၃. ခီဏာသဝသတိသမ္မောသပဉှော

၃. ‘‘ဘန္တေ နာဂသေန၊ အတ္ထိ အရဟတော သတိသမ္မောသော’’တိ? ‘‘ဝိဂတသတိသမ္မောသာ ခေါ၊ မဟာရာဇ၊ အရဟန္တော၊ နတ္ထိ အရဟန္တာနံ သတိသမ္မောသော’’တိ. ‘‘အာပဇ္ဇေယျ ပန၊ ဘန္တေ၊ အရဟာ အာပတ္တိ’’န္တိ? ‘‘အာမ၊ မဟာရာဇာ’’တိ. ‘‘ကိသ္မိံ ဝတ္ထုသ္မိ’’န္တိ? ‘‘ကုဋိကာရေ၊ မဟာရာဇ၊ သဉ္စရိတ္တေ၊ ဝိကာလေ ကာလသညာယ၊ ပဝါရိတေ အပ္ပဝါရိတသညာယ၊ အနတိရိတ္တေ အတိရိတ္တသညာယာ’’တိ.

‘‘ဘန္တေ နာဂသေန၊ တုမှေ ဘဏထ ‘ယေ အာပတ္တိံ အာပဇ္ဇန္တိ၊ တေ ဒွီဟိ ကာရဏေဟိ အာပဇ္ဇန္တိ အနာဒရိယေန ဝါ အဇာနနေန ဝါ’တိ. အပိ နု ခေါ၊ ဘန္တေ၊ အရဟတော အနာဒရိယံ ဟောတိ၊ ယံ အရဟာ အာပတ္တိံ အာပဇ္ဇတီ’’တိ? ‘‘န ဟိ၊ မဟာရာဇာ’’တိ.

‘‘ယဒိ၊ ဘန္တေ နာဂသေန၊ အရဟာ အာပတ္တိံ အာပဇ္ဇတိ၊ နတ္ထိ စ အရဟတော အနာဒရိယံ၊ တေန ဟိ အတ္ထိ အရဟတော သတိသမ္မောသော’’တိ? ‘‘နတ္ထိ၊ မဟာရာဇ၊ အရဟတော သတိသမ္မောသော၊ အာပတ္တိဉ္စ အရဟာ အာပဇ္ဇတီ’’တိ.

‘‘တေန ဟိ၊ ဘန္တေ၊ ကာရဏေန မံ သညာပေဟိ၊ ကိံ တတ္ထ ကာရဏ’’န္တိ? ‘‘ဒွေမေ၊ မဟာရာဇ၊ ကိလေသာ လောကဝဇ္ဇံ ပဏ္ဏတ္တိဝဇ္ဇဉ္စာတိ. ကတမံ၊ မဟာရာဇ၊ လောကဝဇ္ဇံ? ဒသ အကုသလကမ္မပထာ၊ ဣဒံ ဝုစ္စတိ လောကဝဇ္ဇံ. ကတမံ ပဏ္ဏတ္တိဝဇ္ဇံ? ယံ လောကေ အတ္ထိ သမဏာနံ အနနုစ္ဆဝိကံ အနနုလောမိကံ၊ ဂိဟီနံ အနဝဇ္ဇံ. တတ္ထ ဘဂဝါ သာဝကာနံ သိက္ခာပဒံ ပညပေတိ ‘ယာဝဇီဝံ အနတိက္ကမနီယ’န္တိ. ဝိကာလဘောဇနံ၊ မဟာရာဇ၊ လောကဿ အနဝဇ္ဇံ၊ တံ ဇိနသာသနေ ဝဇ္ဇံ. ဘူတဂါမဝိကောပနံ၊ မဟာရာဇ၊ လောကဿ အနဝဇ္ဇံ၊ တံ ဇိနသာသနေ ဝဇ္ဇံ. ဥဒကေ ဟဿဓမ္မံ၊ မဟာရာဇ၊ လောကဿ အနဝဇ္ဇံ၊ တံ ဇိနသာသနေ ဝဇ္ဇံ. ဣတိ ဧဝရူပါနိ ဧဝရူပါနိ၊ မဟာရာဇ၊ ဇိနသာသနေ ဝဇ္ဇာနိ၊ ဣဒံ ဝုစ္စတိ ပဏ္ဏတ္တိဝဇ္ဇံ.

‘‘လောကဝဇ္ဇံ အဘဗ္ဗော ခီဏာသဝေါ တံ အဇ္ဈာစရိတုံ၊ ယံ ကိလေသံ ပဏ္ဏတ္တိဝဇ္ဇံ၊ တံ အဇာနန္တော အာပဇ္ဇေယျ. အဝိသယော၊ မဟာရာဇ၊ ဧကစ္စဿ အရဟတော သဗ္ဗံ ဇာနိတုံ၊ န ဟိ တဿ ဗလံ အတ္ထိ သဗ္ဗံ ဇာနိတုံ. အနညာတံ၊ မဟာရာဇ၊ အရဟတော ဣတ္ထိပုရိသာနံ နာမမ္ပိ ဂေါတ္တမ္ပိ၊ မဂ္ဂေါပိ တဿ မဟိယာ အနညာတော၊ ဝိမုတ္တိံ ယေဝ၊ မဟာရာဇ၊ ဧကစ္စော အရဟာ ဇာနေယျ၊ ဆဠဘိညော အရဟာ သကဝိသယံ ဇာနေယျ၊ သဗ္ဗညူ၊ မဟာရာဇ၊ တထာဂတောဝ သဗ္ဗံ ဇာနာတီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ခီဏာသဝသတိသမ္မောသပဉှော တတိယော.