၇. ဃဋိကာရပဉှော

၇. ‘‘ဘန္တေ နာဂသေန၊ ဘာသိတမ္ပေတံ ဘဂဝတာ ‘ဃဋိကာရဿ ကုမ္ဘကာရဿ အာဝေသနံ သဗ္ဗံ တေမာသံ အာကာသစ္ဆဒနံ အဋ္ဌာသိ၊ န ဒေဝေါတိဝဿီ’တိ. ပုန စ ဘဏိတံ ‘ကဿပဿ တထာဂတဿ [ဘဂဝတော အရဟတော သမ္မာသမ္ဗုဒ္ဓဿ (မ. နိ. ၂.၂၈၉)] ကုဋိ ဩဝဿတီ’တိ. ကိဿ ပန၊ ဘန္တေ နာဂသေန၊ တထာဂတဿ ဧဝမုဿန္နကုသလမူလဿ [ဧဝရူပဿ ဥဿန္နကုသလမူလဿ (က.)] ကုဋိ ဩဝဿတိ၊ တထာဂတဿ နာမ သော အာနုဘာဝေါ ဣစ္ဆိတဗ္ဗော? ယဒိ၊ ဘန္တေ နာဂသေန၊ ဃဋိကာရဿ ကုမ္ဘကာရဿ အာဝေသနံ အနောဝဿံ အာကာသစ္ဆဒနံ အဟောသိ၊ တေန ဟိ ‘တထာဂတဿ ကုဋိ ဩဝဿတီ’တိ ယံ ဝစနံ၊ တံ မိစ္ဆာ. ယဒိ တထာဂတဿ ကုဋိ ဩဝဿတိ၊ တေန ဟိ ‘ဃဋိကာရဿ ကုမ္ဘကာရဿ အာဝေသနံ အနောဝဿကံ အဟောသိ အာကာသစ္ဆဒန’န္တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ဘာသိတမ္ပေတံ၊ မဟာရာဇ၊ ဘဂဝတာ ‘ဃဋိကာရဿ ကုမ္ဘကာရဿ အာဝေသနံ သဗ္ဗံ တေမာသံ အာကာသစ္ဆဒနံ အဋ္ဌာသိ၊ န ဒေဝေါတိဝဿီ’တိ. ဘဏိတဉ္စ ‘ကဿပဿ တထာဂတဿ ကုဋိ ဩဝဿတီ’တိ. ဃဋိကာရော၊ မဟာရာဇ၊ ကုမ္ဘကာရော သီလဝါ ကလျာဏဓမ္မော ဥဿန္နကုသလမူလော အန္ဓေ ဇိဏ္ဏေ မာတာပိတရော ပေါသေတိ၊ တဿ အသမ္မုခါ အနာပုစ္ဆာယေဝဿ ဃရေ တိဏံ ဟရိတွာ ဘဂဝတော ကုဋိံ ဆာဒေသုံ၊ သော တေန တိဏဟရဏေန အကမ္ပိတံ အသဉ္စလိတံ သုသဏ္ဌိတံ ဝိပုလမသမံ ပီတိံ ပဋိလဘတိ၊ ဘိယျော သောမနဿဉ္စ အတုလံ ဥပ္ပါဒေသိ ‘အဟော ဝတ မေ ဘဂဝါ လောကုတ္တမော သုဝိဿတ္ထော’တိ၊ တေန တဿ ဒိဋ္ဌဓမ္မိကော ဝိပါကော နိဗ္ဗတ္တော. န ဟိ၊ မဟာရာဇ၊ တထာဂတော တာဝတကေန ဝိကာရေန စလတိ.

‘‘ယထာ၊ မဟာရာဇ၊ သိနေရု ဂိရိရာဇာ အနေကသတသဟဿဝါတသမ္ပဟာရေနပိ န ကမ္ပတိ န စလတိ၊ မဟောဒဓိ ဝရပ္ပဝရသာဂရော အနေကသတနဟုတမဟာဂင်္ဂါသတသဟဿေဟိပိ န ပူရတိ န ဝိကာရမာပဇ္ဇတိ၊ ဧဝမေဝ ခေါ၊ မဟာရာဇ၊ တထာဂတော န တာဝတကေန ဝိကာရေန စလတိ.

‘‘ယံ ပန၊ မဟာရာဇ၊ တထာဂတဿ ကုဋိ ဩဝဿတိ၊ တံ မဟတော ဇနကာယဿ အနုကမ္ပာယ. ဒွေမေ၊ မဟာရာဇ၊ အတ္ထဝသေ သမ္ပဿမာနာ တထာဂတာ သယံ နိမ္မိတံ ပစ္စယံ နပ္ပဋိသေဝန္တိ၊ ‘အယံ အဂ္ဂဒက္ခိဏေယျော သတ္ထာ’တိ ဘဂဝတော ပစ္စယံ ဒတွာ ဒေဝမနုဿာ သဗ္ဗဒုဂ္ဂတိတော ပရိမုစ္စိဿန္တီတိ၊ ဒဿေတွာ ဝုတ္တိံ ပရိယေသန္တီတိ ‘မာ အညေ ဥပဝဒေယျု’န္တိ. ဣမေ ဒွေ အတ္ထဝသေ သမ္ပဿမာနာ တထာဂတာ သယံ နိမ္မိတံ ပစ္စယံ နပ္ပဋိသေဝန္တိ. ယဒိ၊ မဟာရာဇ၊ သက္ကော ဝါ တံ ကုဋိံ အနောဝဿံ ကရေယျ ဗြဟ္မာ ဝါ သယံ ဝါ၊ သာဝဇ္ဇံ ဘဝေယျ တံ ယေဝ ကရဏံ [ကာရဏံ (သီ. ပီ.)] သဒေါသံ သနိဂ္ဂဟံ၊ ဣမေ ဝိဘူတံ [ဝိဘူသံ (သီ. ပီ.)] ကတွာ လောကံ သမ္မောဟေန္တိ အဓိကတံ ကရောန္တီတိ၊ တသ္မာ တံ ကရဏံ ဝဇ္ဇနီယံ. န၊ မဟာရာဇ၊ တထာဂတာ ဝတ္ထုံ ယာစန္တိ၊ တာယ အဝတ္ထုယာစနာယ အပရိဘာသိယာ ဘဝန္တီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ဃဋိကာရပဉှော သတ္တမော.