၁၀. ဣဒ္ဓိဗလဒဿနပဉှော

၁၀. ‘‘ဘန္တေ နာဂသေန၊ ဘာသိတမ္ပေတံ ဘဂဝတာ ‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ၊ သော အာကင်္ခမာနော၊ အာနန္ဒ၊ တထာဂတော ကပ္ပံ ဝါ တိဋ္ဌေယျ ကပ္ပါဝသေသံ ဝါ’တိ. ပုန စ ဘဏိတံ ‘ဣတော တိဏ္ဏံ မာသာနံ အစ္စယေန တထာဂတော ပရိနိဗ္ဗာယိဿတီ’တိ. ယဒိ၊ ဘန္တေ နာဂသေန၊ ဘဂဝတာ ဘဏိတံ ‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ။ပေ။ ကပ္ပါဝသေသံ ဝါ’တိ၊ တေန ဟိ တေမာသပရိစ္ဆေဒေါ မိစ္ဆာ. ယဒိ၊ ဘန္တေ၊ တထာဂတေန ဘဏိတံ ‘ဣတော တိဏ္ဏံ မာသာနံ အစ္စယေန တထာဂတော ပရိနိဗ္ဗာယိဿတီ’တိ၊ တေန ဟိ ‘‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ။ပေ။ ကပ္ပါဝသေသံ ဝါ’တိ တမ္ပိ ဝစနံ မိစ္ဆာ. နတ္ထိ တထာဂတာနံ အဋ္ဌာနေ ဂဇ္ဇိတံ. အမောဃဝစနာ ဗုဒ္ဓါ ဘဂဝန္တော တထဝစနာ အဒွေဇ္ဈဝစနာ. အယမ္ပိ ဥဘတော ကောဋိကော ပဉှော ဂမ္ဘီရော သုနိပုဏော ဒုန္နိဇ္ဈာပယော တဝါနုပ္ပတ္တော၊ ဘိန္ဒေတံ ဒိဋ္ဌိဇာလံ၊ ဧကံသေ ဌပယ၊ ဘိန္ဒ ပရဝါဒ’’န္တိ.

‘‘ဘာသိတမ္ပေတံ၊ မဟာရာဇ၊ ဘဂဝတာ ‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ။ပေ။ ကပ္ပါဝသေသံ ဝါ’တိ၊ တေမာသပရိစ္ဆေဒေါ စ ဘဏိတော၊ သော စ ပန ကပ္ပေါ အာယုကပ္ပေါ ဝုစ္စတိ. န၊ မဟာရာဇ၊ ဘဂဝါ အတ္တနော ဗလံ ကိတ္တယမာနော ဧဝမာဟ၊ ဣဒ္ဓိဗလံ ပန မဟာရာဇ၊ ဘဂဝါ ပရိကိတ္တယမာနော ဧဝမာဟ ‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ။ပေ။ ကပ္ပါဝသေသံ ဝါ’တိ.

‘‘ယထာ၊ မဟာရာဇ၊ ရညော အဿာဇာနီယော ဘဝေယျ သီဃဂတိ အနိလဇဝေါ၊ တဿ ရာဇာ ဇဝဗလံ ပရိကိတ္တယန္တော သနေဂမဇာနပဒဘဋဗလဗြာဟ္မဏဂဟပတိကအမစ္စဇနမဇ္ဈေ ဧဝံ ဝဒေယျ ‘အာကင်္ခမာနော မေ၊ ဘော၊ အယံ ဟယဝရော သာဂရဇလပရိယန္တံ မဟိံ အနုဝိစရိတွာ ခဏေန ဣဓာဂစ္ဆေယျာ’တိ၊ န စ တံ ဇဝဂတိံ တဿံ ပရိသာယံ ဒဿေယျ၊ ဝိဇ္ဇတိ စ သော ဇဝေါ တဿ၊ သမတ္ထော စ သော ခဏေန သာဂရဇလပရိယန္တံ မဟိံ အနုဝိစရိတုံ. ဧဝမေဝ ခေါ၊ မဟာရာဇ၊ ဘဂဝါ အတ္တနော ဣဒ္ဓိဗလံ ပရိကိတ္တယမာနော ဧဝမာဟ၊ တမ္ပိ တေဝိဇ္ဇာနံ ဆဠဘိညာနံ အရဟန္တာနံ ဝိမလခီဏာသဝါနံ ဒေဝမနုဿာနဉ္စ မဇ္ဈေ နိသီဒိတွာ ဘဏိတံ ‘တထာဂတဿ ခေါ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ၊ သော အာကင်္ခမာနော၊ အာနန္ဒ၊ တထာဂတော ကပ္ပံ ဝါ တိဋ္ဌေယျ ကပ္ပါဝသေသံ ဝါ’တိ. ဝိဇ္ဇတိ စ တံ၊ မဟာရာဇ၊ ဣဒ္ဓိဗလံ ဘဂဝတော၊ သမတ္ထော စ ဘဂဝါ ဣဒ္ဓိဗလေန ကပ္ပံ ဝါ ဌာတုံ ကပ္ပါဝသေသံ ဝါ၊ န စ ဘဂဝါ တံ ဣဒ္ဓိဗလံ တဿံ ပရိသာယံ ဒဿေတိ၊ အနတ္ထိကော၊ မဟာရာဇ၊ ဘဂဝါ သဗ္ဗဘဝေဟိ၊ ဂရဟိတာ စ တထာဂတဿ သဗ္ဗဘဝါ. ဘာသိတမ္ပေတံ၊ မဟာရာဇ၊ ဘဂဝတာ ‘သေယျထာပိ၊ ဘိက္ခဝေ၊ အပ္ပမတ္တကောပိ ဂူထော ဒုဂ္ဂန္ဓော ဟောတိ. ဧဝမေဝ ခေါ အဟံ၊ ဘိက္ခဝေ၊ အပ္ပမတ္တကမ္ပိ ဘဝံ န ဝဏ္ဏေမိ အန္တမသော အစ္ဆရာသင်္ဃာတမတ္တမ္ပီ’တိ အပိ နု ခေါ၊ မဟာရာဇ၊ ဘဂဝါ သဗ္ဗဘဝဂတိယောနိယော ဂူထသမံ ဒိသွာ ဣဒ္ဓိဗလံ နိဿာယ ဘဝေသု ဆန္ဒရာဂံ ကရေယျာ’’တိ? ‘‘န ဟိ ဘန္တေ’’တိ. ‘‘တေန ဟိ၊ မဟာရာဇ၊ ဘဂဝါ ဣဒ္ဓိဗလံ ပရိကိတ္တယမာနော ဧဝရူပံ ဗုဒ္ဓသီဟနာဒမဘိနဒီ’’တိ. ‘‘သာဓု၊ ဘန္တေ နာဂသေန၊ ဧဝမေတံ တထာ သမ္ပဋိစ္ဆာမီ’’တိ.

ဣဒ္ဓိဗလဒဿနပဉှော ဒသမော.

ဣဒ္ဓိဗလဝဂ္ဂေါ ပဌမော.

ဣမသ္မိံ ဝဂ္ဂေ ဒသ ပဉှာ.