိံ ကာရဏံ? ‘အနိစ္စ’န္တိ၊ မဟာရာဇ၊ ဗောဓိသတ္တော ဒဠှံ အဂ္ဂဟေသိ၊ ‘ဒုက္ခံ အနတ္တာ’တိ ဒဠှံ အဂ္ဂဟေသိ၊ ဥပါဒါနက္ခယံ ပတ္တော.

‘‘ယထာ၊ မဟာရာဇ၊ အနောတတ္တဒဟတော ဥဒကံ ဂင်္ဂံ နဒိံ ပဝိသတိ၊ ဂင်္ဂါယ နဒိယာ မဟာသမုဒ္ဒံ ပဝိသတိ၊ မဟာသမုဒ္ဒတော ပါတာလမုခံ ပဝိသတိ၊ အပိ နု၊ မဟာရာဇ၊ တံ ဥဒကံ ပါတာလမုခဂတံ ပဋိနိဝတ္တိတွာ မဟာသမုဒ္ဒံ ပဝိသေယျ၊ မဟာသမုဒ္ဒတော ဂင်္ဂံ နဒိံ ပဝိသေယျ၊ ဂင်္ဂါယ နဒိယာ ပုန အနောတတ္တံ ပဝိသေယျာ’’တိ? ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ဗောဓိသတ္တေန ကပ္ပါနံ သတသဟဿံ စတုရော စ အသင်္ချေယျေ ကုသလံ ပရိပါစိတံ ဣမဿ ဘဝဿ ကာရဏာ၊ သောယံ အန္တိမဘဝေါ အနုပ္ပတ္တော ပရိပက္ကံ ဗောဓိဉာဏံ ဆဟိ ဝဿေဟိ ဗုဒ္ဓေါ ဘဝိဿတိ သဗ္ဗညူ လောကေ အဂ္ဂပုဂ္ဂလော၊ အပိ နု ခေါ၊ မဟာရာဇ၊ ဗောဓိသတ္တော စက္ကရတနကာရဏာ [စက္ကရတနဿ ကာရဏာ (သီ. သျာ. ပီ.)] ပဋိနိဝတ္တေယျာ’’တိ [ပရိနိဝတ္တေယျာတိ (သီ. ပီ. က.)]? ‘‘န ဟိ၊ ဘန္တေ’’တိ.

‘‘အပိ စ၊ မဟာရာဇ၊ မဟာပထဝီ ပရိဝတ္တေယျ သကာနနာ သပဗ္ဗတာ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ. အာရောဟေယျပိ စေ၊ မဟာရာဇ၊ ဂင်္ဂါယ ဥဒကံ ပဋိသောတံ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ၊ ဝိသုဿေယျပိ စေ၊ မဟာရာဇ၊ မဟာသမုဒ္ဒေါ အပရိမိတဇလဓရော ဂေါပဒေ ဥဒကံ ဝိယ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ၊ ဖလေယျပိ စေ၊ မဟာရာဇ၊ သိနေရုပဗ္ဗတရာဇာ သတဓာ ဝါ သဟဿဓာ ဝါ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ၊ ပတေယျုမ္ပိ စေ၊ မဟာရာဇ၊ စန္ဒိမသူရိယာ သတာရကာ လေဍ္ဍု ဝိယ ဆမာယံ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ၊ သံဝတ္တေယျပိ စေ၊ မဟာရာဇ၊ အာကာသော ကိလဉ္ဇမိဝ၊ နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ. ကိံ ကာရဏာ? ပဒါလိတတ္တာ သဗ္ဗဗန္ဓနာန’’န္တိ.

‘‘ဘန္တေ နာဂသေန၊ ကတိ လောကေ ဗန္ဓနာနီ’’တိ? ‘‘ဒသ ခေါ ပနိမာနိ၊ မဟာရာဇ၊ လောကေ ဗန္ဓနာနိ၊ ယေဟိ ဗန္ဓနေဟိ ဗဒ္ဓါ သတ္တာ န နိက္ခမန္တိ၊ နိက္ခမိတွာပိ ပဋိနိဝတ္တန္တိ. ကတမာနိ ဒသ? မာတာ၊ မဟာရာဇ၊ လောကေ ဗန္ဓနံ၊ ပိတာ၊ မဟာရာဇ၊ လောကေ ဗန္ဓနံ၊ ဘရိယာ၊ မဟာရာဇ၊ လောကေ ဗန္ဓနံ၊ ပုတ္တာ၊ မဟာရာဇ၊ လောကေ ဗန္ဓနံ၊ ဉာတီ၊ မဟာရာဇ၊ လောကေ ဗန္ဓနံ၊ မိတ္တံ၊ မဟာရာဇ၊ လောကေ ဗန္ဓနံ၊ ဓနံ၊ မဟာရာဇ၊ လောကေ ဗန္ဓနံ၊ လာဘသက္ကာရော၊ မဟာရာဇ၊ လောကေ ဗန္ဓနံ၊ ဣဿရိယံ၊ မဟာရာဇ၊ လောကေ ဗန္ဓနံ၊ ပဉ္စ ကာမဂုဏာ၊ မဟာရာဇ၊ လောကေ ဗန္ဓနံ၊ ဣမာနိ ခေါ မဟာရာဇ ဒသ လောကေ ဗန္ဓနာနိ၊ ယေဟိ ဗန္ဓနေဟိ ဗဒ္ဓါ သတ္တာ န နိက္ခမန္တိ၊ နိက္ခမိတွာပိ ပဋိနိဝတ္တန္တိ၊ တာနိ ဒသ ဗန္ဓနာနိ ဗောဓိသတ္တဿ ဆိန္နာနိ ပဒါလိတာနိ၊ တသ္မာ၊ မဟာရာဇ၊ ဗောဓိသတ္တော န ပဋိနိဝတ္တတီ’’တိ.

‘‘ဘန္တေ နာဂသေန၊ ယဒိ ဗောဓိသတ္တော ဥပ္ပန္နေ အရတိစိတ္တေ ဒေဝတာယ ဝစနေန အပရိပက္ကေ ဉာဏေ အပရိပက္ကာယ ဗောဓိယာ နေက္ခမ္မမဘိနိက္ခန္တော၊ ကိံ တဿ ဒုက္ကရကာရိကာယ ကတာယ၊ နနု နာမ သဗ္ဗဘက္ခေန ဘဝိတဗ္ဗံ ဉာဏပရိပါကံ အာဂမယမာနေနာ’’တိ?

‘‘ဒသ ခေါ ပနိမေ၊ မဟာရာဇ၊ ပုဂ္ဂလာ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ. ကတမေ ဒသ? ဣတ္ထီ၊ မဟာရာဇ၊ ဝိဓဝါ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ. ဒုဗ္ဗလော၊ မဟာရာဇ၊ ပုဂ္ဂလော။ပေ။ အမိတ္တဉာတိ၊ မဟာရာဇ၊ ပုဂ္ဂလော။ပေ။ မဟဂ္ဃသော၊ မဟာရာဇ၊ ပုဂ္ဂလော။ပေ။ အဂရုကုလဝါသိကော၊ မဟာရာဇ၊ ပုဂ္ဂလော။ပေ။ ပါပမိတ္တော၊ မဟာရာဇ၊ ပုဂ္ဂလော။ပေ။ ဓနဟီနော၊ မဟာရာဇ၊ ပုဂ္ဂလော။ပေ။ အာစာရဟီနော၊ မဟာရာဇ၊ ပုဂ္ဂလော။ပေ။ ကမ္မဟီနော၊ မဟာရာဇ၊ ပုဂ္ဂလော။ပေ။ ပယောဂဟီနော၊ မဟာရာဇ၊ ပုဂ္ဂလော လောကသ္မိံ ဩညာတော အဝညာတော ဟီဠိတော ခီဠိတော ဂရဟိတော ပရိဘူတော အစိတ္တီကတော. ဣမေ ခေါ၊ မဟာရာဇ၊ ဒသ ပုဂ္ဂလာ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ. ဣမာနိ ခေါ၊ မဟာရာဇ၊ ဒသ ဌာနာနိ အနုဿရမာနဿ ဗောဓိသတ္တဿ ဧဝံ သညာ ဥပ္ပဇ္ဇိ ‘မာဟံ ကမ္မဟီနော အဿံ ပယောဂဟီနော ဂရဟိတော ဒေဝမနုဿာနံ၊ ယံနူနာဟံ ကမ္မဿာမီ အဿံ ကမ္မဂရု ကမ္မာဓိပတေယျော ကမ္မသီလော ကမ္မဓောရယှော ကမ္မနိကေတဝါ အပ္ပမတ္တော ဝိဟရေယျ’န္တိ၊ ဧဝံ ခေါ၊ မဟာရာဇ၊ ဗောဓိသတ္တော ဉာဏံ ပရိပါစေန္တော ဒုက္ကရကာရိကံ အကာသီ’’တိ.

‘‘ဘန္တေ နာဂသေန၊ ဗောဓိသတ္တော ဒုက္ကရကာရိကံ ကရောန္တော ဧဝမာဟ ‘န ခေါ ပနာဟံ ဣမာယ ကဋုကာယ ဒုက္ကရကာရိကာယ အဓိဂစ္ဆာမိ ဥတ္တရိမနုဿဓမ္မံ အလမရိယဉာဏဒဿနဝိသေသံ၊ သိယာ နု ခေါ အညော မဂ္ဂေါ ဗောဓာယာ’တိ. အပိ နု တသ္မိံ သမယေ ဗောဓိသတ္တဿ မဂ္ဂံ အာရဗ္ဘ သတိသမ္မောသော အဟောသီ’’တိ?

‘‘ပဉ္စဝီသတိ ခေါ ပနိမေ၊ မဟာရာဇ၊ စိတ္တဒုဗ္ဗလီကရဏာ ဓမ္မာ၊ ယေဟိ ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ. ကတမေ ပဉ္စဝီသတိ? ကောဓော၊ မဟာရာဇ၊ စိတ္တဒုဗ္ဗလီကရဏော ဓမ္မော၊ ယေန ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ၊ ဥပနာဟော။ပေ။ မက္ခော။ပေ။ ပဠာသော။ပေ။ ဣဿာ။ပေ။ မစ္ဆရိယံ။ပေ။ မာယာ။ပေ။ သာဌေယျံ။ပေ။ ထမ္ဘော။ပေ။ သာရမ္ဘော။ပေ။ မာနော။ပေ။ အတိမာနော ။ပေ။ မဒေါ။ပေ။ ပမာဒေါ။ပေ။ ထိနမိဒ္ဓံ။ပေ။ တန္ဒိ [နန္ဒီ (ပီ. က.)] ။ပေ။ အာလသျံ။ပေ။ ပါပမိတ္တတာ။ပေ။ ရူပါ။ပေ။ သဒ္ဒါ။ပေ။ ဂန္ဓာ။ပေ။ ရသာ။ပေ။ ဖောဋ္ဌဗ္ဗာ။ပေ။ ခုဒါပိပါသာ။ပေ။ အရတိ၊ မဟာရာဇ၊ စိတ္တဒုဗ္ဗလီကရဏော ဓမ္မော၊ ယေန ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ. ဣမေ ခေါ၊ မဟာရာဇ၊ ပဉ္စဝီသတိ စိတ္တဒုဗ္ဗလီကရဏာ ဓမ္မာ၊ ယေဟိ ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ.

ဗောဓိသတ္တဿ ခေါ၊ မဟာရာဇ၊ ခုဒါပိပါသာ [ခုဒါပိပါသာ (သီ. ပီ. က.)] ကာယံ ပရိယာဒိယိံသု၊ ကာယေ ပရိယာဒိန္နေ စိတ္တံ န သမ္မာ သမာဓိယတိ အာသဝါနံ ခယာယ. သတသဟဿံ၊ မဟာရာဇ၊ ကပ္ပါနံ [ကပ္ပေ (က.)] စတုရော စ အသင်္ချေယျေ ကပ္ပေ ဗောဓိသတ္တော စတုန္နံ ယေဝ အရိယသစ္စာနံ အဘိသမယံ အနွေသိ တာသု တာသု ဇာတီသု၊ ကိံ ပနဿ ပစ္ဆိမေ ဘဝေ အဘိသမယဇာတိယံ မဂ္ဂံ အာရဗ္ဘ သတိသမ္မောသော ဟေဿတိ? အပိ စ၊ မဟာရာဇ၊ ဗောဓိသတ္တဿ သညာမတ္တံ ဥပ္ပဇ္ဇိ ‘သိယာ နု ခေါ အညော မဂ္ဂေါ ဗောဓာယာ’တိ. ပုဗ္ဗေ ခေါ၊ မဟာရာဇ၊ ဗောဓိသတ္တော ဧကမာသိကော သမာနော ပိတု သက္ကဿ ကမ္မန္တေ သီတာယ ဇမ္ဗုစ္ဆာယာယ သိရိသယနေ ပလ္လင်္ကံ အာဘုဇိတွာ နိသိန္နော ဝိဝိစ္စေဝ ကာမေဟိ ဝိစိစ္စ အကုသလေဟိ ဓမ္မေဟိ သဝိတက္ကံ သဝိစာရံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟာသိ။ပေ။ စတုတ္ထံ ဈာနံ ဥပသမ္ပဇ္ဇ ဝိဟာသီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမိ၊ ဉာဏံ ပရိပါစေန္တော ဗောဓိသတ္တော ဒုက္ကရကာရိကံ အကာသီ’’တိ.

ဒုက္ကရကာရိကပဉှော ဒုတိယော.