၉. ဥတ္တရိကရဏီယပဉှော

၉. ‘‘ဘန္တေ နာဂသေန၊ တုမှေ ဘဏထ ‘ယံ ကိဉ္စိ ကရဏီယံ တထာဂတဿ၊ သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ၊ နတ္ထိ တထာဂတဿ ဥတ္တရိံ ကရဏီယံ၊ ကတဿ ဝါ ပတိစယော’တိ၊ ဣဒဉ္စ တေမာသံ ပဋိသလ္လာနံ ဒိဿတိ. ယဒိ၊ ဘန္တေ နာဂသေန၊ ယံ ကိဉ္စိ ကရဏီယံ တထာဂတဿ၊ သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ၊ နတ္ထိ တထာဂတဿ ဥတ္တရိံ ကရဏီယံ၊ ကတဿ ဝါ ပတိစယော၊ တေန ဟိ ‘တေမာသံ ပဋိသလ္လီနော’တိ ယံ ဝစနံ၊ တံ မိစ္ဆာ. ယဒိ တေမာသံ ပဋိသလ္လီနော၊ တေန ဟိ ‘ယံ ကိဉ္စိ ကရဏီယံ၊ တထာဂတဿ၊ သဗ္ဗံ တံ ဗောဓိယာ ယေဝ မူလေ ပရိနိဋ္ဌိတ’န္တိ တမ္ပိ ဝစနံ မိစ္ဆာ. နတ္ထိ ကတကရဏီယဿ ပဋိသလ္လာနံ၊ သကရဏီယဿေဝ ပဋိသလ္လာနံ ယထာ နာမ ဗျာဓိတဿေဝ ဘေသဇ္ဇေန ကရဏီယံ ဟောတိ၊ အဗျာဓိတဿ ကိံ ဘေသဇ္ဇေန. ဆာတဿေဝ ဘောဇနေန ကရဏီယံ ဟောတိ၊ အဆာတဿ ကိံ ဘောဇနေန. ဧဝမေဝ ခေါ၊ ဘန္တေ နာဂသေန၊ နတ္ထိ ကတကရဏီယဿ ပဋိသလ္လာနံ၊ သကရဏီယဿေဝ ပဋိသလ္လာနံ. အယမ္ပိ ဥဘတော ကောဋိကော ပဉှော တဝါနုပ္ပတ္တော၊ သော တယာ နိဗ္ဗာဟိတဗ္ဗော’’တိ.

‘‘ယံ ကိဉ္စိ၊ မဟာရာဇ၊ ကရဏီယံ တထာဂတဿ၊ သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ၊ နတ္ထိ တထာဂတဿ ဥတ္တရိံ ကရဏီယံ၊ ကတဿ ဝါ ပတိစယော၊ ဘဂဝါ စ တေမာသံ ပဋိသလ္လီနော၊ ပဋိသလ္လာနံ ခေါ၊ မဟာရာဇ၊ ဗဟုဂုဏံ၊ သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ၊ တံ တေ သုကတဂုဏမနုဿရန္တာ ပဋိသလ္လာနံ သေဝန္တိ. ယထာ၊ မဟာရာဇ၊ ပုရိသော ရညော သန္တိကာ လဒ္ဓဝရော ပဋိလဒ္ဓဘောဂေါ တံ သုကတဂုဏမနုဿရန္တော အပရာပရံ ရညော ဥပဋ္ဌာနံ ဧတိ. ဧဝမေဝ ခေါ၊ မဟာရာဇ၊ သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ၊ တံ တေ သုကတဂုဏမနုဿရန္တာ ပဋိသလ္လာနံ သေဝန္တိ.

‘‘ယထာ ဝါ ပန၊ မဟာရာဇ၊ ပုရိသော အာတုရော ဒုက္ခိတော ဗာဠှဂိလာနော ဘိသက္ကမုပသေဝိတွာ သောတ္ထိမနုပ္ပတ္တော တံ သုကတဂုဏမနုဿရန္တော အပရာပရံ ဘိသက္ကမုပသေဝတိ. ဧဝမေဝ ခေါ၊ မဟာရာဇ၊ သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ၊ တံ တေ သုကတဂုဏမနုဿရန္တာ ပဋိသလ္လာနံ သေဝန္တိ.

‘‘အဋ္ဌဝီသတိ ခေါ ပနိမေ၊ မဟာရာဇ၊ ပဋိသလ္လာနဂုဏာ၊ ယေ ဂုဏေ သမနုဿရန္တာ [သမနုပဿန္တာ (သီ. ပီ.)] တထာဂတာ ပဋိသလ္လာနံ သေဝန္တိ. ကတမေ အဋ္ဌဝီသတိ? ဣဓ၊ မဟာရာဇ၊ ပဋိသလ္လာနံ ပဋိသလ္လီယမာနံ အတ္တာနံ ရက္ခတိ၊ အာယုံ ဝဍ္ဎေတိ၊ ဗလံ ဒေတိ၊ ဝဇ္ဇံ ပိဒဟတိ၊ အယသမပနေတိ၊ ယသမုပနေတိ၊ အရတိံ ဝိနောဒေတိ၊ ရတိမုပဒဟတိ၊ ဘယမပနေတိ၊ ဝေသာရဇ္ဇံ ကရောတိ၊ ကောသဇ္ဇမပနေတိ၊ ဝီရိယမဘိဇနေတိ၊ ရာဂမပနေတိ၊ ဒေါသမပနေတိ၊ မောဟမပနေတိ၊ မာနံ နိဟန္တိ၊ ဝိတက္ကံ ဘဉ္ဇတိ၊ စိတ္တံ ဧကဂ္ဂံ ကရောတိ၊ မာနသံ သ္နေဟယတိ [သောဘယတိ (သီ.)]၊ ဟာသံ ဇနေတိ၊ ဂရုကံ ကရောတိ၊ လာဘမုပ္ပါဒယတိ၊ နမဿိယံ ကရောတိ၊ ပီတိံ ပါပေတိ၊ ပါမောဇ္ဇံ ကရောတိ၊ သင်္ခါရာနံ သဘာဝံ ဒဿယတိ၊ ဘဝပ္ပဋိသန္ဓိံ ဥဂ္ဃါဋေတိ၊ သဗ္ဗသာမညံ ဒေတိ. ဣမေ ခေါ၊ မဟာရာဇ၊ အဋ္ဌဝီသတိ ပဋိသလ္လာနဂုဏာ၊ ယေ ဂုဏေ သမနုဿရန္တာ တထာဂတာ ပဋိသလ္လာနံ သေဝန္တိ.

‘‘အပိ စ ခေါ၊ မဟာရာဇ၊ တထာဂတာ သန္တံ သုခံ သမာပတ္တိရတိံ အနုဘဝိတုကာမာ ပဋိသလ္လာနံ သေဝန္တိ ပရိယောသိတသင်္ကပ္ပါ. စတူဟိ ခေါ၊ မဟာရာဇ၊ ကာရဏေဟိ တထာဂတာ ပဋိသလ္လာနံ သေဝန္တိ. ကတမေဟိ စတူဟိ? ဝိဟာရဖာသုတာယပိ၊ မဟာရာဇ၊ တထာဂတာ ပဋိသလ္လာနံ သေဝန္တိ၊ အနဝဇ္ဇဂုဏဗဟုလတာယပိ တထာဂတာ ပဋိသလ္လာနံ သေဝန္တိ၊ အသေသအရိယဝီထိတောပိ တထာဂတာ ပဋိသလ္လာနံ သေဝန္တိ၊ သဗ္ဗဗုဒ္ဓါနံ ထုတထောမိတဝဏ္ဏိတပသတ္ထတောပိ တထာဂတာ ပဋိသလ္လာနံ သေဝန္တိ. ဣမေဟိ ခေါ၊ မဟာရာဇ၊ စတူဟိ ကာရဏေဟိ တထာဂတာ ပဋိသလ္လာနံ သေဝန္တိ. ဣတိ ခေါ၊ မဟာရာဇ၊ တထာဂတာ ပဋိသလ္လာနံ သေဝန္တိ န သကရဏီယတာယ၊ န ကတဿ ဝါ ပတိစယာယ၊ အထ ခေါ ဂုဏဝိသေသဒဿာဝိတာယ တထာဂတာ ပဋိသလ္လာနံ သေဝန္တီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ဥတ္တရိကရဏီယပဉှော နဝမော.