၂. ခီဏာသဝဘာဝပဉှော

၂. ‘‘ဘန္တေ နာဂသေန၊ တုမှေ ဘဏထ ‘ယော ဂိဟီ အရဟတ္တံ ပတ္တော၊ ဒွေ ဝါဿ ဂတိယော ဘဝန္တိ အနညာ၊ တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ. န သော ဒိဝသော သက္ကာ အတိက္ကမေတု’န္တိ. သစေ သော၊ ဘန္တေ နာဂသေန၊ တသ္မိံ ဒိဝသေ အာစရိယံ ဝါ ဥပဇ္ဈာယံ ဝါ ပတ္တစီဝရံ ဝါ န လဘေထ၊ အပိ နု ခေါ သော အရဟာ သယံ ဝါ ပဗ္ဗဇေယျ ဒိဝသံ ဝါ အတိက္ကမေယျ၊ အညော ကောစိ အရဟာ ဣဒ္ဓိမာ အာဂန္တွာ တံ ပဗ္ဗာဇေယျ ဝါ ပရိနိဗ္ဗာယေယျ ဝါ’’တိ? ‘‘န သော၊ မဟာရာဇ၊ အရဟာ သယံ ပဗ္ဗဇေယျ၊ သယံ ပဗ္ဗဇန္တော ထေယျံ အာပဇ္ဇတိ၊ န စ ဒိဝသံ အတိက္ကမေယျ၊ အညဿ အရဟန္တဿ အာဂမနံ ဘဝေယျ ဝါ န ဝါ ဘဝေယျ၊ တသ္မိံ ယေဝ ဒိဝသေ ပရိနိဗ္ဗာယေယျာ’’တိ. ‘‘တေန ဟိ၊ ဘန္တေ နာဂသေန၊ အရဟတ္တဿ သန္တဘာဝေါ ဝိဇဟိတော ဟောတိ၊ ယေန အဓိဂတဿ ဇီဝိတဟာရော ဘဝတီ’’တိ.

‘‘ဝိသမံ၊ မဟာရာဇ၊ ဂိဟိလိင်္ဂံ၊ ဝိသမေ လိင်္ဂေ လိင်္ဂဒုဗ္ဗလတာယ အရဟတ္တံ ပတ္တော ဂိဟီ တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ. နေသော၊ မဟာရာဇ၊ ဒေါသော အရဟတ္တဿ၊ ဂိဟိလိင်္ဂဿေဝေသော ဒေါသော ယဒိဒံ လိင်္ဂဒုဗ္ဗလတာ.

‘‘ယထာ၊ မဟာရာဇ၊ ဘောဇနံ သဗ္ဗသတ္တာနံ အာယုပါလကံ ဇီဝိတရက္ခကံ ဝိသမကောဋ္ဌဿ မန္ဒဒုဗ္ဗလဂဟဏိကဿ အဝိပါကေန ဇီဝိတံ ဟရတိ. နေသော၊ မဟာရာဇ၊ ဒေါသော ဘောဇနဿ၊ ကောဋ္ဌဿေဝေသော ဒေါသော ယဒိဒံ အဂ္ဂိဒုဗ္ဗလတာ. ဧဝမေဝ ခေါ၊ မဟာရာဇ၊ ဝိသမေ လိင်္ဂေ လိင်္ဂဒုဗ္ဗလတာယ အရဟတ္တံ ပတ္တော ဂိဟီ တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ. နေသော၊ မဟာရာဇ၊ ဒေါသော အရဟတ္တဿ၊ ဂိဟိလိင်္ဂဿေဝေသော ဒေါသော ယဒိဒံ လိင်္ဂဒုဗ္ဗလတာ.

‘‘ယထာ ဝါ ပန၊ မဟာရာဇ၊ ပရိတ္တံ တိဏသလာကံ ဥပရိ ဂရုကေ ပါသာဏေ ဌပိတေ ဒုဗ္ဗလတာယ ဘိဇ္ဇိတွာ ပတတိ. ဧဝမေဝ ခေါ၊ မဟာရာဇ၊ အရဟတ္တံ ပတ္တော ဂိဟီ တေန လိင်္ဂေန အရဟတ္တံ ဓာရေတုံ အသက္ကောန္တော တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ.

‘‘ယထာ ဝါ ပန၊ မဟာရာဇ၊ ပုရိသော အဗလော ဒုဗ္ဗလော နိဟီနဇစ္စော ပရိတ္တပုညော မဟတိမဟာရဇ္ဇံ လဘိတွာ ခဏေန ပရိပတတိ ပရိဓံသတိ ဩသက္ကတိ၊ န သက္ကောတိ ဣဿရိယံ ဓာရေတုံ၊ ဧဝမေဝ ခေါ၊ မဟာရာဇ၊ အရဟတ္တံ ပတ္တော ဂိဟီ တေန လိင်္ဂေန အရဟတ္တံ ဓာရေတုံ န သက္ကောတိ၊ တေန ကာရဏေန တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ခီဏာသဝဘာဝပဉှော ဒုတိယော.